އެހެން ޤައުމުތަކުން އަދާކުރި މެހެމާންދާރީގެ ބަދަލު ދިނުމުގެ ވަގުތު އައިސް ޖެހިއްޖެ: ރައީސް ސޯލިހް
ރާއްޖޭގައި އިންޑިއަން އޯޝަން އައިލެންޑް ގޭމްސް ހޯސްޓް ކުރުމުކީ ލިބޭ ފަހުރެއް
ރައީސްގެ ދެކަނބަލުން އިންޑިއަން އޯޝަން އައިލެންޑް ގޭމްސް 2019 ހުޅުވުމުގެ ރަސްމިއްޔާތުގައި
އެހެން ޤައުމުތަކުން އަދާކުރި މެހެމާންދާރީގެ ބަދަލު ދިނުމުގެ ވަގުތު އައިސް ޖެހިއްޖެ ކަމަށް ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.
2023 ވަނަ އަހަރު ރާއްޖޭގައި އިންޑިއަން އޯޝަން އައިލެންޑް ގޭމްސް ރާއްޖޭގައި ބޭއްވުމުގެ ފުރުސަތު ލިބުމާއި ގުޅިގެން އެމަނިކުފާނު ކުރެއްވި ޓުވީޓެއްގައި ވިދާޅުވީ ރާއްޖެއިން މެދުނުކެނޑި 10 އަހަރު އިންޑިއަން އޯޝަން އައިލެންޑް ގޭމްސްގައި ބައިވެރިވެފައިވާ ކަމަށާއި ރާއްޖޭގައި އިންޑިއަން އޯޝަން އައިލެންޑް ގޭމްސް ހޯސްޓް ކުރުމަކީ ލިބިވަޑައިގެންނެވި ފަހުރެއް ކަމަށެވެ.
ރައީސް ސޯލިހް މިފަދައިން ޓުވީޓު ކުރައްވާފައިވާއިރު މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހްމަދު މަހްލޫފް ވިދާޅުވީ މިއީ ރާއްޖޭގެ ކުޅިވަރުގެ ތާރީހުގައި ލިބުނު ވަރަށް ބޮޑު ކާމިޔާބީއެއް ކަމަށާއި ރާއްޖޭގެ ކުޅުންތެރިން ދެން އޮންނަ ގޭމްސްއަށް ވަރަށް ރަނގަޅަށް ޓްރެއިން ކުރާނެ ކަމަށެވެ.
ރާއްޖޭގައި އިންޑިއަން އޯޝަން އައިލެންޑް ގޭމްސް ބޭއްވުމަށް ނިންމުމާއި ގުޅިގެން ގިނަ ބަޔަކު ދަނީ ޝޯޝަލް މީޑިއާގައި އެކަމަށް މަރުހަބާ ކިޔަމުންނެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވަނީ މި މުބާރާތް 2023 ވަނަ އަހަރު ރާއްޖޭގައި ބޭއްވުމަށް ވަރަށް ބޮޑު އަހައްމިޔަތު ކަމެއް ދެއްވާފައެވެ. އެގޮތުން ރައީސްގެ މަންދޫބުންގެ ގޮތުގައި ޖުލައި މަހުގެ ހަތްވަނަ ދުވަހުން ފެށިގެން ހާރިޖީ ވަޒީރު އަބްދުﷲ ޝާހިދުގެ އިތުރުން ކުޅިވަރާއި ބެހޭ ވަޒީރު އަހްމަދު މަހުލޫފް ވަނީ މުބާރާތުގައި ވާދަކުރާ ގައުމުތަކަށް ގޮސް އެ ގައުމުތަކުގެ އިސްވެރިންނާއި ބައްދަލުކުރައްވާ، އެ ގައުމުތަކުގެ ތާއީދު ހޯދުމަށް މަސައްކަތް ކުރައްވާފައެވެ.
