ޔޫރަޕިއަން ކޮމިޝަނަށް ފުރަތަމަ ފަހަރަށް އިންތިހާބުވެ ވަޑައިގެންނެވި އަންހެން ރައީސާ, އަރސަލާ ވޮންޑަ ލެޔެން އަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ތަހުނިޔާގެ މެސެޖެއް ފޮނުއްވައިފިއެވެ.

މީގެ ކުރިން ޖަރުމަނުވިލާތުގެ ފުރަތަމަ އަންހެން ޑިފެންސް މިނިސްޓަރުކަންވެސް ކުރައްވާފައިވާ އުމުރުން 60 އަހަރުގެ އަރސަލާ އެ މަގާމަށް ހޮވިވަޑައިގެންނެވީ އެ ކޮމިޝަންގެ މެމްބަރުންގެ ސުޕަ މެޖޯރިޓީންނެވެެ.

ރައީސް ސޯލިހު ފޮނުއްވެވި މެސެޖުގައި އެމަނިކުފާނު ވަނީ އީޔޫ އިން ރާއްޖޭގެ ދެމެހެއްޓިނިވި ތަރައްގީއަށްޓަކައި, އިޖްތިމާއީ އަދި އިގްތިސަދީ ގޮތުން ދެމުންގެންދާ އެއްބާރުލުން ފާހަގަކުރައްވައި ދިވެހި ސަރުކާރާއި، ރައްޔިތުންނާ އަދި އެމަނިކުފާނުގެ އަމިއްލަ ނަންފުޅުގައި، ޝުކުރު އަދާކުރައްވާފައިވެއެވެ.

އެކަމަނާގެ ރައީސްކަމުގެ ދައުރުގައި ޔޫރަޕިއަން ޔޫނިއަނާއި ރާއްޖޭގެ ގުޅުން ކުރިޔަށް އޮތް ދުވަސްތަކުގައި އިތުރަށް ބަދަހިވެގެންދާނެކަމަށް އުއްމީދު ކުރައްވާ ކަމުގައިވެސް ރައީސްގެ މެސެޖުގައި ވިދާޅުވެފައިވެއެވެ.

ޖަރުމަނުގެ ޗާންސެލާ އެންހެލާ މާކެލްއާ ގާތްގުޅުމެއް އޮންނަ އަރސަލާ ވަނީ މީގެ ކުރިން ޖަރުމަނު ސަރުކާރުގެ ގިނަ މަގާމުތަކެއް ފުރުއްވާފައެވެ. އޭގެ ތެރޭގައި، ލޭބާ މިނިސްޓަރުގެ ފެޑެރަލް މިނިސްޓަރުގެ މަގާމުވެސް ހިމެނެއެވެ. އެކަމަނާ ވަނީ ޖަރުމަނުގެ ގާނުނޫ ހަދާ މަޖިލީސް، ބުންޑަސްޓާގްގެ މެމްބަރުކަންވެސް ކުރައްވާފައެވެ.