ފީފާ އިން ހޮވާ މޮޅު ކުޅުންތެރިޔާގެ އެވޯޑަށް ވާދަކުރާ 10 ކުޅުންތެރިން އިއުލާންކޮށްފި

ފީފާއިން ހޮވާ ދުނިޔޭގެ އެންމެ މޮޅު ފިރިހެން ފުޓުބޯޅަ ކުޅުންތެރިޔާއަށް ވާދަކުރާ 10 ކުޅުންތެރިންގެ ނަންތައް އިއުލާންކޮށްފިއެވެ.

މޮޅު ކުޅުންތެރިޔާއަށް ވާދަކުރާ 10 ކުޅުންތެރިންގެ ތެރޭގައި މިދިޔަ ސީޒަނުގެ ޔުއެފާ ޗެމްޕިއަންސް ލީގު ކާމިޔާބުކުރި ލިވަޕޫލްގެ މުހައްމަދު ސަލާހު އާއި ސާޑިއޯ މާނޭ އަދި ވެން ޑައިކް ވަނީ ހިމެނިފައެވެ.

މި ތިން ކުޅުންތެރިންގެ އިތުރުން މިދިޔަ ޗެމްޕިއަންސް ލީގުން ވިދާލި އަޔަކްސްގެ ފްރެންކީ ޑިޔޯންގ އާއި މަތައިސް ޑެލައިޓްވެސް ވަނީ މޮޅު 10 ކުޅުންތެރިންގެ ތެރޭގައި ހިމެނިފައެވެ.

މީގެއިތުރުން ޓޮޓެންހަމް ހޮޓްސްޕާގެ ހެރީ ކޭން އާއި ރެއާލް މެޑްރިޑްގެ އެޑެން ހަޒާޑް އާއި ޕީއެސްޖީގެ ކީލިއަން އެމްބާޕޭ އާއި ބާސެލޯނާގެ ލިއޮނެލް މެސީ އަދި ޔުވެންޓަސްގެ ކްރިސްޓިއާނޯ ރޮނާލްޑޯވެސް ވަނީ މޮޅު 10 ކުޅުންތެރިންގެ ތެރޭގައި ހިމެނިފައެވެ.

މި 10 ކުޅުންތެރިންގެ ތެރެއިން މި ސީޒަނަށް ހަޒާޑް އޭނާގެ ކުރީގެ ކްލަބް ޗެލްސީ ދޫކޮށް ރެއާލް މެޑްރިޑަށް ބަދަލުވެފައިވާއިރު، ޑެލައިޓް ވަނީ އަޔަކްސް ދޫކޮށް ޔުވެންޓަސްއަށް ބަދަލުވެފައެވެ. އަދި ޑިޔޮންގ ވަނީ އަޔަކްސް ދޫކޮށް ބާސާއަށް ބަދަލުވެފައެވެ.

މި އަހަރުގެ ފީފާ މޮޅު ކުޅުންތެރިޔާ އިއުލާން ކުރުމަށް ހަމަޖެހިފައިވަނީ ސެޕްޓެމްބަރ މަހުގެ 23 ވަނަ ދުވަހު އިޓަލީގެ މިލާނުގައެވެ. އޭގެ ކުރިން 10 ކުޅުންތެރިން ތިން ކުޅުންތެރިންނަށް ޝޯޓް ލިސްޓު ކުރާނެއެވެ.

މިދިޔަ އަހަރު ފީފާގެ މޮޅު ކުޅުންތެރިޔާއަށް ހޮވުނު ލޫކަ މޮޑްރިޗް މިފަހަރު މޮޅު 10 ކުޅުންތެރިންގެ ތެރޭގައިވެސް ހިމެނިފައެއް ނުވެއެވެ.