ސުޕްރީމް ކޯޓުން އަމަރު ނެރެދިންނަމަ އަދީބު ހުންނާނީ ހައްޔަރުގައި: ބިޝާމް
ފުލުހުން ދަނީ އަދީބް ގެނައުމުގެ މަސައްކަތް ކުރަމުން
އަހުމަދު އަދީބް
ޅ. މާބިން ހުރާ މައްސަލާގައި ކުރީގެ ނައިބް ރައީސް އަހުމަދު އަދީބް ހައްޔަރު ކުރަން ސުޕްރީމް ކޯޓުގައި އެދުނު އަމުރު ދިންނަމަ އެމަނިކުފާނަށް ނުފިއްލެވޭނެ ކަމަށް ޕްރޮސިކިއުޓާ ޖެނެރަލް (ޕީޖީ) އައިޝަތު ބިޝާމް ވިދާޅުވެއްޖެއެވެ.
ރާއްޖެއިން އިންޑިއާ އަށް ދިޔަ ޓަގު ބޯޓެއްގައި ފިއްލަވައިގެން އަދީބު ވަނީ އިންޑިއާގެ ޓޫޓްކުރިން އަށް ގޮސްފައެވެ. އޭނާ މިހާރު ހުރީ އިންޑިއާގެ ފުލުހުން ބެލުމުގެ ދަށުގައެވެ.
ޕީޖީ ބިޝާމް ރާއްޖެ.އެމްވީ އަށް ވިދާޅުވީ، ޅ. މާބިން ހުރާގެ މައްސަލަގައި ސުޕްރީމް ކޯޓަށް އިލްތިމާސްކުރިއިރު ދެ އަމުރަކަށް އެދިވަޑައިގެންފައިވާ ކަމަށެވެ.
އޭގެތެރެއިން އެއް އަމުރަކީ ޅ. މާބިން ހުރާ މައްސަލާގައި ސުޕްރީމް ކޯޓުން ގޮތެއް ކަނޑައަޅަން ދެން އަދީބު ބަންދުގައި ބެހެއްޓުމުގެ އަމުރާއި، ޕާސްޕޯޓް ހިފެހެއްޓުމުގެ އަމުރެވެ. ކޯޓު އަމުރާއި އެކު އިމިގްރޭޝަނުން ވަނީ އެމަނިކުފާނުގެ ޕާސްޕޯޓް ހިފަހައްޓާފައެވެ. އަދީބް އަތުގައި ސައްހަ އެއްވެސް ޓްރެވެލް ޑޮކިއުމެންޓެއް ނެތް ކަމަށް އިމިގްރޭޝަނުން ވަނީ ހުކުރު ދުވަހު ކަށަވަރު ކޮށްދީފައެވެ. ބިޝާމް ވިދާޅުވީ، ސުޕްރީމް ކޯޓުން އަމުރު ނެރެން ޕީޖީން އެދުނީ އަދީބު ފިއްލަވަފާނެ ސަބަބަކަށް ވެދާނެތީ ކަމަށެވެ.
ފުލުހުން ދަނީ އެކުވެރި ގައުމުތަކާ ގުޅިގެން އަދީބު ރާއްޖެއަށް ގެނައުމުގެ މަސައްކަތް ކުރަމުންނެވެ. އަދި އަދީބު ފިއްލުވުމުގައި އެހީތެރިވި މީހުންގެ މައްސަލަ ތަހުގީގުކޮށް އެ ބަޔަކަށް ގާނޫނުގައިވާގޮތުގެމަތިން އަޅަން ޖެހޭ ފިޔަވަޅުތައް އަޅާނެ ކަމަށް ފުލުހުން ވަނީ ބުނެފައެވެ.
