ޖޫން މަހުގެ ކުރިން ދިވެހިރާއްޖެ ކޮމަންވެލްތްގެ ފުރިހަމަ މެންބަރަކަށް ވާނެ: ޝާހިދު
ކޮމަންވެލްތްގައި ރާއްޖެ ބައިވެރި ވުމުގެ މަސައްކަތް ހަލުވި ކަމާއިއެކު ކުރިއަށްދާ ކަމަށް ވިދާޅުވި
ފޮރިން މިނިސްޓަރ އަބްދުﷲ ޝާހިދު
އަންނަ އަހަރުގެ ޖޫން މަހުގެ ކުރިން ދިވެހިރާއްޖެ ކޮމަންވެލްތްގެ ފުރިހަމަ މެންބަރު ގައުމަކަމަށް ވާނެ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ހޯރަފުށީ ދާއިރާގެ މެންބަރު އަހުމަދު ސަލީމް ކުރެއްވި ސުވާލަށް ޖަވާބު ދެއްވަމުން ޝާހިދު ވިދާޅުވީ ކޮމަންވެލްތާއި ރާއްޖެ ބައިވެރި ވުމުގެ މަސައްކަތް ހަލުވި ކަމާއިއެކު ކުރިއަށްދާ ކަމަށާއި އަންނަ އަހަރު ޖޫން މަހު ރުވާންޑާގެ ވެރިރަށް ކިގާލީގައި ބާއްވާ ޖަލްސާގެ ކުރިން ދިވެހިރާއްޖެ ކޮމަންވެލްތްގެ ފުރިހަމަ މެންބަރަކަށްވާނެ ކަމަށް އުއްމީދު ކުރައްވާ ކަމަށެވެ.
އަދި ދިވެހިރާއްޖޭގެ ދަރިވަރުންނަށް ބޭނުންވާ ސްކޮލާރޝިޕްތައް ކޮމަންވެލްތްގެ ތެރެއިން ލިބި، ދިވެހިރާއްޖޭގެ ޒުވާނުންނަށް ކުޅިވަރުގެ ދާއިރާއިން ލިބެންވާ ފުރުސަތުތަކާއި، ދިވެހިރާއްޖޭގެ ރައްޔިތުންގެ މަޖިލީހުގެ މެންބަރުން ކޮމަންވެލްތް ޕާލިމަންޓްރީ އެސޯސިއޭޝަންގައި ބައިވެރިވެވަޑައިގެން މަޖިލީހަށް ލިބެންޖެހޭ ފަސޭހަތަކާއި ލުއިތައް ލިބެންފަށާނެ ކަމަށް މިނިސްޓަރ ވިދާޅުވިއެވެ.
އެޕްރީލް މަހު ލަންކާގައި ހިނގި ބޮމުގެ ހާދިސާއާއި ގުޅިގެން ދިވެހި ދަރިވަރުންނަށް ވިސާ ލިބުމުގައި ދަތިތަކެއް ހުރުމުން އެކަމާއި ސްރީލަންކާ ސަރުކާރާއި ވާހަކަ ދައްކަވަމުންދާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިވަގުތު ސްރީލަންކާގައި އޮތީ ޚާއްސަ ހާލަތެއް ކަމަށާއި އެހާލަތް ދިވެހިން ހިތުގެ އަޑިން ގަބޫލުކުރަން ޖެހޭނެ ކަމަށެވެ.
މީގެ އިތުރުން މެދު ހެންވޭރު ދާއިރާގެ މެންބަރު އަލީ އާޒިމް ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ މިނިސްޓްރީން ކުރަމުންދާ ދަތުރުތަކަށް މިއަދުގެ ސަރުކާރުން މިހާތަނަށް ފޮރިން މިނިސްޓްރީގެ ބަޖެޓުން ޚަރަދު ކުރެވިފައިވަނީ 7.5 މިލިއަން ރުފިޔާ ކަމަށެވެ.
އެއާއި ޚިލާފަށް ރައީސް ޔާމީންގެ ސަރުކާރުން ފޮރިން މިނިސްޓްރީގެ ދަތުރު ތަކަށް އެއް އަހަރު ދުވަހުގެ ތެރޭގައި 27 މިލިއަން ރުފިޔާ ޚަރަދުކޮށްފައިވާކަންއެންގެން އޮތް ކަމަށް މިނިސްޓަރ ވިދާޅުވިއެވެ.
ދިވެހިރާއްޖޭގައި މިއަދު އޮތް ސަރުކާރަކީ ހުޅުވާލެވިގެން އަމަލުކުރަމުންދާ ސަރުކާރެއް ކަމަށާއި ކުރިން އޮތް ރައީސް ޔާމީންގެ ސަރުކާރަކީ އޮޅުވާލައިގެން ކަންހިނގާގޮތް ނޭނގި ކަންކަންކުރަމުން އައި ސަރުކާރެއް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މި ސަރުކާރުން ކުރާ ދަތުރުތަކާއި ބައްދަލު ކުރާބޭފުޅުންގެ މައުލޫމާތައް ހިއްސާކުރަމުންދާ ކަމަށެވެ.
