ރާއްޖޭގައި މިހާރު ހަދަމުންދާ ގިނަ އެއާޕޯޓުތައް މިއަހަރު ހުޅުވާނެ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.
މިނިސްޓަރު ނަހުލާ ވިދާޅުވީ ރާއްޖެ ތަރައްގީ ކުރުމަށް ކުރަމުންދާ މަސައްކަތުގެ ދަށުން މިއަހަރުގެ ގިނަ އެއަޕޯޓުތަކެއް ހުޅުވިގެންދާނެ ކަމަށެވެ. މިކަމުގެ ސަބަބުން ދަތުރުފަތުރުގެ ނިޒާމަށް ބޮޑު ލުޔެއް ލިބޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ނަހުލާ ވިދާޅުވީ މިއަހަރު ހުޅުވާ ހިދުމަތްދޭނީ މަޑިވަރު އެއާޕޯޓާއި، ކުޅުދުއްފުށީ އެއާޕޯޓާއި، ފުނަދޫ އެއާޕޯޓާއި، މާފަރު އެއާޕޯޓް އަދި މާވާރުލު އެއާޕޯޓު ކަމަށެވެ.
އެގޮތުން މި އަންނަ އީދުގެ ކުރިން ނުވަތަ އީދު ތެރޭގައި ކުޅުދުއްފުށީ އެއާޕޯޓާއި، ފުނަދޫ އެއާޕޯޓު ހުޅުވައި އާންމުންނަށް ޚިދުމަތްދެވޭނެ ކަމަށް އުންމީދުކުރައްވާ ކަމަށް މިނިސްޓަރު ނަހުލާ ވިދާޅުވިއެވެ. މިނިސްޓަރު ވިދާޅުވީ ހޯރަފުށީ އެއަރޕޯޓާއި ފަރެސްމާތޮޑާ އެއަރޕޯޓް އަންނަ އަހަރު ހުޅުވާނެ ކަމަށެވެ. މީގެ އިތުރުން މިނިސްޓަރު ނަހުލާ ވިދާޅުވީ މާފަރު އެއާޕޯޓް ސެޕްޓެމްބަރު މަސްތެރޭގައި ހުޅުވުމަށް މަސައްކަތް ކުރަމުން އަންނަ ކަމަށެވެ. އަދި މާވާރުލު އެއާޕޯޓާއި މަޑިވަރު އެއާޕޯޓް މިއަހަރު ނިމުމުގެ ކުރިން ހުޅުވާނެކަމުގެ ޔަގީންކަން މިނިސްޓަރު ދެއްވިއެވެ.
އެއާޕޯޓުގެ މަސައްކަތް ވަރަށް ބާރު ސްޕީޑްގައި ކުރިއަށްދާކަން ފާހަގަ ކުރައްވައި މިނިސްޓަރު ނަހުލާ ވިދާޅުވީ ވަރަށް ގާތުން މަސައްކަތްތައް ބަލަމުން އަންނަ ކަމަށާއި، ލަސްވާނަމަ އެމައްސަލައެއް ވެސް ބަލާ ކަމަށެވެ. އަދި މިހާރު ހަދަމުންދާ މާފަރު އެއާޕޯޓަށް އިތުރުކުރާ ބައިގެ މަސައްކަތުގެ އީއައިއޭގެ ރިޕޯޓްތައް ލިބުނުހާ އަވަހަކަށް ފެށޭނެ ކަމަށް ވެސް މިނިސްޓަރު ވިދާޅުވި އެވެ.
މިސަރުކާރުގެ ގައުމީ ތަރައްގީގެ ޕްލޭންގެ ދަށުން ރާއްޖެ ފަސް ސަރަހައްދަކަށް ބަހައި ކޮންމެ ސަރަހައްދެއްގައި ވެސް އިންޓަނޭޝަނަލް އެއަޕޯޓުތައް އެޅުމަށް ވަނީ ހަމަޖެހިފައެވެ. އެއާޕޯޓް ހުންނަ ކޮންމެ ރަށަކުން 20 މިނިޓް ތެރޭ މީހުން ދިރިއުޅޭ ރަށްރަށަށް ދަތުރުކުރެވޭ ގޮތަށް ހަދާނެ ކަމަށް ސަރުކާރުން މައުލޫމާތުދެއެވެ.
