ގާނޫނު އަސާސީގައި ވަކިވަކި ކައުންސިލަރުން ޒިންމާދާރުކުރެވޭނެ ގޮތެއް ނެތް: މިނިސްޓަރު އިމްރާން
27 ޖުލައި 2019 | ހޮނިހިރު 09:44ލާމަރުކަޒީ ނިޒާމު ހަރުދަނާ ކުރުމަށް ގިނަ މަސައްކަތްތައް ކުރަންޖެހޭ
ހޯމް މިނިސްޓަރު އަދި އެލްޖީއޭގެ ރައީސް ޝައިހް އިމްރާން އަބްދުﷲ
ގާނޫނު އަސާސީގައި ވަކިވަކި ކައުންސިލަރުން ޒިންމާދާރުކުރެވޭނެ ގޮތެއް ނެތް ކަމަށާއި، ލޯކަލް ގަވަރމެންޓް އޮތޯރިޓީން ކައުންސިލަރުންނަށް ޚާއްސަކޮށް އުސޫލު އެކުލަވާލީ ޒިންމާދާކުރުވުމަށް ކަމަށް ހޯމް މިނިސްޓަރު އަދި އެލްޖީއޭގެ ރައީސް ޝައިހް އިމްރާން އަބްދުﷲ ވިދާޅުވެއްޖެއެވެ.
ލާމަރުކަޒީ ކޮމެޓީއަށް މިނިސްޓަރު އިމްރާން ވިދާޅުވީ ކައުންސިލަރުންގެ ފަރާތުން ޒިންމާދާރު ގޮތުގައި އޮފީހަށް ނުނިކުތުމާއި، ސަލާމް ބުނުމާއި، ކުއްލިއަކަށް ޗުއްޓީއަށް ދިއުމާއި، ރައްޔިތުންނާއި ބައްދަލުނުކުރުން ފަދަ މައްސަލަތަކުގެ ޝަކުވާތައް ވަރަށް ގިނައިން އެލްޖީއޭއަށް ލިބިފައިވާ ކަމަށެވެ.
ލޯކަލް ގަވަރމެންޓް އޮތޯރިޓީން 28 ނޮވެންބަރު 2013ގައި ކައުންސިލަރުންގެ ސުލޫކީ މިންގަނޑުގެ ނަމުގައި އުސޫލެއް ކަނޑައަޅުއްވާ ގަވާއިދެއް ހައްދަވާފައިވާކަން ފާހަގަކޮށް މިނިސްޓަރު ވިދާޅުވީ އޭގެފަހުން 25 ޖުލައި 2016 ގައި ކައުންސިލުން ކުރާ ގާނޫނާ ހިލާފު އަމަލުތަކާއި އިސްލާހީ ފިޔަވަޅުތަކުގެ ދަރަޖައަށް އުސޫލު ކަނޑައަޅައި ގަވާއިދެއް ނެރުއްވާފައިވާ ކަމަށެވެ. އަދި އޭގެ މައްޗަށް ބިނާކޮށް އެކި ދުވަސްވަރުގައި ކައުންސިލަރުންނާ މެދުގައި ފިޔަވަޅު އެޅިގެންގޮސްފައިވާ ކަމަށް މިނިސްޓަރު އިމްރާން ވިދާޅުވިއެވެ.
މިނިސްޓަރު އިމްރާން ވިދާޅުވީ އެލްޖީއޭއިން އުސޫލުގައި ހަދަންޖެހުނީ ކައުންސިލަރުން ޒިންމާދާރުކުރެވޭނެ ގޮތެއް ނެތުމުން ކަމަށާއި، ގާނޫނެއް ވެސް ނެތް ކަމަށެވެ. އެހެންކަމުން ލާމަރުކަޒީ ނިޒާމު ހަރުދަނާ ކުރުމަށް މަސައްކަތް ކުރަން ޖެހޭކަން މިނިސްޓަރު ފާހަގަކުރެއްވިއެވެ.
