ބިލެއްދޫ ފެނަކަ ބްރާންޗުން ސަސްޕެންޑް ކުރި މުވައްޒަފުންނަށް ކުރެވޭ ތުހުމަތު އަންގަން ޖެހޭނެކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޢާޒް މުޙައްމަދު ރަޝީދު ވިދާޅުވެއްޖެއެވެ.
ފ. ބިލެތްދޫ ފެނަކަ ބްރާންޗުގައި މަސައްކަތް ކުރާ މުވައްޒަފުންތަކެއް ވަޒީފާއިން ސަސްޕެންޑް ކޮށްފައިވާއިރު، މުވައްޒަފުން ސަސްޕެންޑު ކޮށްފައިވަނީ ތަހުގީގު ކުރަމުންދާ މައްސަލައެއް އޮތްކަމަށް ބުނެއެވެ.
އެންމެފަހުން ވަޒީފާއިން ސަސްޕެންޑް ކުރި މުވައްޒަފުންނަށް ފޮނުވި ސިޓީގައިވެސް ބުނެފައިވަނީ އެ މުވައްޒަފުންނާ ގުޅުންހުރި މައްސަލައެއް ތަހުގީގު ކުރަމުންދާތީ، މި މައްސަލައިގެ ތަހުގީގުގައި އިތުރަށް ބަލަންޖެހޭ ކަންކަން ހުރުމުން 16 ޖުލައި އިން ފެށިގެން 14 ދުވަހުގެ މުއްދަތަށް މުސާރަ ނުލިބޭ ގޮތަށް ވަގުތީ ގޮތުން އޮފީހުގެ މަސައްކަތަށް ނުކުތުން މަނާ (ސަސްޕެންޑް) ކުރެވިފައިވާ ކަމަށެވެ.
ނަމަވެސް މުވައްޒަފަށް ފޮނުވި ސިޓީގައި ބަލަމުންދާ މައްސަލައެއް ފާހަގަކޮށްފައި ނުވެއެވެ. އަދި މުވައްޒަފުން އެހުމުންވެސް އެކަން ސާފުވާ ގޮތް ވެފައި ނުވާކަމަށް ރާއްޖެއެމްވީއާ ވާހަކަ ދެއްކި ބައެއް މުވައްޒަފުން ބުންޏެވެ.
އެކަމާ ގުޅޭގޮތުން ރާއްޖެއެމްވީން ފެނަކަ ކުންފުނީގެ މެނޭޖިންގ ޑިރެކްޓަރ މުޢާޒް މުޙައްމަދު ރަޝީދުއާ ސުވާލު ކޮށްލުމުން އޭނާ ވިދާޅުވީ، މުވައްޒަފުންގެ މައްޗަށް ހިންގޭ ތަހުގީގުގައި ކުރެވޭ ތުހުމަތު އެ މުވައްޒަފުންނަށް އެނގެން ޖެހޭނެ ކަމަށާއި، ކުންފުނިން އެކަން މުވައްޒަފުންނަށްވެސް އަންގަންޖެހޭނެ ކަމަށެވެ.
އެހެންނަމަވެސް ރާއްޖެއެމްވީން ބެލި ބެލުމުން މުވައްޒަފުންނަށް އެކަންކަން ސާފުކޮށްދީފައި ނުވާކަމަށް ވަނީ މައުލޫމާތު ލިބިފައެވެ.
އޭގެ އިތުރުން، މިހާރުވެސް އިތުރު މުވައްޒަފުންތަކެއް ސަސްޕެންޑް ކުރުމަށް ތައްޔާރުވަމުންދާކަމަށް އިތުބާރު ހުރި މަސްދަރުތަކުން ރާއްޖެއެމްވީއަށް ކިޔާދީފައިވެއެވެ.
މިވަގުތު މުވައްޒަފުން ސަސްޕެންޑް ކުރަމުންދަނީ ބިލެއްދޫ ކައުންސިލް ރައީސް ހޮވުމަށް ހޮނިހިރު ދުވަހު ބާއްވާ ބައި-އިލެކްޝަނާއި ދިމާކޮށްކަމަށް އެރަށުން ވާހަކަ ދެއްކި ބައެއް މީހުން ބުނެއެވެ.
މުވައްޒަފުން ސަސްޕެންޑްކުރާ މައްސަލައިގައި އެ ދާއިރާގެ ކުރީގެ މެންބަރު އަހުމަދު ހަލީމް އެކްސްގައި ކުރެއްވި ޕޯސްޓެއްގައި ވިދާޅުވީ ހޮނިހިރު ދުވަހު އޮންނަ ބިލެތްދޫ ކައުންސިލް ރައީސްގެ ބައި-އިލެކްޝަނާ ދިމާކޮށް ފެނަކައިގައި މަސައްކަތް ކުރަމުން އަންނަ މުވައްޒަފުންނަށް ބިރު ދެއްކުމުގެ މަގުސަދުގައި ވަޒީފާ އިން ސަސްޕެންޑު ކުރުމަކީ ދަށު ދަރަޖައިގެ ކަމެއް ކަމަށެވެ. ވޯޓަކީ ގަދަ ބާރުން، ނުފޫޒު ފޯރުވައިގެން ހޯދާ އެއްޗެއް ނޫން ކަމަށެވެ.
