ޗައިނާ ސަރުކާރުގެ އެހީގައި ފޮރިންގ މިނިސްޓްރީ މަރާމާތުކުރުމުގެ މަސައްކަތް ފަށަނީ
29 ޖުލައި 2019 | ހޯމަ 14:20ސޮއިކޮށްފައިވަނީ މިދިޔަ އަހަރުގެ ޑިސެމްބަރު މަހު
ހޯމަ ދުަވަހު ފޮރިން މިނިސްޓްރީގައި ބޭއްވި ރަސްމިއްޔާތުގެ ތެރެއިން
ޗައިނާ ސަރުކާރުގެ ހިލޭ އެހީގެ ދަށުން ފޮރިން މިނިސްޓްރީގެ އޮފީސް އިމާރާތް މަރާމާތު ކުރުމުގެ ޕްރޮޖެކްޓްގެ މަސައްކަތް ފެށުމަށް ތައްޔާރުވެއްޖެ އެވެ.
ހޯމަ ދުވަހު އެ މިނިސްޓްރީގައި ބޭއްވި ރަސްމިއްޔާތުގައި ރަސްމީކޮށް އެ މަސައްކަތް ފައްޓަވައިދެއްވީ ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ޒަންގް ލިޒޮންގް އެވެ. ފޮރިން މިނިސްޓަރު އަބްދުﷲ ޝާހިދުވެސް ބައިވެރިވެވަޑައިގެންނެވި އެ ރަސްމިއްޔާތުގައި ޗައިނާ އެމްބަސީގެ އިސް ބޭފުޅުންވެސް ބައިވެރިވެ ވަޑައިގެންނެެވިއެވެ.
މިނިސްޓްރީ އޮފް ފޮރިން އެފެއާޒްގެ އިމާރާތް މަރާމާތުކުރުމާ ގުޅޭގޮތުން ދިވެހި ސަރުކާރާއި ޗައިނާ ސަރުކާރުން ލެޓަރސް އޮފް އެކްސްޗޭންޖުގައި ސޮއިކޮށްފައިވަނީ ނިމިގެން ދިޔަ އަަހަރުގެ ޑިސެމްބަރު މަހުއެވެ.
ދިވެހިރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯ ފޮރިން އެފެއާޒް އަހުމަދު ހަލީލެވެ. ޗައިނާ ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ސަފީރު ޒަންގް އެވެ. އިމާރާތަކީ ދިވެހިރާއްޖެއާ ޗައިނާއާ ދެމެދު އޮތް ގާތް ގުޅުން ދައްކުވައިދޭނެ ރަމްޒެއްކަމުގައި ހަލީލް ވަނީ ވިދާޅުވެފައެވެ.
އެ އެއްބަސްވުމުގެ ދަށުން، މިނިސްޓްރީ އޮފް ފޮރިން އެފެއާޒްއަށް މިހާރު ކުރިމަތިވެފައިވާ ޖާގައިގެ ދަތިކަމަށް ހައްލެއް ހޯދުމަށް ހަމަޖެހިފައިވެއެވެ. މި މަސައްކަތް ނިމުމުން، މިނިސްޓްރީ އޮފް ފޮރިން އެފެއާޒުން ދިވެހިންނަށް ދެމުންގެންދާ ޚިދުމަތްތައް އިތުރަށް ހަރުދަނާ ވެގެންދާނެ ކަމަށް ފޮރިން މިނިސްޓްރީންވަނީ ބުނެފައެވެ.
