3 ހަފްތާގެ ތެރޭގައި "ސުޕަރ 30" އަށް 132.61 ކުރޯޑް އިންޑިއަން ރުޕީސް

ބޮލީވުޑްގެ މަޝްހޫރު ފިލްމީ ތަރި ރިތިކް ރޯޝަންގެ ފިލްމް "ސުޕަރ 30" އިން ތިން ހަފްތާގެ ތެރޭގައި 132.61 ކުރޯޑް އިންޑިއަން ރުޕީސް ވަނީ ލިބަފައެވެ.

ހުކުރު ދުވަހު ފިލްމަށް ލިބުނު 96 ލައްކަ އިންޑިއަން ރުޕީސްއާއެކު ފިލްމަށް ލިބޭ އާމްދަނީ ކުރިއަށް އޮތް ހަފްތާ ބަންދުގެ ތެރޭގައި އިތުރުވެގެން ދާނެ ކަމަށް ބޮލީވުޑްގެ ޓްރޭޑް އެނަލައިސްޓްއެއް ކަމަށްވާ ތަރަން އަދާޝް ވަނީ ބުނެފައެވެ.

ފިލްމު ޕްރިމިއަރ ކުރި ދުވަހު ފިލްމަށް ވަނީ 11 ކުރޯޑް އިންޑިއަން ރުޕީސް ލިބިފައެވެ.

"ސުޕަރ 30" އަކީ ފަގީރު ކުދި ބަޔަކަށް ކިޔަވާދީ އިންޑިއަން އިންސްޓިޓިއުޓް އޮފް ޓެކްނޮލޮޖީގެ އެންޓްރޭނސް އެގްޒާމަށް އެ ކުދިން ތައްޔާރުކުރުމުގެ މަސައްކަތްކުރާ "މެތަމެޓިޝަން" އެއް ކަމަށްވާ އާނަންދު ކުމާރުގެ ހަޔާތުގެ މައްޗަށް ބިނާކޮށް ހަދާފައިވާ ފިލްމެކެވެ. ފިލްމުގައި ރިތިކް ރޯޝަން ފެނިގެންދާނީ އާނަންދުގެ ރޯލުންނެވެ.

މި ފިލްމަށް ވަނީ ބެލުންތެރިންގެ ވަރަށް ގިނަ ފާޑު ކިއުންތައް އަމާޒުވެފައެވެ.

ވިކާސް ބާލް ޑައިރެކްޓު ކޮށް ނަޑިއަށްވަލާ ގްރޭންޑްސަން އެންޓަރޓެއިންމެންޓް، ފެންޓޮމް ފިލްމްސް އެންޑް ރިލައެންސް އެންޓަރޓެއިންމެންޓް އިން ޕރޮޑިސްކޮށްފައިވާ މި ފިލްމުން އަރަމުންއަންނަ ތަރި މްރޫނަލް ތާކޫރް ވެސް ފެނިގެން ދާނެއެވެ.