"ބުޗަރ އޮފް ބެއިޖިންގ" ގެ ނަމުން މަޝްހޫރު ޗައިނާގެ ކުރީގެ ޕްރިމިއަރ ލީ ޕެންގ އަވަހާރަވެއްޖެ

ޓިއަންމެން ސްކްޔާގައި ހިންގި ޖަރީމާގައި އިސްކޮށް ހުންނެވި ކަމުގެ ތުހުމަތު ކުރެވޭ ޗައިނާގެ ކުރީގެ ޕްރިމިއަރ ލީ ޕެންގ އަވަހާރަވެއްޖެއެވެ.

"ބުޗަރ އޮފް ބެއިޖިންގ" ގެ ނަމުން މަޝްހޫރުވި ލީ އަވަހާރަވީ އާލާސްކަންފުޅާ އުޅުއްވުމަށް ފަހުގައި ކަމަށް އެ ގައުމުގެ ޒިންވާ ނޫސް އެޖެންސީން ރިޕޯޓް ކޮށްފައިވެއެވެ. ލީ ވަނީ ކުރިން ބްލެޑަރ ކެންސަރއަށް ފަރުވާ ހޯއްދަވާފައެވެ. އަވަހާރަވީ އިރު ލީ ގެ އުމުރުފުޅަކީ 90 އަހަރެވެ.

ޓިއަންމެން ސްކްޔާގައި ހިނގި އަމަލުތަކާ ގުޅިގެން ގިނަ ބަޔެއްގެ ނުރުހުން އޭނާއަށް އަމާޒުވެފައިވީ ނަމަވެސް، ލީ ވަނީ ޗައިނާގެ ކޮމިއުނިސްޓް ޕާޓީގެ ލީޑަރުކަން ގިނަ ދުވަސްތަކެއް ވަންދެން ކުރައްވާފައެވެ. 1989 ވަނަ އަހަރުގެ ތެރޭގައި ހިންގި ޖަރީމާގައި ލީ ވަނީ ޑިމޮކްރެސީއަށް އަޑު އުފުލާ ޓިއަންމަން ސްކުއާގައި ކުރިޔަށް ދިޔަ މުޒާހަރާތަކުގެ ބައިވެރިން އެތަނުން ދުރުކުރުމަށް ބާރުގެ ބޭނުންކޮށް އެތައް ބަޔަކު މަރާލާފައެވެ.

ޓިއަންމެން ސްކްޔާގައި ކުރިޔަށް ދިޔަ މުޒާހަރާތަކުގައި ގިނައިން ބައިވެރިވެފައިވަނީ ކިޔަވާކުދިންނާއި މަސައްކަތު މީހުންނެވެ. 1989 ވަނަ އަހަރުގެ މޭ މަހުގެ ތެރޭގައި ކުރަން ފެށި މުޒާހަރާތަކާއި ގުޅިގެން "މާޝަލް ލޯ" އިއުލާން ކުރެއްވުމަށް ފަހު، އެތަނުގައި ތިބި މީހުން ދުރުކުރުމަށް ބާރުގެ ބޭނުން ކޮށްފައިވަނީ ޖޫން މަހުގައެވެ. މިހަމަނުޖެހުންތަކުގައި އެތައް ސަތޭކަ ބަޔަކު މަރާލާފައިވާ ކަމަށް އެކި ފަރާތްތަކުން ތުހުމަތު ކޮށްފައިވެއެވެ.

ލީ ވަނީ ތަކުރާރުކޮށް އޭނާގެ އަމަލުތައް ދިފާއު ކުރައްވާފައެވެ. ލީ ވިދާޅުވީ އެއީ ކޮންމެހެން ކުރަން ޖެހިއްޖެ ކަމެއް ކަމަށާއި، އެދުވަހު އެނޫން ގޮތަކަށް ނިންމެވުނުނަމަ ކުރީގެ ސޯވިއެޓް ޔޫނިއަން އަދި އިރުމަތީގެ ޔޫރަޕުގެ ގައުމުތަކަށް ދިމާވި ހާލަތާ ކުރިމަތިލާން ޖެހުނީސް ކަމަށެވެ.