1.1 ބިލިޔަން ރުފިޔާގެ 36 މަޝްރޫއުގައި ސޮއިކޮށްފައިވޭ: އަސްލަމް

މިއަހަރުގެ މިހާތަނަށް 1.1 ބިލިޔަން ރުފިޔާގެ 36 މަޝްރޫއެއްގައި ސޮއިކުރެވިފައިވާކަމަށް ޕްލޭނިންގ މިނިސްޓަރ މުހައްމަދު އަސްލަމް ވިދާޅުވެއްޖެ އެވެ.

އަސްލަމް މިފަދައިން ވިދާޅުވީ މަރަދޫ ދާއިރާގެ މެމްބަރު އިބްރާހިމް ޝަރީފް މިނިސްޓަރާއި ސުވާލު ކުރެއްވުމަށް ހުށަހެޅުމާއި ގުޅިގެން މިނިސްޓަރ މަޖިލީހަށް ވަޑައިގެން މެމްބަރުން ކުރެއްވި ސުވާލުތަކަށް ޖަވާބުދެއްވަމުންނެވެ.

މިނިސްޓަރ ވަނީ އެ 36 މަޝްރޫއުގެ ތަފްސީލް މަޖިލިސް މެމްބަރުންނާއި ހިއްސާ ކުރައްވާފައެވެ.

ފެނުގެ ތިން މަޝްރޫއަކާއި، ނަރުދަމާގެ މަޝްރޫއެއްގެ އިތުރުން ފެނާއި ނަރުދަމާގެ 11 މަޝްރޫއެއްގައި ސޮއިކުރެވިފައިވާ ކަމަށް މިނިސްޓަރ ވަނީ ވިދާޅުވެފައެވެ. މީގެ އިތުރުން، މަގު ހެދުމުގެ ހަތް މަޝްރޫއަކާއި ބަނދަރު ހެދުމުގެ 14 މަޝްރޫއެއްގައި ސޮއިކުރެވިފައިވާ ކަމަށް މިނިސްޓަރ ވިދާޅުވި އެވެ. މިހާތަނަށް ސޮއިކުރެވުނު މަޝްރޫއުތަކުގެ އަގަކީ ޖުމްލަ 1.1 ބިލިޔަން ރުފިޔާ އެވެ،. މިނިސްޓަރ ވިދާޅުވީ މި 36 މަޝްރޫއުގެ އިތުރުން 41 މަޝްރޫއެއްގެ އެއްބަސްވުމެއްގައި ސޮއިކުރުމަށް މަޝްވަރާތައް ކުރިއަށްދާ ކަމަށެވެ.

މިނިސްޓަރ ވިދާޅުވީ ބަޖެޓްގައި ހިމަނާފައި އޮތް އެއްވެސް ކަމެއް ދޫކޮށްނުލާނެ ކަމަށާއި، ބަޖެޓްގައި ހިމަނާފައިވާ ކަންކަން ކުރިއަށް ގެންދާނެ ޝެޑިއުލްއެއް ވަރަށް އަވަހަށް މަޖިލީހާއި ހިއްސާ ކުރައްވާނެ ކަމަށެވެ.

މިނިސްޓަރަ މަޖިލީހަށް ހާޒިރުކުރެވުނީ މަރަދޫ ބަނދަރުގެ މަސައްކަތް ލަސްވުމާއި ގުޅިގެން މަރަދޫ ދާއިރާގެ މެމްބަރު އިބްރާހިމް ޝަރީފް ސުވާލުކުރެއްވުމަށެވެ. ޝަރީފްގެ ސުވާލަށް ޖަވާބު ދެއްވަމުން މިނިސްޓަރ ވިދާޅުވެފައިވަނީ މަރަދޫ ބަނދަރުގެ މަސައްކަތް ލަސްވެފައިވަނީ ބަނދަރުގެ ސައިޒަށް ބަދަލުތަކެއް ގެންނަން ސިޓީ ކައުންސިލުން އެދުމުން އެކަންތައް ދިރާސާ ކުރުމުން ކަމަށެވެ.