އާދީއްތަ 17 ނޮވެންބަރު 2019
04 ނޮރަ
1441 ރަބީއުލް އައްވަލް 20
ފަތިސް 04:36
އިރުއަރާ 05:51
މެންދުރު 11:55
އަސްރު 15:15
މަޣްރިބް 17:51
އިޝާ 19:06
ކުޅިވަރު - އެންޓޯނިއޯ ގްރިޒްމަން

އެންމެ ފަހުން ބާސާއިން ގްރިޒްމަންގެ ސޮއި ހޯދައިފި

  • ގްރިޒްމަން ބާސާއަށް ސޮއިކުރީ 120 މިލިއަން ޔޫރޯއަށް

ލީވާން އަލީ
MrLeevaan

ކ. މާލެ 13 ޖުލައި 2019 | ހޮނިހިރު 18:28 1,936

އެންޓޯނިއޯ ގްރިޒްމަން - ޓްވިޓަރ

އެންމެ ފަހުން އެޓްލެޓިކޯ މެޑްރިޑަށް ކުޅެމުން އައި ފްރާންސްގެ ފޯވާޑް އެންޓޯނިއޯ ގްރިޒްމަން ބާސެލޯނާއަށް ސޮއިކޮށްފިއެވެ.

ގްރިޒްމަން ބާސާއަށް ސޮއިކުރިކަން އެ ކްލަބުން ކަށަވަރުކޮށްދީފައިވާއިރު، އޭނާ ސޮއިކުރީ 120 މިލިއަން ޔޫރޯއަށް 2024 ގެ ނިޔަލަށް ކަމަށް ބާސާއިން ބުނެއެވެ.

ގްރިޒްމަންގެ ރިލީޒް ފީއަކަށް 800 މިލިއަން ޔޫރޯ ހަމަޖައްސާފައިވާއިރު، މިއީ ބާސާގެ ކެޕްޓަން ލިއޮނެލް މެސީގެ ރިލީޒް ފީއަށްވުރެވެސް ބޮޑު އަދަދެކެވެ. މެސީގެ ރިލީޒް ފީއަކީ 700 މިލިއަން ޔޫރޯއެވެ.

ގްރިޒްމަން ބާސާއަށް ސޮއިކޮށްފައިވަނީ އޭނާ ހޯދުމަށް ގިނަ ކްލަބްތަކުން މަސައްކަތް ކުރަމުން އައި ދަނޑިވަޅެއްގައެވެ. އޭގެ ތެރޭގައި ޖަރުމަން އަދި އިޓަލީގެ ކްލަބްތައްވެސް ހިމެނެއެވެ.

ގްރިޒްމަން އޭނާގެ ކެރިޔަރު ފެށީ 2009 ވަނަ އަހަރު ރެއާލް ސޮސައިޑާޑް އިންނެވެ. އޭނާ އެޓްލެޓިކޯ އަށް ބަދަލުވީ 2014 ވަނަ އަހަރެވެ. އެގޮތުން އޭނާ ވަނީ އެޓްލެޓިކޯގައި މިހާތަނަށް ހޭދަކުރި ފަސް ސީޒަނުގައި އެ ކްލަބަށް ކުޅުނު 257 މެޗުގައި 133 ލަނޑު ކާމިޔާބު ކޮށްފައެވެ.

އެޓްލެޓިކޯއާ އެކު ޔުއެފާ ޔޫރޮޕާ ލީގު، ޔުއެފާ ސުޕާކަޕް އަދި ސްޕެނިޝް ސުޕާކަޕް ކާމިޔާބު ކޮށްފައިވާ ގްރިޒްމަން ވަނީ އެ ކްލަބުގައި އަމިއްލަ ގިނަ ރެކޯޑްތައް ވެސް ހަދާފައެވެ.

ލަލީގާގެ އެންމެ މޮޅު ކުޅުންތެރިޔާގެ މަގާމު 2016 ވަނަ އަހަރު ހޯދާފައިވާ ގްރިޒްމަން ވަނީ ހަމަ އެ އަހަރު ބެލޮންޑޯ އެވޯޑުގެ ތިންވަނަ ފަހަރު ހޯދާފައެވެ. އަދި އޭނާ ވަނީ މިދިޔަ އަހަރު ބެލޮންޑޯ އެވޯޑުގެ ތިންވަނަ ވެސް ހޯދާފައެވެ.

ފްރާންސް ގައުމީ ޓީމާއެކު މިދިޔަ އަހަރު ރަޝިއާގައި ބޭއްވި ފީފާ ވޯލްޑް ކަޕް ކާމިޔާބު ކޮށްފައިވާ ގްރިޒްމަން ވަނީ 2010 ވަނަ އަހަރު ފްރާންސްގެ 19 އަހަރުން ދަށުގެ ޓީމާއެކު ޔޫރޯ ވެސް ކާމިޔާބު ކޮށްފައެވެ. އޭނާ ވަނީ ގައުމީ ޓީމަށް މިހާތަނަށް ކުޅުނު 70 މެޗުގައި 29 ލަނޑު ކާމިޔާބު ކޮށްފައެވެ.

އެންމެ ފަހުން އަޕްޑޭޓް ކުރީ: 4 މަސް ކުރިން | ރިވިއު ކުރީ: އަބުދުﷲ ނަސީރު އިބްރާހިމް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.

ކޮމެންޓް