މިއުޒިކާއި ނެށުން ފަރިތަކުރާނެ ޖާގަ އޮލިމްޕަހުން ދޫކުރުމަށް ނިންމައިފި
އޮލިމްޕަހުން ޖާގަ ދޫކުރުމަށް ނިންމާފައިވަނީ ދިވެހި ފަންނުވެރިންނަށް ފަރިތަކުރުމުގެ ފުރުސަތު ހޯދައިދިނުމުގެ މަޤްސަދުގައި
ފިލްމީ ފަންނާނުންގެ ފޯރަމްގެ ތެރެއިން
މިއުޒިކާއި ނެށުން ފަރިތަކުރާނެ ޖާގަ އޮލިމްޕަހުން ދޫކުރުމަށް ނެޝެނަލް ސެންޓަރ ފޮ ދި އާޓްސް އިން ނިންމައިފިއެވެ.
ނެޝެނަލް ސެންޓަރ ފޮ ދި އާޓްސް އިން ނެރުނު އިއުލާނެއްގައި ބުނެފައިވަނީ ދިވެހި ފަންނުވެރިންނަށް ފަރިތަކުރުމުގެ ފުރުސަތު ހޯދައިދިނުމުގެ މަޤްސަދުގައި އެ ސެންޓަރުން ނެށުންތެރިންނާއި ސަޤާފީ، ޒަމާނީ މިއުޒިކް ގްރޫޕްތަކާއި ސޯލޯ މިއުޒިޝަނުންނަށް އޮލިމްޕަހުގައި ފަރިތަކުރާނެ ކޮޓަރި ދޫކުރުމަށް ހަމަޖެހިފައިވާ ކަމަށެވެ.
ފަރިތަކުރާނެ ކޮޓަރި ދޫކުރުމަށް ހަމަޖެހިފައިވަނީ ޖުލައި 22 ވަނަ ދުވަހުން ފެށިގެން ރަސްމީ ދުވަސްތަކުގައި 13:30 އިން 16:00 އަދި 20:30 އިން 22:30 ގެ އިތުރުން ހޮނިހިރު ދުވަހުގެ 16:00 އިން 18:00 އަށް އަދި 20:30 އިން 22:30 ކަމަށް އެ ސެންޓަރުން ބުންޏެވެ. ފަރިތަކުރާނެ ކޮޓަރި ބޭނުންވާ ފަރާތްތަކުން އެ ސެންޓަރުގެ ފަންނުވެރިންގެ ދަފްތަރުގައި ރަޖިސްޓްރީ ކުރުމަށްފަހު، ފަރިތަކުރާނެ ކޮޓަރި ހޯދުމަށް އެދޭ ފޯމް ހުށަހެޅުމަށް ނެޝެނަލް ސެންޓަރ ފޮ ދި އާޓްސް އިން ވަނީ އެދިފައެވެ.
ފޯމްތައް އެ ސެންޓަރުގެ ރިސެޕްޝަނުންނާއި ވެބްސައިޓުން ލިބެން ހުންނާނެ ކަމަށް އެ ސެންޓަރުން މައުލޫމާތުދެއެވެ.
