އެމެރިކާގެ ތާރީހާއި ސަގާފަތުން ރާއްޖެވެސް އިބުރަތް ލިބިގަންނަން ޖެހޭ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ރައީސް މިހެން ވިދާޅުވެފައިވަނީ، އެމެރިކާގެ 234 ވަނަ މިނިވަން ދުވަހާއި ގުޅިގެން، އެ ގައުމުގެ ރައީސް ޑޮނާލްޑް ޓްރަމް އަށާއި ރައްޔިތުންނަށް ތަހުނިޔާ ވިދާޅުވެ ފޮނުއްވި ސިޓީއެއްގައެވެ.

އަމިއްލަ ޑިމޮކްރެޓިކް ވެއްޓަކަށް ރާއްޖެ ބަދަލުވަމުންދާއިރު އެމެރިކާގެ ތާރީހާއި ސަގާފަތުން ރާއްޖެވެސް އިބުރަތް ލިބިގަންނަން ޖެހޭ ކަމަށް ރައީސްގެ އެ ސިޓީގައި ވިދާޅުވެފައިވެއެވެ.

އެމެރިކާގެ ބާނީ ތޯމަސް ޖެފަރސަން މީގެ ދެ ގަރުނުކުރިން ވިދާޅުވި ވާހަކަތަކާ އެއްގޮތަށް އެ އަސާސުތަކުގެ މަތީގައި އެގައުމު އަދިވެސް ހިފަހައްޓަމުންދާ ކަމަށް އެ ސިޓީގައި ވިދާޅުވެފައިވެއެވެ.

އެމެރިކާއިން ވަނީ ދުނިޔޭގެ ހުރިހާ ގައުމެއްގެ ލޯތްބާއި އިހުތިރާމް ހޯދާފައި ކަމަށް ވެސް ރައީސްގެ ސިޓީގައި ފާހަގަކޮށްފައިވެއެވެ.

މީގެ އިތުރުން ރައީސް ވަނީ ބައިނަލްއަގުވާމީ ގޮތެއްގައި އެމެރިކާއިން އަދާކުރަމުންދާ ބިނާކުރަނިވި ރޯލަށް ތައުރީފްކުރައްވާފައެވެ. އަދި ރާއްޖެއާ އެމެރިކާގެ ގުޅުމާމެދު ފަހުރުވެރިވާ ކަން ފާހަގަކޮށްފައިވެއެވެ.

ރައީސް ވިދާޅުވީ އެމެރިކާގެ ރައީސް އަށް ފުރިހަމަ ސިއްހަތަށް އެދިވަޑައިގަންނަވާ ކަމަށާ ރާއްޖެއާ އެމެރިކާގެ ގުޅުން އިތުރަށް ބަދަހިވާތަން ދެކެން ބޭނުންވާ ކަމަށެވެ.