ޑޭވިޑް ލުއިޒް އާސެނަލްއަށް ބަދަލުވުމާ ގާތަށް

ޗެލްސީއަށް ކުޅެމުން އަންނަ ބްރެޒިލްގެ ޑިފެންޑަރ ޑޭވިޑް ލުއިޒް އާސެނަލްއަށް ބަދަލުވުމާ ގާތަށް ޖެހިލައިފިއެވެ.

އުމުރުން 32 އަހަރުގެ ލުއިޒް 8 މިލިއަން ޕައުންޑަށް ހޯދުމަށް އާސެނަލްއިން އެއްބަސްވެފައިވާއިރު، އެ އަގަށް ޗެލްސީން ވެސް އެއްބަސްވެފައިވާ ކަމަށް ރިޕޯޓްތައް ބުނެއެވެ.

ރިޕޯޓްތައް ބުނާގޮތުން ލުއިޒް ހޯދުމަށް ގިނަ ކްލަބްތަކުން މަސައްކަތް ކުރި ނަމަވެސް، އޭނާ ބަދަލުވުން އެންމެ ގާތީ އާސެނަލްއަށެވެ. އަދި ބައެއް ރިޕޯޓްތައް ބުނާގޮތުން ބުރާސްފަތި ދުވަހު އޭނާ އާސެނަލްއާއެކު މެޑިކަލް ފުރިހަމަ ކުރާނެއެވެ.

ލުއިޒް ޗެލްސީއާއެކު ހަދާފައިވާ އެއްބަސްވުން މިދިޔަ މެއި މަހު އާކޮށްފައިވާއިރު، އޭނާ ކްލަބުގައި 2021 ވަނަ އަހަރު ނިޔަލަށް މަޑުކުރާނެއެވެ.

ބެންފީކާއަށް 132 މެޗު ކުޅެފައިވާ ޑޭވިޑް ލުއިޒު ވަނީ އެ ކްލަބާ އެކު ގިނަ ކާމިޔާބީތަކެއް ހޯދާފައެވެ. އެ އަށް ފަހު ޗެލްސީ އަށް އޭނާ ބަދަލުވިއިރު، ޗެލްސީ އަށް އޭނާ ވަނީ 143 މެޗު ކުޅެ އެ ކްލަބާއެކު ޔުއެފާ ޗެމްޕިއަންސް ލީގު އަދި ޔުއެފާ ޔޫރޮޕާ ލީގު ވެސް ކާމިޔާބުކޮށްފައެވެ.

ޗެލްސީ ދޫކޮށް ޑޭވިޑް ލުއިޒް ޕީއެސްޖީ އަށް ބަދަލުވީ 2014 ވަނަ އަހަރުގެ ސީޒަނުގައެވެ. އޭނާ ވަނީ އެ ކްލަބަށް 89 މެޗު ކުޅެ، ފްރެންޗް ލީގު ދެފަހަރު އަދި ފްރެންޗް ކަޕް ދެފަހަރު ކާމިޔާބު ކޮށްފައެވެ.

ޕީއެސްޖީ ދޫކޮށް ޑޭވިޑް ލުއިޒް ޗެލްސީއާ އަލުން ގުޅުނީ 2016 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް 105 މެޗު ކުޅެދީފައެވެ.

ބްރެޒިލް ގައުމީ ޓީމާއެކު 2013 ވަނަ އަހަރު ފީފާ ކޮންފެޑެރޭޝަންސް ކަޕް ކާމިޔާބު ކޮށްފައިވާ ޑޭވިޑް ލުއިޒް ވަނީ އެޓީމަށް 56 މެޗު ކުޅެފައެވެ.