ޔުނައިޓެޑް ވިކްޓްރީ ބަލިކޮށް ތާވަލުގެ އެއްވަނައިގައި މާޒިޔާއިން ލީޑު ފުޅާކޮށްފި

ދިރާގު ދިވެހި ޕްރިމިއާ ލީގުގައި މާޒިޔާއާއި ޔުނައިޓެޑް ވިކްޓްރީ ބައްދަލު ކުރި މެޗު ފަސޭހަ ކަމާއިއެކު މާޒިޔާއިން ކާމިޔާބުކޮށް ތާވަލުގެ އެއްވަނައިގައި ހަމަޖެހިލައިފިއެވެ. މި މެޗް މާޒިޔާއިން ކާމިޔަބު ކުރީ 6-1 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުން އަވަސް ކުޅުމެއް ފެނިގެންދިޔައިރު މެޗުގެ ފުރަތަމަ 40 މިނެޓުގައި ޔުނައިޓެޑް ވިކްޓްރީއިން ވަނީ ވަރުގަދަ ޑިފެންސްއެއް ކޮށްފައެވެ. ނަމަވެސް ޔުނައިޓެޑް ވިކްޓްރީއިން ކުރަމުން އައި ވަރުގަދަ ޑިފެންސް ފޫއަޅުވައިލާ ހާފުގެ ފަހު ފަސްމިނެޓުގައި މާޒިޔާއިން ވަނީ ދެ ލަނޑުޖަހާ ލީޑު ނަގައިފައެވެ. އެގޮތުން މާޒިޔާގެ ފުރަތަމަ ލަނޑު ނާއިޒް ކާމިޔާބު ކުރިއިރު މާޒިޔާގެ ދެވަނަ ލަނޑު ނާއިޒްގެ އެހީތެރިކަމާއި އެކު ކާމިޔާބު ކުރީ އަސަދުﷲ އަބްދުﷲ އެވެ.

މެޗުގެ ދެވަނަ ހާފު ފަށައިގެން 61 ވަނަ މިނެޓުގައި ޔުނައިޓެޑް ވިކްޓްރީގެ ބިދޭސީ ކުޅުންތެރިޔާ ޑިމިޓްރީ ވަނީ ލަނޑެއް ޖަހާ ފަރަގު ކުޑަ ކޮށްފައެވެ. ޔުނައިޓެޑް ވިކްޓްރީއިން ލަނޑު ޖެހިތާ ގިނަ އިރުތަކެއް ނުވަނީސް މާޒިޔާގެ އަސަދުﷲ ވަނީ އިތުރު ލަނޑެއްޖަހާ ލީޑު ފުޅާކޮށްދީފައެވެ. ތިންވަނަ ލަނޑަށްފަހު މާޒިޔާއިން ވަނީ އެޓީމުގެ ކުޅުން އިތުރަށް ވަރުގަދަކޮށްފައެވެ. އެގޮތުން މާޒިޔާގެ ބިދޭސީ ކުޅުންތެރިޔާ ސްޓޭވާޓް ވަނީ މެޗު ނިމުމުގެ ކުރިން ދެ ލަނޑު އެޓީމަށް ކާމިޔާބުކޮށްދީފައެވެ. މީގެ އިތުރުން މާޒިޔާގެ ސަމުއްޓޭވެސް ވަނީ މި މެޗުގައި އެޓީމަށް ލަނޑެއް ކާމިޔާބުކޮށްދީފައެވެ.

މި ނަތީޖާއާއިއެކު މާޒިޔާއިން ލީގުގެ އެއްވަނައިގައި އޮތީ 17 ޕޮއިންޓާއިއެކު އެވެ.