ނަޖީބަށް ފައިސާ ލިބުނީ ''ހަދިޔާ'' ގެ ގޮތުގައި

ކޮރަޕްޝަންގެ ތުހުމަތު ކުރެވިފައިވާ މޭލޭޝިޔާގެ ކުރީގެ ބޮޑު ވަޒީރު ނަޖީބް ރައްޒާކް އެކައުންޓަށް ބޭރު ގައުމުތަކުން ޖަމާވެފައިވާ ފައިސާ އަކީ ''ހަދިޔާގެ'' ގޮތުގައި އެމަނިކުފާނަށް ލިބިފައިވާ ފައިސާތަކެެއް ކަމަށް ކޯޓުގައި މީހަކު ހެކިބަސް ދީފިއެވެ.

ނަޖީބުގެ އެކައުންޓަށް 3 ފަހަރެއްގެ މަތިން ގާނޫނާއި ގަވާއިދާއި ހިލާފަށް ހޯދާފައިވާ 42 މިލިއަން ރިންގިޓް ވަނީ ޖަމާކޮށްފައެވެ. އެންމެ ފުރަތަމަ ފަހަރު 27 މިލިއަން ރިންގިޓް ޖަމާކުރިއިރު، ދެވަނަ ފަހަރު 5 މިލިއަން އަދި ފަހު ފަހަރު 10 މިލިއަން ރިންގިޓް ޖަމާކޮށްފައިވެއެވެ.

އެ ފައިސާ ޖަމާކޮށްފައިވަނީ 2014 ވަނަ އަހަރުގެ ފަހުކޮޅާއި، 2015 ވަނަ އަހަރުގެ ކުރީކޮޅުގައެވެ. އަދި ނަޖީބުގެ އެކައުންޓަށް ފައިސާ ޖަމާކޮށްފައިވަނީ އެސް.އާރް.ސީ އިންޓަރނޭޝަނަލް ކިޔާ ކުންފުންޏެއްގެ އެކައުންޓުންނެވެ. އެސް.އާރް.ސީ އިންޓަރނޭޝަނަލް އަކީ މެލޭޝިއާ ސަރުކާރުން އިންވެސްޓްމެންޓް މަސައްކަތްތަކެއް ކުރުމަށް އެކުލަވާލި މަޝްހޫރު ވަން އެމް.ޑީ.ބީ ކުންފުނީގެ ގޮތްޕެކެވެ.

އޭމް ބޭންކު ގްރޫޕުގެ ކުރީގެ ރިލޭޝަންޝިޕް މެނޭޖަރު ޖޮއާނާ ޔޫ ކުއަލަލަމްޕޫރް ކޯޓުގައި ހެކިބަސްދެމުން ބުނެފައިވަނީ ނަޖީބުގެ ތިން އެކައުންޓުތަކަށް 2011 އަހަރާއި 2015 ވަނަ އަހަރާ ދެމެދު ބޮޑު އަދަދެއްގެ ޓްރާންސެކްޝަން ތަކެއް ހިނގާފައިވާ ކަމަށެވެ.

އޭގެ ތެރޭގައި، ބޭރުގެފައިސާ އިން ފޮނުވާފައިވާ ޓްރާންސެކްޝަން ތަކެއްވެސް ހިމެނެއެވެ. ކޯޓުގައި ޔޫ ބުނީ، ނަޖީބުގެ އެކައުންޓަށް އެހާ ގިނަ ފައިސާ ޖަމާވެފައިވަނީ ކިހިނެއްތޯ އެސްއޭއަރްސީ އިންޓަނޭޝަނަަލް ސީއީއޯ އަރިހުން އަހާފައިވާ ކަމަށެވެ. ނަޖީބް އަށް ފައިސާ ލިބިފައިވަނީ '' ހަދިޔާ'' ގެ ގޮތުގައިކަން ސީއިއޯ އޭނާ ކައިރީ ބުނެފައިވާ ކަމަށް ޔޫ ވަނީ ބުނެފައެވެ.

މެލޭޝިއާގެ އިތުރުން ސިންގަޕޯރ، ސިވިޒަލެންޑް އަދި އެމެރިކާއިން ވެސް ވަން އެމް.ޑީ.ބީ އާއި ގުޅުން ހުރި މައްސަލަތައް ދަނީ ބަަލަމުންނެވެ. އެމެރިކާއިން އަންދާޒާކުރާ ގޮތުގައި ވަން އެމް.ޑީ.ބީގެ ފައިސާއިން 4.5 ބިލިއަން އެމެރިކާ ޑޮލަރަށް ވަނީ ޚިޔާނާތްތެރިވެފައެވެ.