ޓްރާންސްޕޯޓް މިނިސްޓްރީގެ ބަހެއް ލިބުމާއެކު މާލޭގައި ބަހުގެ ޚިދުމަތް ދޭން ފެށޭނެ: އެމްޓީސީސީ
މި މަޝްރޫއު ގެ ދިރާސާތައްކޮށް އެ ޓްރާންސްޕޯޓް މިނިސްޓްރީއާ ވަނީ ހިއްސާ ކޮށްފަ
މީގެ ކުރިން އެމްޓީސީސީ އިން ބޭއްވި ނޫސްކޮންފަރެންސް އެއް
މާލޭގައި ބަހުގެ ޚިދުމަތް ޓްރާންސްޕޯޓް މިނިސްޓްރީއިން ހުއްދަ ލިބުމާއެކު ފެށޭނެ ކަމަށް މޯލްޑިވްސް ޓްރާންސްޕޮޓޭޝަން އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އިން ބުނެފިއެވެ.
އެމްޓީސީސީ އިން ބުރާސްފަތި ދުވަހު ބޭއްވި ނޫސް ކޮންފަރެންސް ގައި ބުނެފައިވަނީ، މި މަޝްރޫއު ގެ ދިރާސާތައްކޮށް އެ ޓްރާންސްޕޯޓް މިނިސްޓްރީއާ ހިއްސާ ކޮށްފައިވާނެ ކަމަށެވެ.
ތިމާވެއްޓަށް ގެއްލުން ނުވާފަދަ އުޅަނދުތައް ބޭނުން ކުރުމަކީ ސަރުކާރުގެ ވަރަށް ބޮޑު އިލްތިމާސެއްކަމުން މާލޭގައި ދުއްވާ ބަސްތައް ވެގެންދާނީ "އިލެކްޓްރިކް ބަސް" ކަމަށް ވެސް ބުނެފައިވެއެވެ.
މި މަޝްރޫއު ގެ ދަށުން ގެނެވޭނެ ބަސްތަކަކީ 20 ފޫޓުގެ ބަސްތަކެއް ކަމަށާއި ކޮންމެ ބަހެއްގައި 16 މީހުންނަށް ދަތުރު ކުރެވޭނެ ކަމަށް ބުނެފައިވެއެވެ.
އެމްޓީސީސީއިން ބުނީ ބަސް ދުއްވަން ފެށުމުން މާލޭގެ ޓްރެފިކްއަށާއި ޕާކިންގް އަށް ވަރަށް ބޮޑެތި ބަދަލުތަކެއް ގެންނަން ޖެހޭނެކަމަށެވެ.
އެމްޓީސީސީއިން އެ ކުންފުނީގެ ޚިދުމަތްތައް ފުޅާ ކުރުމުގެ ގޮތުން މ. އަތޮޅާއި ފ. އަތޮޅުގެ އިތުރުން ދ. އަތޮޅުގައި ވެސް ފެރީގެ ޚިދުމަތްތައް ފެށުމަށްޓަކައި ޓްރާންސްޕޯޓް މިނިސްޓްރީއާއި މަޝްވަރާ ކުރެވިފައިވާ ކަމަށާއި މި ހަފްތާތެރޭގައި ވެސް ޚިދުމަތްދޭން އެ ކުންފުނިން ތައްޔާރުވެފައިވާ ކަމަށް ވެސް ނޫސް ކޮންފަރެންސް ގައި ބުނެފައިވެއެވެ.
އެމްޓީސީސީއިން މިހާރުވެސް ދަނީ 169 ރަށަކަށް ޚިދުމަތް ދެމުންނެވެ.
