އީޔޫ ގެ ކައުންޓަރ ޓެރަރިޒަމް ކޯޑިނޭޓަރު ރާއްޖެ ވަޑައިގަންނަވަނީ
10 ޖުލައި 2019 | ބުދަ 17:43ދަތުރުފުޅު ކުރައްވާނީ ޖުލައި މަހުގެ 11 އިން 16
ޔޫރަޕިއަން އިއްތިހާދު ގެ ކައުންޓަރ ޓެރަރިޒަމް ކޯޑިނޭޓަރު ގިލްސް ޑެ ކެރްޗޯވޭ
ޔޫރަޕިއަން އިއްތިހާދު (އީޔޫ) ގެ ކައުންޓަރ ޓެރަރިޒަމް ކޯޑިނޭޓަރު ގިލްސް ޑެ ކެރްޗޯވޭ ރާއްޖެ އާއި ސްރީލަންކާ އަށް ރަސްމީ ދަތުރުފުޅެއް ކުރަން ނިންމައިފިއެވެ.
ޖުލައި މަހުގެ 11 އިން 16 އަށް ކުރައްވާ މި ދަތުރުފުޅަކީ މި ދެ ގައުމުގެ ސަލާމަތީ ކަންތައްތައް އިތުރަށް ފުޅާކޮށް ތަޖުރިބާ ހިއްސާކުރުން އިތުރަށް ހަރުދަނާ ކުރުމަށް އެއްބާރުލުން ދިނުމުގެ ގޮތުން ކުރައްވާ ދަތުރުފުޅެކެވެ.
މި ދަތުރުފުޅުގައި ކެރްޗޯވޭ ވަނީ ދިވެހި ސަރުކާރުގެ އިސް ފަރާތްތަކާއި ސަލާމަތީ ކަންތައްތައް ބަލަހައްޓާ އިސްބޭފުޅުންނާ ބައްދަލު ކުރެއްވުމަށް ހަމަޖެހިފައެވެ. ދެ ގައުމުގެ ޑިޕްލޮމެޓިކް ޖަމާއަތުގެ މަންދޫބުންނާ ވެސް މި ދަތުރުފުޅުގައި ކެރްޗޯވޭ ބައްދަލު ކުރައްވާނެއެވެ.
ގިލްސް ޑެ ކެރްޗޯވޭ އީޔޫ ގެ ކައުންޓަރ ޓެރަރިޒަމް ކޯޑިނޭޓަރު މަގާމު ފުރައްވާތާ މިހާރު 10 އަހަރަށް ވުރެ ގިނަ ދުވަސް ވެއްޖެއެވެ.
