ސުޕްރީމް ކޯޓަށް ދެ ފަނޑިޔާރުން އިތުރު ކުރުމުން އަހަރަކަށް 7.9 މިލިއަން ރުފިޔާ އަރާ
އެ ބިލް ހުށައެޅީ ސަރުކާރުގެ ފަރާތުން މެދު ހެންވޭރު ދާއިރާގެ މެމްބަރު އަލީ އާޒިމް
ސުޕްރީމް ކޯޓުގައި މިވަގުތު ތިއްބެވި ފަސް ފަނޑިޔާރުން
ސުޕްރީމް ކޯޓަށް ދެ ފަނޑިޔާރުން އިތުރު ކުރުމުން އަހަރަކަށް 7.9 މިލިއަން ރުފިޔާ އަރާ ކަމަށާއި އެޚަރަދު ކުޑަ ކުރެވިދާނެ ގޮތްތައް ކަނޑައަޅައި ދިނުމަށް ފިނޭންސް މިނިސްޓްރީއަށް ހުށައަޅުއްވާފައިވާނެ ކަމަށް ހެންވޭރު ހުޅަނގު ދާއިރާގެމެމްބަރު ހަސަން ލަތީފު ވިދާޅުވެއްޖެއެވެ.
ބުދަ ދުވަހު އޮތް މަޖިލީހުގެ ޖަލްސާގައި ސަރުކާރުގެ ފަރާތުން މެދު ހެންވޭރު ދާއިރާގެ މެމްބަރު އަލީ އާޒިމް ހުށައެޅުއްވި ކޯޓުތަކުގެ ގާނޫނަށް ގެނައި އިސްލާހާއި ގުޅޭގޮތުން ވަނީ ބަހުސް ކޮށްފައެވެ.
އެބިލަށް ބަހުސް ކުރުމުގެ ކުރިން ޖުޑީޝަރީ ކޮމިޓީއިން ވަނީ އެބިލް ދިރާސާ ކޮށްފައެވެ. ޖުޑީޝަރީ ކޮމިޓީގައި ވެސް ހިމެނިވަޑައިގަންނަވާ ހަސަން ލަތީފު ވިދާޅުވީ ފަނޑިޔާރުންގެ އަދަދު ފަސް ފަނޑިޔާރުން ހަތް ފަނޑިޔާރަށް ބަދަލުކުރާއިރު އެކަމަށް ދާނެ ޚަރަދު ވެސް ކޮމިޓީއިން ވިސްނި ކަމަށެވެ. އެގޮތުން ދެ ފަނޑިޔާރުން އިތުރު ކުރުމުން ދާނެ ޚަރަދާއި ބެހޭގޮތުން ފިނޭންސް މިނިސްޓްރީއަށް ސިޓީ ފޮނުވި ކަމަށާއި ސިޓީގެ ޖަވާބުގައި އެކަމަށް ދާނެ ޚަރަދެއްގެ ގޮތުގައި ހިމަނާފައިވަނީ 7.9 މިލިއަން ރުފިޔާ ކަމަށް އޭނާ ވިދާޅުވިއެވެ. ނަމަވެސް ދައުލަތުގެ ބަޖެޓުން އެހާވަރުގެ ބޮޑު އަދަދެއް ޚަރަދު ކުރާއިރު އެއަށްވުރެ ލުއި ގޮތެއް ހޯދުމަށް ކޮމިޓީއަށް ފެންނަ ކަމަށް ނިންމައި، ޚަރަދު ކުޑަކުރެވޭނެ ގޮތްތައް ކަނޑައަޅައި ފަނޑިޔާރުންނަށް ދާނެ ޚަރަދު އަލުން ފޮނުވައި ދެއްވުމަށް އެދި ފިނޭންސް މިނިސްޓްރީއަށް ސިޓީ ފޮނުވާފައިވާނެ ކަމަށް ހަސަން ލަތީފު ވިދާޅުވިއެވެ.
ސުޕްރީމް ކޯޓަށް ހަތް ފަނޑިޔާރުން އައްޔަން ކުރުމަކީ ތާއީދު ކުރައްވާކަމެއް ކަމަށް ވިދާޅުވެ ހަސަން ލަތީފު ވިދާޅުވީ ޚަރަދު ކުޑަކުރަން ފިނޭންސް މިނިސްޓްރީއަށް ފޮނުވުން ފަނޑިޔާރުންގެ އިނާޔަތްތަކާއި ގަދަރާއި އުނިކަމެއް އަންނާނެކަމެއް ކަމެއް ނޫން ކަމަށެވެ. އަދި ފިނޭންސް މިނިސްޓްރީން ފޮނުވި ސިޓީގައި ދެ ފަނޑިޔާރުންނަށް ޚަރަދުވާނެ ކަމަށް ކަނޑައެޅި ވަރަށްވުރެ ލުއިގޮތްތައް އެބައޮތްކަމަށާއި އެއަށްވުރެ ކުޑަކޮށް ޚަރަދު ކުޑަކުރެވޭނެކަން އެނގެން އޮތް ކަމަށް ވިދާޅުވިއެވެ.
2010 ވަނަ އަހަރުގެ ޑިސެމްބަރު މަހުން ފެށިގެން ރާއްޖޭގެ އުއްތަމަ ފަނޑިޔާރަށް މުސާރައިގެ ގޮތުގައި 73،125 ރުފިޔާ ލިބިލައްވައެވެ. އަދި ކާރުކޮޅު، މެޑިކަލް އިންޝިއުރެންސްގެ ގޮތުގައި 12،500 ރުފިޔާ މުސާރައިގެ އިތުރުން ލިބިލައްވައެވެ. މީގެ އިތުރުން ސުޕްރީމް ކޯޓުގެ ކޮންމެ ފަނޑިޔާރަކަށް މުސާރައިގެ ގޮތުގައި 70،000 ރުފިޔާ އަދި ކާރުކޮޅު، މެޑިކަލް އިންޝިއުރެންސްގެ ގޮތުގައި 12،500 ރުފިޔާ މުސާރައިގެ އިތުރުން ލިބިލައްވައެވެ.
އާ ގާނޫނު އަސާސީގެ ދަށުން އެކުލަވާލެވުނު ސުޕްރީމް ކޯޓުގައި ފުރަތަމަ ތިއްބެވީ ވެސް 7 ފަނޑިޔާރުންނެވެ. ނަމަވެސް 2014 ވަނަ އަހަރުގެ ޑިސެމްބަރުގައި ކޯޓުތަކަށް ގެނައި އިސްލާހާއެކު ފަނޑިޔާރުންގެ އަދަދު ފަހަކަށް ބަދަލުކޮށް އުއްތަމަ ފަނޑިޔާރާއި އެކު ފަސް ފަނޑިޔާރުން ތިއްބަވާ ގޮތަށް ބަދަލު ކުރިއެވެ.
