އިންޑިއާގައި 14 އަހަރުން ދަށުގެ ކުޅުންތެރިންނަށް އަމާޒުކޮށްގެން ބޭއްވި އިންޓަނޭޝަނަލް ކަޕް ޖޯއިގައި ބެންގަލޫރު ބަލިކޮށް ރާއްޖޭގެ މާޒިޔާ ޗެމްޕިއަންކަން ހޯދައިފިއެވެ.

އާދީއްތަ ދުވަހު ކުޅުނު ފައިނަލް މެޗު ބެންގަލޫރާ ވާދަކޮށް މާޒިޔާއިން މެޗު ކާމިޔާބުކުރީ ފަހަތުން އަރާ 1-3 ގެ ނަތީޖާއަކުންނެވެ.

މުބާރާތުގެ ފައިނަލަށް މާޒިޔާ ދަތުރުކުރީ ވަރުގަދަ ޗެންނާއިންއާ ދެކޮޅަށް ކުޅުނު މެޗު ފަހަތުން އަރާ 1-2 ގެ ނަތީޖާއަކުން ކާމިޔާބުކޮށްގެންނެވެ.

މުބާރާތުގެ ގްރޫޕް ސްޓޭޖުގައި މާޒިޔާ ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށްފައިވާއިރު، އެޓީމު ބަލިވީ އެންމެ މެޗަކުންނެވެ. މުޅި މުބާރާތުގައި މާޒިޔާއިން ވަނީ މޮޅު ކުޅުމެއް ދައްކާފައެވެ.

މުބާރާތުގައި މާޒިޔާގެ އިތުރުން 11 ޓީމެއް ވާދަކުރާއިރު، މުބާރާތް ކުޅުނީ ތިން ގްރޫޕަކަށް ބަހާލައިގެންނެވެ. މުބާރާތުގައި މާޒިޔާއަށް އިރުޝާދު ދީފައިވަނީ މުހައްމަދު އާރިފް (އާރިއްޕެ) އެވެ.

މިއީ މި މުބާރާތް ބާއްވާތާ ތިންވަނަ ފަހަރަށްވާއިރު، މިއީ މުބާރާތުގައި ރާއްޖޭގެ އެކަޑަމީއަކުން ބައިވެރިވި ފުރަތަމަ ފަހަރުކަން ފާހަގަ ކޮށްލެވެއެވެ. މުބާރާތުގައި އިންޑިއަން ސުޕަ ލީގު އަދި ބޮޑެތި ފުޓުބޯޅަ އެކަޑަމީތަކުން ވެސް ބައިވެރިވެއެވެ.