އީދު ބަންދަށް ފުރާ އެންމެހައި ފަރާތްތަކުން ދެފުރޮޅުލީ އެންގަމު އުޅަނދަށް ޚާއްސަ ސަމާލުކަމެއް ދިނުމަށް ފުލުހުން އިލްތިމާސްކޮށްފިއެވެ.

ފުލުހުން އަޟްހާ އީދަށް ވަމުން އަންނަ ތައްޔާރީތަކާއި ބެހޭ ގޮތުން ރާއްޖެޓީވީގައި ވާހަކަދައްކަވަމުން އިސްޕެކްޓަރ އޮފް ޕޮލިސް އަހުމަދު ހަނީފް ވިދާޅުވީ އަޟްހާ އީދު ބަންދާ ދިމާކޮށް ގިނަ އަދަދެއް ރައްޔިތުން މާލެއިން ބޭރަށް ފުރާ ކަމަށެވެ. އެގޮތުން މާލެއިން ބޭރަށް ފުރާއިރު ވަރަށް މުހިންމު ކަންތައްތަކަކަށް ސަމާލުވާންޖެހޭ ކަމަށް ހަނީފް ވިދާޅުވިއެވެ.

ޚާއްސަ ގޮތެއްގައި ސައިކަލުތައް މަގުމައްޗަށް ދޫކޮށްލާފައި ހުންނައިރު ވަގަށް އެޅަނދެއް ނުގެންދެވޭނެ ގޮތަށް އެޕާކުކޮށް ސަޓާލޮކްކޮށް ނުވަތަ ޑިސްކް ލޮކްކޮށް ނުވަތަ ޑިސްކް ތަޅެއް އަޅުން ވަރަށް މުހިންމު ކަމަށް ހަނީފް ވިދާޅުވިއެވެ.

ގިނައިން ވަގަށް ނަގަނީ ވޭވް ބްރޭޑްތަކުގެ ސައިކަލުކަން ފާހަގަކުރައްވައި ހަނީފު ވިދާޅުވީ ޚާއްސަ ގޮތެއްގައި މިފަދަ ސައިކަލުތައް ޚާއްސަ ސަމާލުކަމެއްދިނުމަށް އެދޭ ކަމަށެވެ. އަދި އުޅަނދެއް ޕާކުކޮށްފައިދާއިރު އަގުބޮޑު މުދާ ސައިކަލު މަޑިދަށުގައި ނުބެހެއްޓުމަށް އެދޭ ކަމަށާއި، ގިނަ ފަހަރަށް މަޑިދަށުގައި ހުންނަ މުދާ ވަގަށް ނަގާ ކަމަށް ރިޕޯޓްކުރާކަމަށް އޭނާ ވިދާޅުވިއެވެ.

މީގެ އިތުރުން ހަނީފް ވިދާޅުވީ އީދު ޗުއްޓީއަށްދާއިރު ސަރުކާރު އޮފީސްތަކާއި ޕްރައިވެޓް އޮފީސްތައް ބަންދުކުރި ނަމަވެސް މިއޮފީސްތައް ރަނގަޅު ގޮތުގައި ބެލެހެއްޓޭނެ މެކޭނިޒަމެއް އޮފީސްތަކުން ހަދަން ޖެހޭ ކަމަށެވެ. އަދި 24 ގަޑިއިރު ޑިއުޓީ ނުކުރި ނަމަވެސް ރެންޑަމްކޮށް އޮފީސްތައް ބެލުމަކީ ބުއްދިވެރި ގޮތް ކަމަށާއި، ވައްކަމުގެ ކުޑަވެސް ޝައްކުވާނަމަ އަވަހަށް ފުލުހުންނަށް ރިޕޯޓުކުރުމަށް ވަނީ އިލްތިމާސްކޮފައެވެ.

ދިރިއުޅޭ ގެއަށް ޚާއްސަ ސަމާލުކަމެއްދިނުމަށް އިލްތިމާސްކުރައްވާ ހަނީފު ވިދާޅުވީ ގެތަޅުލާފައި ދާއިރު އިތުބާރު ކުރެވޭ ފަރާތަކަށް ގެ ހަވާލުކޮށްފައި ދިއުމަށް އެދޭ ކަމަށެވެ.

ހަނީފު ވިދާޅުވީ ގެތަޅުލާފައި ފުރާގެން ދާއިރު، ކޮންމެހެން ދިއްލަންޖެހޭ ލައިޓެއް ނޫނީ ނުދިއްލުމަށާއި، ގެއިން ފެންކަނޑާލާފައި ދިއުމަށް އެދޭ ކަމަށެވެ.

ސްޓޭޝަން އިންސްޕެކްޓަރ އިބްރާހިމް އަލީ ވިދާޅުވީ ވައްކަން ކުރުމާއި، ފޭރުން ފަދަ ކަންކަން މެދުވެރިވަނީ ފުރުސަތުތަކެއް ހުޅުވިފައި ހުންނާތީ ކަމަށެވެ.

އިބްރާހިމް އަލީ ވިދާޅުވީ ގިނައިން ކުށްތައް އާންމުވަމުންދަނީ ރަށު ތެރޭގައި މީހުން މަދުވާ ދުވަސްވަރު ކަމަށާއި، އެގޭގައި މީހުން ދިރިނޫޅޭ ދުވަސްވަރު ކަމަށެވެ. އެހެންކަމުން ކުރީ ބައިގައި އަޅަން ޖެހޭ ރައްކާތެރިކަމުގެ ފިޔަވަޅު އަޅަން ޖެހޭ ކަމަށް އިބްރާހިމް އަލީ ވިދާޅުވިއެވެ.