ހޮނިހިރު 24 އޯގަސްޓު 2019
01 ފުރަ
1440 ޒުލްޙައްޖު 22
ފަތިސް 04:48
އިރުއަރާ 06:00
މެންދުރު 12:12
އަސްރު 15:22
މަޣްރިބް 18:17
އިޝާ 19:30
ކުޅިވަރު - އައިއޯއައިޖީ ގޭމްސް 2019

އައިއޯއައިޖީ ގޭމްސް 2019: ކުލަގަދަކޮށް ހުޅުވުމުގެ ރަސްމިއްޔާތު ބާއްވައިފި

  • މިފަހަރު ގޭމްސް ބާއްވަނީ މޮރިޝަސްގައި
  • ގޭމްސްގައި ޖުމްލަ ހަތް ގައުމަކުން ވާދަކުރޭ
  • ގޭމްސްގައި ރާއްޖެއިން 10 ކުޅިވަރެއްގައި ބައިވެރިވެ

ލީވާން އަލީ
MrLeevaan

ކ. މާލެ 19 ޖުލައި 2019 | ހުކުރު 20:16 5,646

އައިއޯއައިޖީ 2019 ގެ ހުޅުވުމުގެ ރަސްމިއްޔާތުގެ ތެރެއިން - އެމްއޯސީ

އިންޑިއަން އޯޝަން އައިލޭންޑް ގޭމްސް 2019 ގެ ހުޅުވުމުގެ ރަސްމިއްޔާތު ކުލަގަދަކޮށް މޮރިޝަސްގައި ބާއްވައިފިއެވެ.

ކޮންމެ ހަތަރު އަހަރަކުން އެއްފަހަރު ބާއްވާ މި ގޭމްސްގެ ހުޅުވުމުގެ ރަސްމިއްޔާތު ބާއްވާފައިވަނީ މޮރިޝަސްގެ އަންޖެލޭ ސްޓޭޑިއަމްގައެވެ. މި ރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިތުރުން ފޮރިންގ މިނިސްޓަރ އަބްދުﷲ ޝާހިދު އަދި ޔޫތު މިނިސްޓަރ އަހުމަދު މަހްލޫފް ވަނީ ބައިވެރިވެވަޑައިގެންފައެވެ.

މިފަހަރުގެ ގޭމްސްގައި ހަތް ގައުމަކުން ވާދަކުރެއެވެ. އެއީ ދިވެހި ރާއްޖެ އާއި މޮރިޝަސްގެ އިތުރުން ކޮމޯރަސް އާއި ރީޔޫނިއަން އާއި މަޑަކަސްކަރަ އާއި މަޔޯޓް އަދި ސީޝެލްސްއެވެ.

އައިއޯއައިޖީ 2019 ގެ ހުޅުވުމުގެ ރަސްމިއްޔާތުގެ ތެރެއިން

ގޭމްސްގެ ހުޅުވުމުގެ ރަސްމިއްޔާތު ހުކުރު ދުވަހު ހަވީރު ބޭއްވި ނަމަވެސް، ފުޓުބޯޅަ އިވެންޓު ބުރާސްފަތި ދުވަހު ވަނީ ކުރިޔަށް ގެންގޮސްފައެވެ. އަދި ސްވިމިންގްގެ ބައެއް އިވެންޓުތައް ހުކުރު ދުވަހު ވަނީ ކުރިޔަށް ގެންގޮސްފައެވެ.

ގޭމްސްގައި ރާއްޖެއިން 10 ކުޅިވަރެއްގައި ބައިވެރިވެއެވެ. އެއީ ފުޓުބޯޅަ، ބާސްކެޓް ބޯޅަ، ވޮލީބޯޅަ، ޓޭބަލް ޓެނިސް، އެތްލެޓިކްސް، ކައިޓް ސާފިންގް، ބެޑްމިންޓަން، ސެއިލިންގް، ސްވިމިންގް އަދި ޔޫތް ކޭމްޕެވެ.

ރާއްޖެއިން އަންނަނީ އިންޑިއަން އޯޝަން އައިލޭންޑް ގޭމްސްގައި ފެށުނީއްސުރެ ބައިވެރިވަމުންނެވެ. އެގޮތުން މިއީ ރާއްޖެއިން ގޭމްސްގައި ބައިވެރިވާ 10 ވަނަ ފަހަރެވެ.

އައިއޯއައިޖީ 2019 ގެ ހުޅުވުމުގެ ރަސްމިއްޔާތުގެ ތެރެއިން

ރާއްޖެއިން މިހާތަނަށް މި ގޭމްސްގައި އެއް ރަން މެޑަލް ހޯދައިފައި ވާއިރު، ހަތް ރިހި މެޑަލް ވަނީ ކާމިޔާބު ކޮށްފައެވެ. އަދި 14 ލޯ މެޑަލް ރާއްޖެއިން ވަނީ ހޯދާފައެވެ.

ރާއްޖެ އިން މި ގޭމްސްގައި ހޯދި ހަމައެކަނި ރަން މެޑަލް ކާމިޔާބުކުރީ ރާއްޖޭގެ އެންމެ ބާރު ދުވުންތެރިޔާ ހަސަން ސާއިދެވެ. އޭނާ މި މެޑަލް ކާމިޔާބުކުރީ 100 މީޓަރު ދުވުމުންނެވެ.

މިފަހަރުގެ ގޭމްސްއާ ރާއްޖެ ކުރިމަތިލާފައިވަނީ 15 މެޑަލް ކާމިޔާބުކުރުމުގެ އަޒުމުގައެވެ. 2015 ވަނަ އަހަރު ބޭއްވި ގޭމްސްގައި ރާއްޖެއިން ނުވަ މެޑަލްއަށް ޓާގެޓްކުރިއިރު، ލިބިފައިވަނީ 8 މެޑަލްއެވެ. އެއީ ފަސް ލޯ މެޑަލް އާއި ދެ ރިހި މެޑަލް އަދި އެއް ރަން މެޑަލްއެވެ.

ރާއްޖެއިން ވަނީ 2023 ވަނަ އަހަރު އޮންނަ އިންޑިއަން އޯޝަން އައިލޭންޑް ގޭމްސް ރާއްޖޭގައި ބޭއްވުމަށް ބިޑު ކޮށްފައެވެ.

އެންމެ ފަހުން އަޕްޑޭޓް ކުރީ: 1 މަސްކުރި | ރިވިއު ކުރީ: އަބުދުﷲ ނަސީރު އިބްރާހިމް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 9110099 ނަންބަރަށް ގުޅުއްވާ.

ކޮމެންޓް