ގިނަ އަދަދެއްގެ މަސްތުވާތަކެތި ހިފައިގެން މުދާ އުފުލާ ދޯންޏަކުން ރާއްޖެތެރެ ރަށަކަށް ދިއުމަށް ފުރަން އުޅުނު މީހަކު ފުލުހުން ހުއްޓުވައިފިއެވެ.

ފުލުހުން ބުނީ މި މީހާ ހުއްޓުވާފައިވަނީ ބުދަ ދުވަހުގެ 19:45 ހާއިރު ގިނަ އަދަދެއްގެ މަސްތުވާތަކެތި ހިފައިގެން، ޓީ ޖެޓީގައި އޮތް މުދާ އުފުލާ ދޯންޏަކުން ރާއްޖެތެރެ ރަށަކަށް ދިއުމަށް މީހަކު ފުރަން އުޅޭ ކަމަށް ޕޮލިސް އިންޓެލިޖެންސަށް ލިބުނު މައުލޫމާތަކާއި ގުޅިގެން ކަމަށެވެ.

ޑްރަގް އެންފޯރސްމެންޓް ޑިޕާޓްމެންޓްގެ ފުލުހުންނާއި ޕޮލިސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި މައުލޫމާތު ލިބުނު މީހާ ޓީ ޖެޓީ ތެރޭގައި ހުއްޓާ ފުލުހުންގެ ބެލުމުގެ ދަށަށް ގެންދެވިފައިވާ ކަމަށްވެސް ފުލުހުން ބުނެފައިވެއެވެ.

40 އަހަރުގެ އެ ފިރިހެން މީހާގެ ހަށިގަނޑު ބަލާފާސްކުރުމުގެ ތެރޭގައި އޭނާ ލައިގެން ހުރި ޖިންސުގެ ވައާތު ފަރާތުގެ ކުރިމަތި ޖީބުން، މަސްތުވާތަކެތި ކަމަށް ޝައްކު ކުރެވޭ 1 ރަބަރު ޕެކެޓް ފެނިފައި ވާކަމަށް ފުލުހުން ބުނެފައިވެއެވެ.

މީގެ އިތުރުން، ފުލުހުން ބުނެފައިވަނީ އޭނާގެ ކޮންޑުގައި އަޅުވާފައި ހުރި ދަބަސް ބަލާފާސް ކުރި ކުރުމުގައި މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި 4 ޕެކެޓާއި 1 ކޮތަޅު ފެނިފައިވާކަމަށެވެ. އެހެންކަމުން އޭނާގެ އަތުން ފެނިފައިވާ މަސްތުވާތަކެތީގެ ވަގުތީ ބަރުދަނަކީ 80 ގްރާމެވެ.

ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.