ކޯޓްތަކުން ސަރުކާރާއި ދެކޮޅަށް އަމުރުތައް ނެރުމަށް ޔާމީން ގޮވާލައްވައިފި
ފެބްރުއަރީ1 ގެ އަމުރާއި ގުޅިގެން އެމަނިކުފާނު ކުޑަކަކޫ މައްޗަށް ތިރިވި ކަމަށް ވިދާޅުވި
ކުރީގެ ރައީސް އަބްދުﷲ ޔާމީން
އެ މަނިކުފާނުގެ ވެރިކަމުގައި މިދިޔަ އަހަރުގެ ފެބްރުއަރީ 1 ގައި ސުޕްރީމް ކޯޓުން އަމުރު ނެރުނު ގޮތަށް، އެފަދަ އަމުރުތަކެއް ކޯޓުތަކުން މި ސަރުކާރާ ދެކޮޅަށް ވެސް ނެރުމަށް ކުރީގެ ރައީސް އަބްދުﷲ ޔާމީން ގޮވާލައްވައިފި އެވެ.
ޕީޕީއެމް އާއި ޕީއެންސީން އިންތިޒާމުކޮށްގެން ސަރުކާރާ ދެކޮޅަށް އަޑުއުފުލުމަށް ބުރާސްފަތި ދުވަހުގެރޭ ބޭއްވި އެއްވުމުގައި، ހިޔާނާތާއި ފަސާދައިގެ ތުހްމަތުތައް ކުރެވިފައިވާ އަދި އެ މަނިކުފާނުގެ ވެރިކަމުގައި ކޯޓްތަކަށް އިންތިހާއަށް ނުފޫޒު ފޯރުވި ކަމަށް ތުހްމަތު ކުރެވިފައިވާ ކުރީގެ ރައީސް ޔާމީން ވާހަކަފުޅުދައްކަވަމުން ފެބްރުއަރީ މަހުގެ 1 ގައި ނެރުނު އަމުރަށް އިޝާރާތް ކުރައްވާ ވިދާޅުވީ ފެބްރުއަރީ 1 ވަނަ ދުވަހުގެ އަމުރަކީ ހިފި ހަނދުކޭތައެއް ކަމަށެވެ. އަދި ދިވެހިންނަށް ދިވެހިން ބޭނުންވާ ދިވެހިރާއްޖެ ހޯދައިދޭން އަނެއްކާވެސް އެފަދަ އަމުރުތަކެއް ނެރެންޖެހޭ ކަމަށް އެ މަނިކުފާނު އިޝާރާތް ކުރެއްވެވި އެވެ.
ފެބްރުއަރީ 1 ގެ އަމުރަކީ ހިބަރުވަދެއް ކަމަށް ކުރިން ސިފަކޮށްފައިވާއިރު، އެކަމަށް އިޝާރަތް ކުރައްވައި ވެސް ޔާމީން ވާހަކަ ދެއްކެވި އެވެ. އެ މަނިކުފާނު ވިދާޅުވީ ހިބަރު ވަދު ދޫކޮށްގެން ކަންތައްވެގެން ދިޔަ ގޮތް އޭގެ "މުސައްނިފު" ވިދާޅުވާ އަޑު އިވިފައިވާ ކަމަށެވެ.
އެ މަނިކުފާނު އިޝާރާތް އެ ކުރެއްވީ ލީކްވެފައިވާ އޯޑިއޯއެއްގައި ފެބްރުއަރީ 1 ގެ އަމުރާ ގުޅޭ ގޮތުން ކުރީގެ އުއްތަމަ ފަނޑިޔާރު އަބްދުﷲ ސައީދު ކަމަށް ތުހްމަތުކުރާ މީހަކު ދައްކަވާފައިވާ ވާހަކަ އަށެވެ.
ރައީސް ޔާމީންގެ ވެރިކަމުގައި ޝަރުއީ ނިޒާމުގެ އިތުރުން މިނިވަން މުއައްސަސާތަކަށް އިންތިހާ އަށް ނުފޫޒު ފޯރުވާފައިވާ ކަމަށް ތުހްމަތުކުރާއިރު، ބުރާސްފަތި ދުވަހުގެ ރޭގެ އެއްވުމުގައި އެއް އަތް ފުރަގަހަށް ލައްވައިގެން ހުންނަވައި ވާހަކަދައްކަވަމުން ރައީސް ޔާމީން ވިދާޅުވީ މުއައްސަސާތަކަށް ހަރާބުވެގެން ދިޔައީ ފެބްރުއަރީ 1 ގެ އަމުރަށް ފަހު ކަމަށެވެ. އަދި އެ މަނިކުފާނަށް ރިޔާސީ އިންތިޚާބު ވެސް ގެއްލިގެން ދިޔައީ އެ އަމުރުގެ ސަބަބުން ކަމަށް ވެސް ވިދާޅުވި އެވެ.
ރިޔާސީ އިންތިޚާބުން ބަލިވުމުން އިންތިޚާބު ބާތިލުކުރުމަށް ޔާމީން ސުޕްރީމް ކޯޓަށް ހުށަހެޅި ނަމަވެސް ކޯޓުން ނިންމީ އިންތިޚާބު ބާތިލްކުރަންޖެހޭ ސަބަބެއް ނެތް ކަމަށެވެ. ރިޔާސީ އިންތިޚާބުގައި ޔާމީންގެ މައްޗަށް ރައީސް އިބްރާހިމް މުހައްމަދު ސޯލިހް ކުރި ހޯއްދެވީ 134،705 ވޯޓުންނެވެ. އެއީ 58.4 ޕަސެންޓެވެ. ރައީސް ޔާމީނަށް ލިބިވަޑައިގަތީ، 96،052 ވޯޓެވެ. އެއީ 41.6 ޕަސެންޓެވެ.
