އިސް މެޖިސްޓްރޭޓް ހަސަން ދީދީ ސަސްޕެންޑް ކުރަން ޖޭއެސްސީން ނިންމައިިފި
އެހެން ނިންމީ 49 ވަނަ ބައްދަލުވުމުގައި
ޖޭއެސްސީގެ މެމްބަރުންތަކެއް
ޖުޑީޝަލް ސަރވިސް ކޮމިޝަން (ޖޭއެސްސީ) އަށް ހުށައެޅިފައިވާ ޝަކުވާއަކާއި ގުޅިގެން ގދ. ކަނޑުހުޅުދޫގެ އިސް މެޖިސްޓްރޭޓް ހަސަން ދީދީ ސަސްޕެންޑުކުރަން ނިންމައިފިއެވެ.
ޖޭއެސްސީން ހޯމަ ދުވަހު ނެރެފައިވާ ބަޔާނެއްގައި ބުނީ، އެ ކޮމިޝަނަށް ހުށައަޅާފައިވާ ހަސަންގެ މައްސަލައިގެ ތަހުގީގު ވަކިގޮތަކަށް ނިމެންދެން ވަޒީފާއަށް ނުނިކުމެ މަޑުކުރުމަށް އޭނާ އަށް އެންގުމަށް އެ ކޮމިޝަންގެ 49 ވަނަ ބައްދަލުވުމުން ނިންމާފައިވާ ކަމަށެވެ. ނަމަވެސް ބަލަމުންދަނީ ކޮން މައްސަލައެއްކަން އެ ކޮމިޝަނުން ހާމައެއް ނުކުރައްވަ އެވެ.
އޭގެ އިތުރުން ހުޅުމާލޭ މެޖިސްޓްރޭޓް ކޯޓުގައި ވަގުތީ ގޮތުން މަސައްކަތްކުރައްވާ ހުސައިން ރަޝީދު ކުރިން މަސައްކަތް ކުރެއްވި ފުވައްމުލަކު މެޖިސްޓްރޭޓް ކޯޓަށް ބަދަލުކުރުމަށް ނިންމާފައިވާ ކަމަށް ޖޭއެސްސީން ބުންޏެވެ.
ޖޭއެސްސީން ބުނީ، ރަޝީދު އެ ކޯޓަށް ބަދަލުކުރި މަގްސަދު ހާސިލުވަމުން ނުދާކަމަށެވެ. އެހެން ކަމަށް އޭނާގެ މައްސަލަ ބަލަމުންދާ ކޮމިޓީ އަށް ފެންނާތީ، ހުޅުމާލޭ މެޖިސްޓްރޭޓް ކޯޓުގައި ވަގުތީ ގޮތުން މަސައްކަތްކުރެއްވުމަށް ނިންމި ނިންމުން ރިވިއުކޮށް އަންނަ މަހުގެ ހަތް ވަނަ ދުވަހުގެ އޭނާ އެ ކޯޓަށް ބަދަލުކުރުމަށް ވަނީ ނިންމާފައެވެ.
