އީދުގެ ދުވަސްތައް ފާހަގަކުރާއިރު އާންމު މަސްލަހަތާއި އިސްލާމީ ހުދޫދުތަކަށް ބޯލެނބުމަށް މިއަދުގެ ހުކުރު ޚުތުބާގައި ގޮވާލައިފިއެވެ.
"އަރަފާތު ދުވަހުގެ މާތްކަން" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، އީދުގެ އުފާ ފާޅު ކުރުމަކީ އިސްލާމް ދީނުގައި ހުއްދަ ކަމެއް ކަމަށާއި، ނަމަވެސް އެކަން ކުރަން ޖެހޭނީ އިސްލާމީ ހަމަތަކާއި އަހްލާޤީ އިމުން ބޭރު ނުވާ ގޮތަށް ކަމަށެވެ. އެގޮތުން ތިމާގެ އިތުރުން އެހެން މީހުންނަށްވެސް ގެއްލުމެއް ނުވާނެ ގޮތަށް، އަދި އާންމު މަސްލަހަތާއި، ހެދިފައިވާ ޤާނޫނުތަކާއި ޤަވާއިދުތަކަށް ބޯލަނބައިގެން އީދުގެ އުފާ ހާސިލު ކުރުމަށް ޚުތުބާގައި ވަނީ ގޮވާލާފައެވެ.
ޚުތުބާގައި އިތުރަށް ބުނީ، ދީނުގައި ކަނޑައަޅުއްވާފައިވާ ހަމަތަކާއި އިންތައް ފަހަނައަޅައި ނުދިއުމަށް ކީރިތި ރަސޫލާވެސް ހަދީޘް ކުރައްވާފައިވާ ކަމަށެވެ.
ހަމަކަށަވަރުން މާތް ﷲ ކަންތައްތަކެއް ފަރުޟު ކުރައްވާފައިވެއެވެ. ފަހެ ތިޔަބައިމީހުން އެކަންތައްތަކާމެދު އިހުމާލުނުވާ ހުށިކަމެެވެ. އަދި އެކަލާނގެ އިންތަކެއް ކަނޑައަޅުއްވާފައިވެއެވެ. ފަހެ ތިޔަބައިމީހުން އެ އިންތައް ފަހަނައަޅައި ނުދާ ހުށިކަމެވެ. އަދި އެކަލާނގެ ކަންތައްތަކެއް ހަރާމް ކުރައްވާފައިވެއެވެ. އެ ކަންތައްތަކަށް ތިޔަބައިމީހުން އަރައި ނުގަންނަ ހުށިކަމެވެ. އަދި އެކަލާނގެ ހަނދުމަނެތިވޮޑިގަތުމަކާނުލައި ތިޔަބައިމީހުންނަށް ރަހުމަތެއްގެ ގޮތުން ކަންތައްތަކެއް ބަޔާން ނުކުރައްވައި ދޫކޮށްލާފައިވެެއެވެ. ތިޔަބައިމީހުން އެކަންކަން ހޯދަން ނޫޅޭށެވެ.ކީރިތި ރަސޫލާގެ ހަދީޘް ބަސްފުޅެއްގެ މާނަ
ޚުތުބާގައި އިތުރަށް ބުނީ، ޢަރަފާތު ދުވަހަކީ ހައްޖުގެ އެންމެ މުހިއްމު ރުކުން އަދާކުރާ ދުވަސް ކަމަށާއި، ޢަރަފާތު ދުވަހު ހައްޖުވެރިން ޢަރަފާތުގައި ތިބެ ﷲ ގެ ރަޙްމަތާއި ދިންނެވުމަށް އެދި ދުއާކުރާނެ ކަމަށެވެ. އެގޮތުން މިދުވަހު ގިނަގިނައިން ފާފަ ފުއްސެވުން އެދި ﷲ ގެ ހަޞްރަތުގައި ދުއާ ދެންނެވުމަށް އަންގާފައިވާ ކަމަށާއި، ޢަރަފާތު ދުވަހަކީ ދުއާ އިޖާބަކުރައްވާ ދުވަހެއް ކަމަށްވެސް ޚުތުބާގައި ބުނެފައިވެއެވެ.
