ޝަހީދު ހުސައިން އާދަމްގެ ހަނދާނުގައި ކުޅުދުއްފުށީގައި ކަލްޗަރަލް ސެންޓަރެއް
ރ. އަގޮޅިތީމުގައި ވެސް ކަލްޗަރަލް ސެންޓަރެއް ގާއިމް ކުރާނެ
ޝަހީދު ހުސައިން އާދަމް
1988 ވަނަ އަހަރު ރާއްޖެއަށް ދިން އުދުވާނީ ހަމާލާގައި ޝަހީދުވެވަޑައިގެންނެވި, ޝަހީދު ހުސެއިން އާދަމް ވެވަޑައިގެންނެވި ގުރުބާނީތަކުގެ އަގު ވަޒަން ކުރުމުގެ ގޮތުން އޭނާގެ އުފަން ރަށް ކުޅުދުއްފުށީގައި ކަލްޗަރަލް ސެންޓަރެއް ގާއިމްކުރުމަށް ސަރުކާރުން ނިންމައިފި އެވެ.
ހުސެއިން އާދަމް ޝަހީދުވެވަޑައިގެންނެވީ ހ. ހާޖާރަގެ އަބްދުﷲ ލުތުފީ އިސްކޮށް ހުރެ 3 ނޮވެމްބަރު 1988 ވަނަ އަހަރު ރާއްޖެހިފަން އައި ދުޝްމިނުންނާ ދެމެދު ހިނގި ހަމަލާތައް ބަދަލު ކުރުމުގެ ތެރޭގައެވެ.
ހޯމަ ދުވަހު ބޭއްވި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި ދަނގެތި ދާއިރާގެ މެމްބަރު މުހައްމަދު ނާޒިމް (ކާނަލް ނާޒިމް) ކުރެއްވި ސުވާލަކަށް ޖަވާބު ދެއްވަމުން ޓޫރިޒަމް މިނިސްޓަރު އަލީ ވިދާޅުވީ، ގައުމަށްޓަކައި ގުރުބާންވެފައިވާ ބަތަލުންގެ އަގުވަޒަން ކުރަން ޖެހޭ ކަމަށެވެ. ނަމަވެސް ޝަހީދު ހުސައިން އާދަމް ފަދަ ބަތަލުންގެ މަތިން ހަނދާން އާކުރަނީ ނޮވެމްބަރު މަހުގެ 3 ވަނަ ދުވަހު އެކަނިކަން މިނިސްޓަރ ފާހަގަކުރެއްވިި އެވެ.
މިނިސްޓަރ އަލީ ވަހީދު ވިދާޅުވީ ޝަހީދު ހުސައިން އާދަމް ގައުމަށްޓަކައިވެފައިވާ ގުރުބާނީތައް އަބަދުމެހެން ފެންނަން ހުންނަ ޖެހޭ ކަމަށެވެ. އެގޮތުން ޝަހީދު ހުސައިން އާދަމްގެ ހަނދާނުގައި ކަލްޗަރަލް ސެންޓަރެއް ހދ. ކުޅުދުއްފުށީގައި އެޅުމަށް ހަމަޖެހިފައިވާ ކަމަށް ވިދާޅުވިއެވެ.
އޭގެއިތުރުން ކުރީގެ ރައީސް މުހައްމަދު ނަޝީދު އަރުވާލާފައި ހުރި ރ. އަގޮޅިތީމުގައި ކަލްޗަރަލް ސެންޓަރެއް ގާއިމްކުރުމަށް ނިންމާފައިވާ ކަމަށްވެސް މިނިސްޓަރު ވިދާޅުވިއެވެ. އެ ކަލްޗަރަލް ސެންޓަރު ގާއިމްކުރަން ހަމަޖެހިފައިވަނީ ސައުތު އެފްރިކާގެ މަންޑޭލާ ފައުންޑޭޝަންއާ ގުޅިގެންނެވެ.
އަންނަ އަހަރު ރައީސް ނަޝީދުގެ އުފަން ދުވަހު ކަލްޗަރަލް ސެންޓަރު ހުޅުވޭނެ ކަމަށް މިނިސްޓަރު ވިދާޅުވިއެވެ.
ޝަހީދު ހުސައިން އާދަމްގެ ގުރުބާނީތަށް ދައްކުވައިދޭ ކަލްޗަރެއް ސެންޓަރެއް ހެދުމަށް ހަމަޖެހިފައިވާއިރު، ޓެރަރިސްޓުން ރާއްޖެ ހިފަން އައިސް ހަމާލާދޭން ފެށުމުން ސިފައިންގެ މަރުކަޒު ދިފާއުކުރެއްވުމަށް މަސައްކަތް ކުރެއްވީ ޝަހީދު އާދަމްއެވެ. އޭނާ އަކީ ދިވެހި ގައުމީ ބަތަލުންގެ ތެރެއިން އެންމެ މަތީ ދަރާޖަ އަރުވާފައިވާ ސިފައިންގެ ބޭކަލެކެވެ. ހުސައިން އާދަމް ޝަހީދުވެވަޑައިގެންނެވީ އުމުރުފުޅުން އެންމެ ވިހި އަހަރުގައެވެ.
