އީދު ފާހަގަކުރާއިރު އިސްލާމީ ހުދޫދުތަކަށް ރިއާޔަތް ކުރުމަށް ޚުތުބާގައި ގޮވާލައިފި

އީދުގެ ދުވަސްތައް ފާހަގަކުރާއިރު އާންމު މަސްލަހަތާއި އިސްލާމީ ހުދޫދުތަކަށް ބޯލެނބުމަށް މިއަދުގެ ހުކުރު ޚުތުބާގައި ގޮވާލައިފިއެވެ.

"އަރަފާތު ދުވަހުގެ މާތްކަން" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، އީދުގެ އުފާ ފާޅު ކުރުމަކީ އިސްލާމް ދީނުގައި ހުއްދަ ކަމެއް ކަމަށާއި، ނަމަވެސް އެކަން ކުރަން ޖެހޭނީ އިސްލާމީ ހަމަތަކާއި އަހްލާޤީ އިމުން ބޭރު ނުވާ ގޮތަށް ކަމަށެވެ. އެގޮތުން ތިމާގެ އިތުރުން އެހެން މީހުންނަށްވެސް ގެއްލުމެއް ނުވާނެ ގޮތަށް، އަދި އާންމު މަސްލަހަތާއި، ހެދިފައިވާ ޤާނޫނުތަކާއި ޤަވާއިދުތަކަށް ބޯލަނބައިގެން އީދުގެ އުފާ ހާސިލު ކުރުމަށް ޚުތުބާގައި ވަނީ ގޮވާލާފައެވެ.

ޚުތުބާގައި އިތުރަށް ބުނީ، ދީނުގައި ކަނޑައަޅުއްވާފައިވާ ހަމަތަކާއި އިންތައް ފަހަނައަޅައި ނުދިއުމަށް ކީރިތި ރަސޫލާވެސް ހަދީޘް ކުރައްވާފައިވާ ކަމަށެވެ.

ޚުތުބާގައި އިތުރަށް ބުނީ، ޢަރަފާތު ދުވަހަކީ ހައްޖުގެ އެންމެ މުހިއްމު ރުކުން އަދާކުރާ ދުވަސް ކަމަށާއި، ޢަރަފާތު ދުވަހު ހައްޖުވެރިން ޢަރަފާތުގައި ތިބެ ﷲ ގެ ރަޙްމަތާއި ދިންނެވުމަށް އެދި ދުއާކުރާނެ ކަމަށެވެ. އެގޮތުން މިދުވަހު ގިނަގިނައިން ފާފަ ފުއްސެވުން އެދި ﷲ ގެ ހަޞްރަތުގައި ދުއާ ދެންނެވުމަށް އަންގާފައިވާ ކަމަށާއި، ޢަރަފާތު ދުވަހަކީ ދުއާ އިޖާބަކުރައްވާ ދުވަހެއް ކަމަށްވެސް ޚުތުބާގައި ބުނެފައިވެއެވެ.