އޭސީސީގެ ނައިބު ރައީސަކަށް މިންނާ އައްޔަނުކޮށްފި
7 ޖުލައި 2019 | އާދީއްތަ 11:37މިންނާ އައްޔަނުކުރީ ކޮމިޝަންގެ މެމްބަރުންގެ ތާއީދާ އެކު
އޭސީސީގެ ނައިބު ރައީސްކަމަށް އައްޔަނުކުރެވުނު އައިމިނަތު މިންނާ
އެންޓި ކޮރަޕްޝަން ކޮމިޝަން (އޭސީސީ) ގެ ނައިބު ރައީސްއަކަށް، އެ ކޮމިޝަންގެ މެމްބަރު އައިމިނަތު މިންނާ އައްޔަނު ކޮށްފިއެވެ.
އޭސީސީގެ ނައިބު ރައީސްގެ މަގާމަށް މިންނާ އައްޔަނުކުރީ، ކުރިން އެ މަގާމުގައި ހުންނެވި މުއައްވިޒް ރަޝީދު އެ ކޮމިޝަނުގެ ރައީސްގެ މަގާމަށް ހަމަޖެއްސުމާއި ގުޅިގެންނެވެ. ނައިބު ރައީސްގެ މަގާމަށް މިންނާ އައްޔަނުކޮށްފައި ވަނީ އެ ކޮމިޝަންގެ މެމްބަރުގެ ތާއީދާ އެކު ކަމަށް އޭސީސީން ބުނެފައިވެއެވެ.
އޭސީސީގެ މަގާމުތަކަށް ބަދަލު ގެންނަން ޖެހުނީ، ކުރިން އެ ކޮމިޝަންގެ ރައީސްގެ މަގާމުގައި ހުންނެވި ހަސަން ލުތުފީ އިސްތިއުފާ ދެއްވުމާއި ގުޅިގެންނެވެ. އޭނާ މަގާމުން އިސްތިއުފާ ދެއްވި އިރު، ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއިން ވަނީ އޭނާ މަގާމުން ވަކިކުރުމުގެ ކުރިން ޖަވާބުދާރީ ވުމުގެ ފުރުސަތު އަރުވަން ނިންމާފައެވެ.
މަޖިލީހުގެ ކޮމިޓީން އޭނާއަށް ޖަވާބުދާރީ ވާން ފުރުސަތު ދޭން ނިންމީ، މަގާމުން ވަކިކުރަން ކޮމިޓީން ފާސްކުރުމަށް ފަހުގައެވެ. ލުތިފީ މަގާމުން ވަކިކުރަން ކޮމީޓީއިން ނިންމީ މިއަހަރުގެ ފެބްރުއަރީ މަހުގެ ދިހަ ވަނަ ދުވަހުން ފެށިގެން މަގުބޫލު އުޒުރަކާ ނުލާ އޮފީހަށް ނުނިކުންނެވުމާއި ގުޅިގެންނެވެ. މި މުއްދަތުގެ ތެރޭގައި އޭނާ ވަނީ ބަރާބަރަށް މުސާރަ ނަންގަވާފައެވެ.
ނައިބު ރައީސް ކަމަށް އައްޔަނުކުރެވުނު، އައިމިނަތު މިންނާ އޭސީސީގެ މެމްބަރުކަމުގެ ހުވާ ކުރެއްވީ 2014 ވަނަ އަހަރުގެ ސެޕްޓެމްބަރު މަހުގެ ނުވަވަނަ ދުވަހުގައެވެ.
