ޖުލައި 13 ވަނަ ދުވަހު އޮންނަ ބާ ކައުންސިލްގެ އިންތިހާބުގައި ކުރިމަތިލާން ހުޅުވާލައިފި
ބާ ކައުންސިލުގައި ތިއްބަވާނީ ރައީސާއި ނައިބު ރައީސާއި ބަންޑާރަ ނައިބުގެ އިތުރުން އިތުރު ހަ މެމްބަރެއް
ޤާނޫނީ ވަކީލުންތަކެއް ހުވާކުރަނީ
ބާ ކައުންސިލްގެ އިންތިހާބު މި މަހުގެ 13 ވަނަ ދުވަހު ބާއްވަން ނިންމައި، މަގާމުތަކަށް ކުރިމަތިލާން އިލެކްޝަންސް ކޮމިޝަނުން ހުޅުވާލައިފިއެވެ.
19 ވަނަ ރައްޔިތުންގެ މަޖިލީހުގެ 12 ވަނަ ޖަލްސާގައި ފާސްކުރި ގާނޫނީ ފަންނުގެ ބިލްގައިވާ ގޮތުން ބާ ކައުންސިލްގެ އެގްޒެކެޓިވް ކޮމެޓީގައި ތިއްބަވާނީ ރައީސާއި ނައިބު ރައީސާއި ބަންޑާރަ ނައިބުގެ އިތުރުން އިތުރު ހަ މެމްބަރެކެވެ. އިންތިހާބު ކުރެވޭ މަގާމުތަކަށް ބޭފުޅުން ހޮއްވަވާނީ ގާނޫނީ ވަކީލުކަމުގެ ހުއްދަ ލިބިފައިވާ ފަރާތްތަކުގެ މެދުގައި ނެގޭ ވޯޓަކުންނެވެ.
އިލެކްޝަންސް ކޮމިޝަނުން ބާ ކައުންސިލްގެ އިންތިހާބު ބާއްވަން ނިންމީ، ގާނޫނީ ފަންނުގެ ބިލުގެ އެގާރަ ވާނަ މާއްދާގެ (ށ) ގައި ބުނާ ގޮތުން ބާ ކައުންސިލުގެ އެގްޒެކެޓިވް ކޮމިޓީއަށް އިންތިޚާބުކުރެވޭ ރައީސާއި، ނައިބު ރައީސާއި، ޤާނޫނީ ވަކީލުން އިންތިޚާބުކުރުމަށް ބާއްވާ ފުރަތަމަ އިންތިޚާބު ބާއްވަން ޖެހޭނީ އިލެކްޝަންސް ކޮމިޝަނުން ކަނޑައަޅާ އުޞޫލަކުން، އެ ކޮމިޝަނުގެ ފަރާތުން ކަމަށް ބަޔާންކޮށްފައި އޮތުމުންނެވެ. އެ ގާނޫނަށް އަމަލުކުރަން ފަށާތާ 21 ދުވަހުގެ ތެރޭގައި އިންތިހާބު ބާއްވަން އިލެކްޝަންސް ކޮމިޝަނުގެ މައްޗަށް ލާޒިމްކޮށްފައިވެއެވެ.
އިލެކްޝަންސް ކޮމިޝަނުން ކުރި އިއުލާނުގައި ވަނީ ބިލްގައިވާ ގޮތަށް، އެ މަގާމުތަކަށް ކުރިމަތިލައްވާ ބޭފުޅުންގެ ހުންނަން ޖެހޭ ޝަރުތުތައްވެސް ހިމަނާފައެވެ. އެގޮތުން ރައީސާއި ނައިބު ރައީސްގެ މަގާމަށް ކުރިމަތިލެވެނީ ވަކީލެއްގެ ގޮތުގައި މަސައްކަތް ކުރައްވާތާ ދިހަ އަހަރު ވެފައިވާ ފަރާތްތަކަށެވެ. އަދި އެގްޒެކެޓިވް ކޮމިޓީއަށް ކުރިމަތިލައްވާ ބޭފުޅުންނަކީ ފަސް އަހަރު މަދުވެގެން ވަކީލުކަން ކުރައްވާފައިވާ ބޭފުޅުން ކަމުގައިވެސް ބަޔާންކޮށްފައިވެއެވެ.
