ދުވަސްވީ މައްސަލަތައް ބެލުމަށް ވަކި މުހުލަތެއް، އަމަލު ނުކުރާ ގާޒީންނަށް ސުލޫކީ މައްސަލައިގެ އިންޒާރު

ކްރިމިނަލް ކޯޓުގައި މިހާރު ހުރި ގިނަދުވަސްވީ މައްސަލަތައް ބެލުމަށް ވަކި މުހުލަތެއްދީ އެގޮތަށް އަމަލު ނުކުރާ ގާޒީންގެ ސުލޫކީ މައްސަލަ ބެލުމަށް ޖުޑީޝަލް ސަރވިސް ކޮމިޝަން (ޖޭއެސްސީ)ގެ ތިން މެންބަރުންގެ ކޮމިޓީއަކުން ދިރާސާކޮށް އެކުލަވައިލި ރިޕޯޓުގައި ލަފާދީފި އެވެ.

ކްރިމިނަލް ކޯޓުގައި ނުނިމި ހުރި މައްސަލަތަކާ ގުޅިގެން ޖޭއެސްސީއިން އެކުލަވާލި ރިޕޯޓުގައި އެ ކޯޓުގައި 10 އަރާ ތިން އަހަރަށް ވުރެ ގިނަ ދުވަސް ވެފައިވާ މައްސަލަތައް ތާވަލްކޮށް، ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާގޮތަށް މުޅި މައްސަލައިގެ ތާވަލެއް، މައްސަލައިގައި ހިމެނޭ ފަރާތްތަކަށް ދިނުމަށްފަހު 45 ދުވަސް ތެރޭ މައްސަލަ ނިމޭ ގޮތަށް ތާވަލް ކުރުމަށް ލަފާ ދީފައިވެއެވެ. އަދި ފަސް އަހަރަށްވުރެ ގިނަ ދުވަސް ވެފައިވާ މައްސަލަތައް 30 ދުވަހުގެ ތެރޭގައި ތާވަލުކޮށް މުޅި މައްސަލައިގެ ތާވަލެއް މައްސަލައިގައި ހިމެނޭ ފަރާތްތަކަށް ދިނުމަށް ވަނީ ބުނެފައެވެ.

Advertisement

ޖިނާއީ އިޖުރާއަތުގެ ގާނޫނަށް އަމަަލުކުރަން ފެށުމަށްފަހު އެކޯޓަށް ހުށައެޅިފައިވާ މައްސަލަތަކާއި ޖިނާއީ އިޖުރާއަތުގެ ގާނޫނުގައި ބަޔާން ކޮށްފައިވާގޮތަށް މުޅި މައްސަލައިގެ އަޑު އެހުމުގެ ތާވަލެއް ކޮންމެ މައްސަލައަކަށް ދިނުމަށް ވަނީ ހުށައަޅާފައެވެ.

މީގެ އިތުރުން މައްސަލަތައް ގާޒީންނާއި ހަވާލުކުރުމުގައި ހަމަހަމަ ކަމެއް ނެތްކަމަށާއި މައްސަލަތައް ބެހުމުގައި ހަރުދަނާ އުސޫލެއް ނެތި ބައެއް ގާޒީންނަށް ބުރަ ބޮޑުވާގޮތަށް ކަމަށް ވާތީ މައްސަލަތައް ހުށަހެޅޭ ހަމަހަމަ އުސޫލުން ބެހުމަށް އެންގުމަށް ވެސް ވަނީ ނިންމާފަ އެވެ. އެގޮތަށް އަމަލު ކުރުމަށް އެކޯޓުގެ ގާޒީންނަށް އިރުޝާދުދީ އެ މުއްދަތުގެ ތެރޭގައި އަމަލު ނުކުރާ ގާޒީންގެ ސުލޫކީ މައްސަލަ ބެލުމުގެ އިންޒާރު އެ ރިޕޯޓުގައި ވަނީ ދީފައެވެ.

ފަނޑިޔާރުންގެ ގާނޫނުގެ 29 ވަނަ މާއްދާގެ (ހ) އާއި 30 ވަނަ މާއްދާގެ (ހ) ގެ ދަށުން ފަނޑިޔާރުންނަށް ލާޒިމް ކޮށްފައިވާއިރު ގާނޫނުގައި ބަޔާންކޮށްފައިވާ ގޮތަށް ގާނޫނުގައި ބަޔާންކޮށްފައިވާ އިޖުރާއަތެއް ގަސްތުގައި އަމަލު ނުކުރުމަކީ ފަނޑިޔާރުންގެ ސުލޫކީ މިންގަނޑާއި ޚިލާފު ކަމެކެވެ.

ޖޭއެސްސީއިން ތައްޔާރު ކުރި ރިޕޯޓުގައިވާ ގޮތުން ޖިނާއީ އިޖުރާއަތުގެ ގާނޫނަށް އަމަލު ކުރަން ފެށުމުގެ ފަހުން އެ ގާނޫނުގައި ބަޔާން ކޮށްފައިވާ ގޮތަށް މައްސަލައިގެ ތާވަލު މައްސަލައިގައި ހިމެނޭ ފަރާތަށް ދީފައި ނުވާކަން ވަނީ ފާހަގަ ކޮށްފައެވެ.

ފަނޑިޔާރުންގެ ގާނޫނުގެ 55 ވަނަ މާއްދާގެ (ހ) އަށް ރިއާޔަތް ކޮށް އެ ރިޕޯޓުގައި ވަނީ ފަނޑިޔާރަކާއި މައްސަލަ ހަވާލު ކުރާ ދުވަހުން ފެށިގެން ހަ މަސް ދުވަހުގެ ތެރޭގައި އެ މައްސަލައެއްގެ ގޮތެއް ކަނޑައަޅާފައި ނުވާނަމަ އިސް ގާޒީއަށް އަންގަން ވާނެކަމަށް ބުނެފައިވީ ނަމަވެސް މައްސަލަތައް ލަސްވުން މޮނިޓަރ ކުރުމުގެ އިޖުރާއަތަށް އެ ކޯޓުން އަމަލު ކޮށްފައި ނުވާކަމަށެވެ. އަދި މައްސަލަތައް އަވަސްކުރުމަށް އިސް ގާޒީ މަސައްކަތް ކޮށްފައި ނުވާކަމަށް ވެސް އެ ރިޕޯޓުގައި ވެއެވެ. އެކަންކަން ރަނގަޅު ކުރުމަށް ކޯޓުގެ އިސް ގާޒީއަށް ދެންނެވުމަށް ރޕޯޓުގައި ވަނީ ލަފާ ދީފައެވެ.

ކްރިމިނަލް ކޯޓުގައި ނުނިމި ހުރި މައްސަލަތަކާ ދިގުލައިގެންދާ ކަމުގެ ޝަކުވާ ޖޭއެސްސީއަށް ހުށަހަޅަމުންދާތީ އެ ކޮމިޝަންގެ ތިން މެންބަރުންގެ ކޮމިޓީއަކުން ދިރާސާކޮށް އެކުލަވައިލި ރިޕޯޓު ރައްޔިތުންގެ މަޖިލިހަށް ވަނީ އަންގާރަ ދުވަހު ވަނީ ފޮނުވާފައެވެ. އެ ރިޕޯޓު އިތުރަށް ދިރާސާ ކުރަން މަޖިލީހުގެ ޖުޑިޝަރީ ކޮމިޓީއަށް މަޖިލީހުން ވަނީ މިހާރު ފޮނުވާފައެވެ.