އިންޑިއަން އޯޝަން އައިލޭންޑް ގޭމްސްގައި ރީޔޫނިއަން އަތުން 0-4 ގެ ނަތީޖާއިން ރާއްޖޭ ގައުމީ ފުޓުބޯޅަ ޓީމު ބަލިވި މެޗުގައި މައްސަލަ ދިމާވީ ކައިކައިރީގައި ދެ ލަނޑު ވަނުމުން ކަމަށް ގައުމީ ކޯޗު ޕީޓަރ ސެގާޓް ބުނެފިއެވެ.

މެޗަށް ފަހު ނޫސްވެރިންނަށް މައުލޫމާތު ދެމުން ސެގާޓް ބުނީ، މެޗުގެ ފުރަތަމަ 30 ވަރަކަށް މިނެޓު ރާއްޖެއިން ކުޅުނީ ވަރަށް ބޮޑަށް ފޯކަސް ކޮށްގެން ކަމަށާއި، ފުރަތަމަ ލަނޑު ވަން ހިސާބުން ފޯކަސް ގެއްލުނު ކަމަށެވެ. އަދި ދެވަނަ ލަނޑުވެސް އެހާ ކައިރީގައި ވަނީ އެ ސަބަބާހުރެ ކަމަށް އޭނާ ވަނީ ބުނެފައެވެ.

ސެގާޓް ބުނީ، ހަ މަހަށް ފަހު އަނބުރާ ފޯމަށް އަންނަން ޓީމަށް އުނދަގޫވާނެ ކަމަށާއި، މުބާރާތަށް ރާއްޖެއިން އެކަށީގެންވާ ވަރަށް ތައްޔާރުވެވިފައިނުވާ ކަމަށެވެ.

ރީޔޫނިއަންއަކީ ރާއްޖެއަށް ވުރެ ވަރުގަދަ ޓީމެއްކަން ފާހަގަކުރަމުން ސެގާޓް ބުނީ، އެޓީމުގެ ކުޅުންތެރިން ރާއްޖޭގެ ކުޅުންތެރިންނަށް ވުރެ އިސްކޮޅުން ދިގުވެފައި، ހަށިގަނޑުން ވަރުގަދަ ކަމަށެވެ.

ނަމަވެސް ސެގާޓް ބުނީ، ރީޔޫނިއަންއާ ދެކޮޅަށް ކުޅުނުއިރު އެ ގައުމުގެ ކުޅުންތެރިން ހަށިގަނޑުން ބޮޑުވުމުން ރާއްޖޭގެ ކުޅުންތެރިން ޖެހިލުންވިކަން ފާހަގަކުރެވުނު ކަމަށާއި، ވަރަށް ގިނަ ޕާސްތައް ގެއްލުވާލި ކަމަށެވެ. އަދި އެކަން ބަދަލުކޮށް ރަނގަޅު ފުޓުބޯޅައެއް ކުޅެން ޖެހޭ ކަމަށް ވެސް އޭނާ ބުނިއެވެ.

މުބާރާތުގައި ރާއްޖެއިން ބޭނުން ކުރަނީ ޒުވާން ކުޅުންތެރިންކަން ފާހަގަކުރަމުން ސެގާޓް ބުނީ، އޭގެ ސަބަބުން އެ ކުޅުންތެރިން ކުރިއަރަން ފަސޭހަވާނެ ކަމަށެވެ.

މުބާރާތުގައި ރާއްޖެ ކުޅޭ ދެވަނަ މެޗުގައި ހޮނިހިރު ދުވަހު ނިކުންނާނީ މެޔޯޓްއާ ދެކޮޅަށެވެ.