ޓޮޓެންހަމް އިން ޔުވެންޓަސްގެ ޑިބާލާއަށް 70 މިލިއަން ޕައުންޑް ދޭން ތައްޔާރު

ޔުވެންޓަސްއަށް ކުޅެމުންއަންނަ އާޖެންޓީނާގެ ފޯވާޑް ޑިބާލާ ގަތުމަށް 70 މިލިއަން ޕައުންޑް ދޭން ޓޮޓެންހަމް އިން އޮތީ ތައްޔާރަށް ކަމަށް މީޑިއާ ރިޕޯޓްތައް ބުނެފިއެވެ.

މީޑިއާ ރިޕޯޓްތައް ބުނާ ގޮތުން ޑިބާލާ ކުރިއަށް އޮތް ސީޒަނުގައި ފެނިގެންދާނީ އިނގިރޭސި ކްލަބަކުން ކަމަށާއި މެންޗިސްޓާ ޔުނައިޓެޑްގެ އިތުރުން ޓޮޓެންހަމް އިން އޮތީ ޑިބާލާ ގަތުމަށް ތައްޔާރަށް ކަމަށެވެ. އެގޮތުން ޓޮޓެންހަމް އިން 70 މިލިއަން ޕައުންޑްގެ ބިޑެއް ވަނީ ހުށަހަޅައިފައެވެ.

މީޑިއާ ރިޕޯޓްތައް ބުނާ ގޮތުން ޔުވެންޓަސް އިން ވަނީ 70 މިލިއަން ޕައުންޑަށް ޑިބާލާ ޓޮޓެންހަމް އަށް ވިއްކާލުމަށް އެއްބަސްވެފައެވެ.

ޔުވެންޓަސް އިން 25 އަހަރުގެ ޑިބާލާ ވިއްކާލުމަށް ތައްޔާރުވަމުންދާއިރު ޑިބޭލާ ގަތުމަށް ޔޫރަޕްގެ ބޮޑެތި ކްލަބް ތަކުން އަންނަނީ ޝައުގުވެރިކަން ފާޅުކުރަމުންނެވެ. އެގޮތުން މެންޗިސްޓާ ޔުނައިޓެޑް، ޓޮޓެންހަމްގެ އިތުރުން ރެއާލުން ވަނީ ޑިބޭލާ އަށް ޝައުގުވެރިކަން ފާޅުކޮށްފައެވެ.

ޔުވަންޓަސްއާ 2015 ވަނަ އަހަރު ގުޅުނު ޑިބާލާ ހޯދުމަށް ޔުނައިޓެޑްގެ އިތުރުން ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ސްޕެއިންގެ ޗެމްޕިއަން ބާސެލޯނާ އާއި އިންޓަ މިލާންވެސް ހިމެނެއެވެ.

ޔުވެންޓަސްއާ އެކު ޑިބާލާ ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، ރިޕޯޓްތައް ބުނާގޮތުން އޭނާ ހުރީ އެހެން ކްލަބަކަށް ބަދަލުވާން ތައްޔާރަށެވެ.

ޔުވަންޓަސް އަށް މިހާތަނަށް ކުޅުނު 191 މެޗުގައި 80 ލަނޑު ކާމިޔާބުކޮށްފައިވާ ޑިބާލާ ވަނީ އެ ކްލަބާ އެކު ތިން އިޓާލިއަން ލީގު، ތިން ކޮޕާ އިޓަލިއާ އަދި އެއް އިޓާލިއަން ސުޕާ ކަޕް ކާމިޔާބުކޮށްފައެވެ. އާޖެންޓީނާ ގައުމީ ޓީމަށް 24 މެޗު ކުޅެފައިވާ ޑިބާލާ ވަނީ މިދިޔަ ދެ ސީޒަނުގައި ވެސް އިޓަލީ ލީގުގެ ޓީމް އޮފް ދަ އިޔާގައި ހިމެނިފައެވެ.