ދެ އަހަރުގެ ތުއްތު ކުއްޖެއް ރޭޕް ކޮށްލި މައްސަލައިގައި މިޔަންމާގެ އެތައް ސަތޭކަ ބަޔަކު މަގުތަކަށް ނިކުމެ އެ ކުއްޖާއަށް އިންސާފު ހޯދައިދޭން އަޑު އުފުލައިފިއެވެ.

މޭ މަހުގެ ތެރޭގައި މިޔަންމާގެ ވެރިރަށް ނޭޕީޓޯގައި ހިނގި ހާދިސާއާ ގުޅިގެން އާންމުން އަޑު އުފުލަން ނިކުތީ، މައްސަލައިގެ ތަހުގީގުގައި އެދެވޭ ވަރެއްގެ ކުރިއެރުމެއް ނުލިބޭ ކަމަށް ބުނެ އެ ކުއްޖާގެ ބައްޕަ މީޑިއާތަކަށް އިންޓަވިއުއެއް ދިން ހިސާބުންނެވެ.

ހާދިސާގެ ތަފުސީލު ދެމުން އެ ކުއްޖާގެ ބައްޕަ ބުނީ، އެއް ދުވަހު ނާސަރީއިން އައި އިރު އެ ކުއްޖާއަށް ލިބިފައިވާ ޒަހަމްތައް ޑޮކްޓަރަށް ދެއްކުމުން އެއީ ރޭޕް ކުރުމާ ގުޅިގެން ލިބިފައިވާ ޒަހަމްތަކެއް ކަމަށް ޑޮކްޓަރު އަންގާފައިވާ ކަމަށެވެ. އެ އަންހެން ކުއްޖާއަށް އޭރު އެންމެ ދެ އަހަރާއި 11 މަހެވެ. މޭ 16 ވަނަ ދުވަހު ހިނގި ހާދިސާ، ޖެހިގެން އައި ދުވަހު އެ ކުއްޖާގެ މަންމަ ވަނީ ފުލުހުންނަށް ރިޕޯޓްކޮށްފައެވެ.

މައްސަލައާއި ގުޅިގެން ހައްޔަރު ކުރި 29 އަހަރުގެ ފިރިހެނަކު އެކަށީގެންވާ ވަރަށް ހެކި ނެތިގެން ކޯޓުން ދޫކޮށްލުމަށް ފަހު، މިދިޔަ ހަފުތާގެ ބުދަ ދުވަހު ވަނީ އަނެއްކާވެސް ހައްޔަރުކޮށްފައެވެ. ނަމަވެސް އޭނާއަކީ ކުށެއް ނެތް މީހެއް ކަމަށް ބުނެ މިޔަންމާގެ ރައްޔިތުންތަކެއް ފޭސްބުކްގައި ވެސް ޕޯސްޓްކޮށްފައިވެއެވެ.

ހޮނިހިރު ދުވަހު ކުރި މުޒާހަރާގެ ބައިވެރިން މަގުތަކަށް ނިކުތީ "ޖަސްޓިސް ފޯރ ވިކްޓޯރިއާ" ޖަހާފައި ހުރި ބެނަރތަކާއި ޓީޝާޓުތައް ލައިގެންނެވެ. ވިކްޓޯރިއާއަކީ މިޔަންމާގެ މީހުން އެ ކުއްޖާއަށް ދީފައިވާ ވަނަމެވެ. މުޒާހަރާގެ ބައިވެރިޔަކު ބުނީ އެ މީހުން ބޭނުންވަނީ ދެފުށް ފެންނަ ތަހުގީގެއް ކޮށް އެ ކުއްޖާއަށް އިންސާފު ކަމަށެވެ.

އެ ގައުމުގެ ސަރުކާރުން ދަނީ އެއްވެސް މީހަކު ދައުވާ ކުރަން ހުށަނޭޅި ކަމުގައިވީ ނަމަވެސް، ކުޑަކުދިންގެ މައްސަލަތަކުގައި ދައުވާ ކުރެވޭ ގޮތަށް ގާނޫނު ބަދަލުކުރުމުގެ މަސައްކަތް ކުރުމުންނެވެ.