އާދިއްތަ ދުވަހުގެ ފަތިހުގެ ވަގުތެއްގައި އަދީބު ރާއްޖެއަށް ގެނެވޭނެ

ފިއްލަވައިގެން އިންޑިއާއަށް ވަޑައިގެންނެވި ކުރީގެ ނައިބު ރައީސް އަހުމަދު އަދީބު، އާދިއްތަ ދުވަހުގެ ހެނދުނުގެ ވަގުތެއްގައި ރާއްޖެއަށް ގެނެވޭނެކަމަށް މައުލޫމާތު ލިބިއްޖެއެވެ.

ދިވެހި ފުލުހުންގެ ހަވާލުގައި އަދީބު ރާއްޖެއަށް ފޮނުވާލާފައިވަނީ، އިންޑިއާއިން ސިޔާސީ ހިމާޔަތައް އެދިފައިވަނިކޮށެވެ. އިންޑިއާގެ ވިއޯން ނޫހަށް މައުލޫމާތުދިން އިންޑިއާގެ އޮފިޝަލަކު ވިދާޅުވީ، އަދީބު ޑީޕޯޓްކޮށްލީކީއެއް ނޫންކަމަށާއި، އޭނާ އިންޑިއާއަށް އެތެރެވިޔަނުދީ ފޮނުވާލީ ކަމަށެވެ. އަދި އަދީބު އެއްވެސް އިރެއްގައި ހައްޔަރުކޮށްފައި ނުވާކަމަށް ވެސް އިންޑިއާގެ އޮފިޝަލް މައުލޫމާތު ދެއްވާފައިވެއެވެ.

އަދީބު އަނބުރާ ރާއްޖެއަށް ފޮނުވާލާފައިވަނީ އޭނާ އިންޑިއާއަށް އެތެރެވާން މަސައްކަތްކުރެއްވި ޓަގްބޯޓުގައެވެ. އަދީބު ފިއްލެވިގޮތުގެ ތަހުގީގުކުރިއަށް ގެންދިޔުމަށް އޭނާ ދަތުރުކުރި ޓަގްބޯޓުގެ ފަޅުވެރިންވެސް އަނބުރާ ފޮނުވާލާފައިވާކަމަށްވެސް އިންޑިއާގެ ނޫސްތަކުން ވަނީ ރިޕޯޓްކޮށްފައެވެ. އެބޯޓުގެ ފަޅުވެރިންގެ ގޮތުގައި ތިބީ އިންޑިނޭޝިއާގެ އަށް މީހަކާއި އިންޑިއާގެ އެކަކެވެ.

ދިވެހި ފުލުހުންގެ ޓީމެއް އަދީބާ ސުވާލުކުރުމަށް އިންޑިއާއަށް ގޮސްފައިވަނީ ހުކުރު ދުވަހުގެ ރޭގަނޑުގެ ވަގުތެއްގައެވެ. އަނބުރާ ރާއްޖެއަށް އައުމުގެ ދަތުރު ފަށާފައިވަނީ ހޮނިހިރު ދުވަހުގެ ފަތިހުގެ ވަގުތެއްގައެވެ.