އެއަރ ކޮންޑިޝަނަރ އުފެއްދުމުގައި އިންޑިއާގައި ނަން މަޝްހޫރު ބްރޭންޑެއްކަމުގައިވާ ބްލޫސްޓަރ ބްރޭންޑުގެ އުފެއްދުންތަކަށް ހާއްސަކޮށް ސްޕްރިންގް ކޫލް ޝޯރޫމްގެ ނަމުގައި ޝޯރޫމެއް ހުޅުވައިފިއެވެ.

ސްޕްރިންގ ކޫލް ޕްރައިވެޓް ލިމިޓެޑްގެ މި ޝޯރޫމް ހުޅުވުމަށްޓަކައި އާދިއްތަ ދުވަހު ވަނީ ހާއްސަ ރަސްމިއްޔާތެއް ބާއްވަފައެވެ. މި ރަސްމިއްޔާތުގައި ބްލޫ ސްޓާރގެ ފަރާތުން އެ ކުންފުނީގެ ސީއީއޯ ދާއޫދް ބިން އުޒައިރު އާއި ސްޕްރިންގ ކޫލްގެ ޑައިރެކްޓަރ މުހައްމަދު އަހުސަން ބައިވެރިވެލެއްވިއިރު ބައެއް ޕްރޮޑަކްޓްތައް ވަނީ ދައްކާލާފައެވެ. އެގޮތުން، ބްލޫ ސްޓާރއިން ރިފްރިޖެރެންޓް އާރްފޯޓެންއޭ (R410A) އަކާއެކު ދާދި ފަހުން ޑިޒައިން ކޮށްފައިވާ ސްޕްލިޓް އޭސީ ވަނީ ދައްކާލާފައެވެ.

ޝޯރޫމް ހުޅުވައިދެއްވުމަށްފަހު ރާއްޖެ.އެމްވީއަށް މައުލޫމާތުދެއްވަމުން ބްލޫ ސްޓާރގެ ސީއީއޯ ދާއޫދް ބިން އުޒައިރު ވިދާޅުވީ އަލަށް އުފެއްދި އޭސީއަކީ ހާއްސަކޮށް ރާއްޖެފަދަ ހޫނު ގައުމުތަކަށް އުފެއްދި އޭސީއެއް ކަމަށެވެ.

މީގެ އިތުރުން ދާއޫދު ވިދާޅުވީ އެ އޭސީ އަކީ ތިމާވެއްޓާ ވަރަށް ރަހުމަތްތެރި އޭސީއެއް ކަމަށާއި މި އުފެއްދުމާއެކު ބްލޫ ސްޓާރގެ ރާއްޖޭގެ މާރކެޓް ޝެއަރ މަތިވެގެން ދާނެކަމަށް ގަބޫލު ކުރައްވާ ކަމަށެވެ. އަދި މިވަގުތު މާކެޓް ޝެއަރ އަކީ 10 އިންސައްތަ ކަމަށާ އެ ކުންފުނީގެ އަމާޒަކީ 20 އިންސައްތަ އަށް ނަމަވެސް ޝެއަރ މަތިކުރުން ކަމަށެވެ.

އަލަށް އުފެއްދި މި އޭސީ ރަސްމީކޮށް ލޯންޗުކުރުން އާދިއްތަ ދުވަހުގެ ރޭ ހޮޓެލް ޖެންގައި ބޭއްވުމަށް ވަނީ ހަމަޖެހިފައެވެ. އެ ރަސްމިއްޔާތުގައި ހާއްސަ ލަކީ ޑްރޯއެއްވެސް ނެގުމަށް ހަމަޖެހިފައިވާ ކަމަށް ބްލޫ ސްޓާރގެ ފަރާތުން މައުލޫމާތު ދީފައިވެއެވެ.

ސްޕްރިންގ ކޫލް ޕްރައިވެޓް ލިމިޓެޑްގެ ނަމުގައި އޮންލައިން ޕޭޖްއެއް މެދުވެރިކޮށް ރާއްޖޭގައި ކުރިންވެސް ދިޔައީ ބްލޫ ސްޓާރގެ އުފެއްދުންތައް ވިއްކަމުންނެވެ. އެކުންފުންޏަށް އާ ދިރުމެއް ލިބިގެން ގޮސްފައި މިވަނީ މި ޝޯރޫމް ހުޅުވުމުންނެވެ.

ބްލޫ ސްޓާރ އަކީ އޭސީގެ އިތުރުން، ރިފްރިޖެރޭޓަރ، އަދި ވޯޓަރ ކޫލަރ ފަދަ ޕްރޮޑަކްޓްތައް އުފެއްދުމުގައި އިންޑިއާގެ އިތުރުން ދުނިޔޭގެ ގިނަ ގައުމުތަކެއްގެ ތަރުހީބު ލިބިފައިވާ ކުންފުންޏެއްކަން ފާހަގަ ކޮށްލެވެއެވެ.