ކުޅުނު ހުރިހާ މެޗަކުން ވެސް ރާއްޖޭގެ 15 އަހަރުންދަށުގެ ފުޓުބޯޅަ ޓީމު ބަލިވެއްޖެ
28 ޖުލައި 2019 | އާދީއްތަ 03:41ރާއްޖެ ކޮޅަށް ވަނީ 15 ލަނޑު ވަދެފަ
މެޗުގެ ތެރެއިން
މިހާރު އައްޑޫ ސިޓީގައި ކުރިޔަށްދާ ޔޫއެފާ އަންޑަރ 15 ފުޓުބޯޅަ މުބާރާތުގައި ކުޅުނު ހުރިހާ މެޗަކުން ވެސް ރާއްޖޭގެ ޓީމުބަލިވެއްޖެއެވެ.
ރާއްޖެއިން ހޮނިހިރު ދުވަހު ކުޅުނު ފަހު މެޗުން ބަލިވީ ލެޓްވިއާ އާއި ކުޅުނު މެޗުންނެވެ. މި މެޗުގައި ލެޓްވިއާއިން ވަނީ ރާއްޖެ ކޮޅަށް ހަތް ލަނޑު ޖަހައިފައެވެ.
މެޗުގެ ފުރަތަމަ ހާފުގައި ލެޓްވިއާއިން ތިން ލަނޑު ކާމިޔާބުކުރިއިރު ދެވަނަ ހާފުގައި ލެޓްވިއާއިން ވަނީ ރާއްޖެ ކޮޅަށް ހަތަރު ލަނޑު ކާމިޔާބު ކޮށްފައެވެ. ލެޓްވިއާގެ ދެ ކުޅުންތެރިން ވަނީ މި މެޗުގައި ހެޓްރިކް ހަދައިފައެވެ. މެޗުގައި މޮޅު ކުޅުމެއް ދެއްކި ކްރިސްޓަލް ޕްލަޒޯވްގެ އިތުރުން ހެޓްރިކް ހެދީ މާކަސްއެވެ.
މި މެޗުންވި ބައްޔާއެކު ރާއްޖެއިން ވަނީ ކުޅުނު ހުރިހާ މެޗަކުން ބަލިވެފައެވެ. އަދި މި މުބާރާތުގައި ރާއްޖެ ކޮޅަށް 15 ލަނޑު ވަދެފައި ވާއިރު ރާއްޖެއަށް ކާމިޔާބު ކުރެވުނީ އެންމެ ލަނޑެކެވެ. ރާއްޖެއިން ޖެހި ހަމަ އެކަނި ލަނޑު ޖަހައިފައިވަނީ ބޫޓާނާއި ދެކޮޅަށެވެ.
މިމުބާރާތުގެ ފައިނަލަށް ލެޓްވިއާ ދަތުރުކޮށްފައި ވާއިރު ފައިނަލްގައި ލެޓްވިއާ ވާދަކުރާނީ ބޫޓާންއާއި ދެކޮޅަށެވެ.
މި މުބާރާތުގެ މެޗުތައް ކުޅެނީ އައްޑޫ ސިޓީ ފުޓުބޯޅަ ދަނޑުގައެވެ.
