ރަޖިސްޓްރީ ނުކޮށް 20 ގެސްޓް ހައުސްއެއް ހިންގާ: އަލީ ވަހީދު
10 ޖުލައި 2019 | ބުދަ 21:30މިހާތަނަށް 10 އަތޮޅެއްގެ 37 ރިސޯޓް ޗެކްކޮށްފައިވޭ
ޓޫރިޒަމް މިނިސްޓަރު އަލީ ވަހީދު ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި
ރަޖިސްޓްރީ ނުކޮށް ގަވާއިދާ ހިލާފަށް 20 ގެސްޓް ހައުސްއެއް ހިންގަމުންދާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި ވާހަކަ ދައްކަވަމުން ޓޫރިޒަމް މިނިސްޓަރު ވިދާޅުވީ، އެ މިނިސްޓްރީގައި ރަޖިސްޓްރީ ކޮށްފައިވާ ފަތުރުވެރިންނަށް ހިދުމަށްދޭ ހުރިހާ ތަންތަނުގެ ''އިންސްޕެކްޝަން'' ޓޫރިޒަމް މިނިސްޓްރީއާ ފުލުހުންނާއި ސިފައިންނާއި ގުޅިގެން މި އަހަރުގެ ފެބްރުއަރީ މަހުގެ 28 ވަނަ ދުވަހު ފަށާފައިވާ ކަމަށެވެ. އެގޮތުން މިހާތަނަށް 10 އަތޮޅެއްގެ 37 ރިސޯޓާއި ތިން ޓޫރިސްޓު ހޮޓާލާއި 121 ގެސްޓް ހައުސްގެ އިތުރުން 48 ޑައިވް ސެންޓަރ ވަނީ އިންސްޕެކްޓް ކޮށްފައެވެ.
މީހުން ދިރިއުޅޭ ރަށުގެ 31 ގެސްޓް ހައުސް ވެސް ޗެކްކުރުމުގެ ތެރޭގައި 20 ގެސްޓް ހައުސްއެއް ރެޖިސްޓްރީ ނުކޮށް ހިންގަމުންދާކަން މިހާތަނަށް ފާހަގަވެފައިވާ ކަމަށް މިނިސްޓަރު ވިދާޅުވިއެވެ.
އެތަންތަން އިންސްޕެކްޓް ކުރާއިރު ބަލާފައިވާނީ ފަތުރުވެރިކަމުގެ ސަލާމަތީ ރައްކާތެރި ކަމަށް އެޅިފައިވާ ފިޔަވަޅުތަކާއި، މުވައްޒަފުންނަށް ލިބެން ހުރި ހިދުމަތްތަކުގެ އިތުރުން ދިވެހި މުވައްޒަފުން ތިބި އަދަދެވެ.
އެ މަސައްކަތް ފަށާފައިވަނީ އިންޑަސްޓްރީގެ ހިޔާލާއި މަޝްވަރާ ހޯދަމަށް ފަހުއެވެ. ފަތުރުވެރިކަމުގެ ސިނާއަތުގައި ދިވެހިންނަށް ފުރުސަތުތައް މަދުވެގެން އުޅޭނީ ''އޯވާ ނައިޓަކުން'' ނޫންކަން ހިތާމާއާ އެކު ފާހަގަކުރައްވަމުން މިނިސްޓަރު ވިދާޅުވީ، އެކަން އެހެން ވެފައި އޮތީ މީގެ ކުރީގެ ސަރުކާރުން އެކަންތައް ބަލަންވާ ވަރަށް ނުބެލިގެން ކަމަށެވެ.
ފަތުރުވެރިކަމުގެ ސިނާއަތުގައި ހުރި ތަންތަނުގެ އިންސްޕެކްޝަން ސެޕްޓެމްބަރު މަހުގެ 27 ވަނަ ދުވަހު ''ދުނިޔޭގެ ފަތުރުވެރިކަމުގެ'' ދުވަހުގެ ކުރިން ނިންމާލެވޭނެ ކަމަށް ޓޫރިޒަމް މިނިސްޓްރީން ލަފާކުރެއެވެ. އިންސްޕެކްޝަނަށް ފަހު ޓޫރިޒަމް ސިނާއަތުގައި ހަރަކާތްތެރިވާ ފަރާތްތަކައި އެކު އެއްމޭޒު ދޮށަށް ދިޔުމަށް ވަނީ ހަމަޖެހިފައިވައެވެ.
