މާމެންދޫގައި ހުރި ނައްތާނުލެވޭ ކުނި ރަށުން ބޭރުކުރުމުގެ މަސައްކަތް ފަށައިފި
1 އޯގަސްޓު 2019 | ބުރާސްފަތި 02:45ދަގަނޑާ ޕްލާސްޓިކް ހިމެނޭ މިކުނިތަކުގައި 400 ޓަނު ހިމެނޭ
މާމެންދޫއިން ބޭރުކުރެވޭ ކުނިތައް
ލ.މާމެންދޫގެ ވޭސްޓް މެނޭޖްމެންޓް ސެންޓަރުގައި އެއްކުރެވިފައިވާ ނައްތާނުލެވޭ ކުނި ރަށުން ބޭރުކުރުމުގެ އަމަލީ މަސައްކަތް ފަށައިފިއެވެ.
ރާއްޖެއެމްވީއަށް މައުލޫމާތުދެމުން މާމެންދޫ ކައުންސިލްގެ ނައިބް ރައީސް ހުސެއިން ހަބީބު ވިދާޅުވީ ވޭސްޓް މެނޭޖްމެންޓް ސެންޓަރުގައި އެއްކުރެވިފައިވާ ނައްތާނުލެވޭ ކުނި ރަށުން ބޭރުނުކުރެވި ގިނަ ދުވަސްތަކެއް ވެފައިވާ ކަމަށެވެ. ނަމަވެސް ސަރުކާރުގެ އެހީތެރިކަމާއި، ގިނަ ބައެއްގެ އެއްބާރުލުމާއެކު މިކުނިތައް ރަށުން ބޭރުކުރުމުގެ އަމަލީ މަސައްކަތް އާދިއްތަ ދުވަހު ފެށިފައިވާ ކަމަށެވެ.
ހަބީބު ވިދާޅުވީ ދަގަނޑާ ޕްލާސްޓިކް ހިމެނޭ މިކުނިތަކުގައި 400 ޓަނު ހިމެނޭނެ ކަމަށެވެ.
ހަބީބު ވިދާޅުވީ 2015 އިން ފެށިގެން ކައުންސިލުން ގެންދިޔައީ ގޭގެއިން ކުނިނަގައިގެން ވޭސްޓް މެނޭޖްމެންޓް ސެންޓަރަށް ގެނެސް ދަގަނޑު ޕްލާސްޓިކް ފިޔަވައި އެހެނިހެން ކުނި ނައްތާލުމުގެ މަސައްކަތް ކުރަމުންނެވެ. އާންމު އުސޫލުން ކުނި އުކުމުގެ އިންތިޒާމް ހަމަޖެފައި އޮންނަނީ ގޭބިސީއަކުން 100 ރުފިޔާ، ސަރުކާރުގެ މުއައްސަސާތަކުން 200 ރުފިޔާ، އެހެނިހެންތަންތަނުން 100 ރުފިޔާ މަހަކު ކައުންސިލްއަށް ދައްކަން ޖެހޭ ގޮތަށް ކަމަށް އޭނާ ވިދާޅުވިއެވެ.
ނައްތާނުލެވޭ ކުނި ރަށުން ބޭރުކުރުމުގެ ޕްރޮޖެކްޓަކީ ޔޫއެންޑީޕީއިން ލާމު އަތޮޅުގައި ކުރިއަށް ''ލޯ އެމިޝަން ކްލައިމެޓް ރެސިލިއެންޓް ޑިވެލޮޕްމެންޓް'' ޕްރޮޖެކްޓްގެ ތެރެއިން ކައުންސިލުން ޕްރޮޕޯސަލް ހުށަހަޅައި ކާމިޔާބުކޮށްފައިވާ މަގޭ މާމެންދޫ ސާފު މާމެންދޫ ޕްރޮޖެކްޓެވެ.
