ސަރުކާރުން ވަކިވި އިރު އެއްލައްކައަށް ވުރެ ގިނަ ޒުވާނުންނަށް ވަޒީފާ ވަނީ ލިބިފައި: ރައީސް ޔާމީން
5 ޖުލައި 2019 | ހުކުރު 07:27ވަޒީފާ ލިބެނީ ވަކި ކުލައެއްގެ ބަޔަކަށް ކަމަށް ވިދާޅުވި
ކުރީގެ ރައީސް އަބްދުﷲ ޔާމީން، އެމަނިކުފާނުގެ ވެރިކަމުގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގެ ތެރެއިން
ވެރިކަމުގެ ފަސް އަހަރު ނިމުނުއިރު އެމަނިކުފާނުގެ ސަރުކާރުން އެއް ލައްކައަށްވުރެ ގިނަ ޒުވާނުންނަށް ވަޒީފާ ލިބިފައިވާކަމަށް ވިދާޅުވާ ވާހަކަތައް ކުރީގެ ރައީސް އަބްދުﷲ ޔާމީން އަނެއްކާވެސް ތަކުރާރުކުރައްވައިފި އެވެ.
ބުރާސްފަތި ދުވަހުގެރޭ ކާނިވާ ސަރަހައްދުގައި ބޭއްވި މުޒާހަރާގައި ވާހަކަދައްކަވަމުން ރައީސް ޔާމީން ވިދާޅުވީ އެމަނިކުފާނުގެ ވެރިކަމުގައި އެހާ ގިނަ އަދަދެއްގެ ވަޒީފާ ޒުވާނުންނަށް ލިބުނު ކަމުގައި ވިއަސް މި ސަރުކާރުން ޒުވާނުންނަށް ވަޒީފާ ނުލިބޭ ކަމަށެވެ. އަދި ވަޒީފާ ލިބެނީ ވަކި ކުލައެއްގެ ބަޔަކަށް ކަމަށް އަބްދުﷲ ޔާމީން ވިދާޅުވި އެވެ.
ޔާމީން ސަރުކާރުގެ ދައުރު ހަމަވުމުގެ ކުރިން ރާއްޖޭގައި 94،000 ވަޒީފާ އުފެއްދުމަކީ ޕީޕީއެމްގެ އޭރުގެ މެނިފެސްޓޯގައި ހިމަނާފައިވާ އެންމެ މުހިންމު އެއް ވައުދެވެ. އެއްލައްކައަށް ވުރެ ގިނަ ވަޒީފާ ޒުވާނުންނަށް ދީފައިވާ ކަމަށް ބުރާސްފަތި ދުވަހުގެރޭ އެމަނިކުފާނު ވިދާޅުވިއިރު އޭގެ ކުރިން ވެސް އެއަދަދަށް ވަޒީފާ ދެއްވި ކަމަށް ވިދާޅުވިއެވެ. އަދި ވެރިކަމުގެ ފަހު ދުވަސްތަކުގައި ވިދާޅުވެފައިވަނީ އުފެއްދީ 76،000 ވަޒީފާ ކަމަށެވެ. އާ ވަޒީފާ އުފައްދާފައިވާ ކަމަށް ވިދާޅުވެ، ރައީސް ޔާމީނާއި އެމަނިކުފާނުގެ ސަރުކާރުގެ އެކި ވަޒީރުން އޭރު ވިދާޅުވަމުން ގެންދެވީ އެކި އަދަދުތަކެވެ.
ފާއިތުވި ފަސް އަހަރު އިދިކޮޅު ފަރާތްތަކުގެ ޖަލްސާތަކާއި އެއްވުންތަކުގައި ބައިވެރިވެގެންނާއި، އިދިކޮޅު ފަރާތްތަކަށް ތާއީދުކޮށްގެންނާއި އަދި އިދިކޮޅު ލީޑަރުންނާ ބައްދަލުކޮށްގެން ގިނަ ބަޔަކު ވަޒީފާއިން ވަކިކޮށްފައިވެއެވެ. އަދި ބައެއް ފަރާތްތައް ދުރު ރަށްރަށުގެ ވަޒީފާތަކަށް ބަދަލުކޮށްފައި ވެއެވެ. މީގެ އިތުރުން 1 ފެބްރުއަރީގެ ސުޕްރީމް ކޯޓުގެ އަމުރުގެ ފަހުން ފުލުހުންނާއި ސިފައިންގެ ތެރެއިން ވެސް ގިނަ ބަޔަކު ހައްޔަރުކޮށް، ފަހުން ވަޒީފާއިން ވަކިކޮށްފައި ވެއެވެ.