އިންތިހާބާއި ގުޅޭ މައުލޫމާތު ދިނުމަށް އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ރައީސް އަހުމަދު ޝަރީފް ވިދާޅުވީ ވަކީލުންގެ ލިސްޓް އަދި އާންމު ކުރެވިފައި ނުވަނީ އަދިއްތަ ދުވަހު އިލެކްޝަންސް ކޮމިޝަނަށް ލިބިފައިވާ ވަކީލުންގެ ލިސްޓްގުގައި ބައެއް މައުލޫމާތުގެ ކުށް ހުރުމުން ކަމަށެވެ. އަދި އެ މައުލޫމާތު ސައްޚަ ކުރުމަށްފަހު އަންގާރަ ދުވަހު އިއުލާން ކުރައްވާނެ ކަމަށް ޝަރީފް ވިދާޅުވިއެވެ.
އިންތިޙާބަކީ ރާއްޖޭގެ ހުރިހާ ރަށެއްގެ ވަކީލުން ބައިވެރިވާ އިންތިޚާބަކަށް ވާތީ ރާއްޖޭގެ މީހުން ދިރިއުޅޭ ހުރިހާ ރަށެއްގައި ވޯޓް ފޮށި ބަހައްޓާނެ ކަމަށާއި ރީ ރެޖިސްޓްރޭޝަން ކުރުމަށްޓަކައި ފަސް ވަކީލުނަނަށް ވުރެ ގިނަ ވަކީލުން ކުރިމަތި ލައްވަފައިވާ ރަށްތަކުގައި ވޯޓް ފޮށި ބެހެއްޓުމަށް ހަމަޖެހިފައިވާ ކަމަށް އޭނާ ވިދާޅުވި އެވެ. އަދި ފަސް ވަކީލުނަށްވުރެ މަދުން ރަޖިސްޓްރީވެފައި ވާނަމަ ވޯޓު ލާނެއް ތަނެއް ކަނޑައަޅާނީ ކޮމިޝަނުންކަމަށްވެސް ޝަރީފް ވިދާޅުވި އެވެ.
ޝަރީފް ވިދާޅުވީ މި އިންތިޚާބަކީ އެއްވެސް ވަރަކަށް ޝެޑިއުލް ކުރެވިފައިވާ އިންތިޚާބަކަށް ނުވާތީ މިކަމަށް ހިނގާނެ ބަޖެޓް ތައްޔަރު ކުރުމުގެ މަސައްކަތް ކުރަމުންދާ ކަމަށެވެ. އަދި އަންގާރަ ދުވަހު ފިނޭންސް މިނިސްޓްރީއަށް ފޮނުވާލެވޭ ވަރު ވާނެ ކަމަށް ވިދާޅުވިއެވެ. އަދި ބަޖެޓް ގާތްގަޑަކަށް 2 މިލިއަން ރުފިޔާއަށް އަރާނެކަމަށް ޝަރީފް ވިދާޅުވި އެވެ.
ބާ ކައުންސިލްގެ މަގާމުތަކަށް ކުރިމަތިލެއްވުމުގެ ސުންގަޑިއަކީ ޖުލައި މަހުގެ ފަސްވަނަ ދުވަހުގެ 5:00 އެވެ. އިންތިހާބުގެ ރަސްމީ ނަތީޖާ ޖުލައި މަހުގެ 14 ވަނަ ދުވަހު އިއުލާން ކުރާނެކަމަށް ވެސް އިލެކްޝަންސް ކޮމިޝަނުން ބަޔާންކޮށްފައިވެއެވެ.
މިހާތަނަށް ބާ ކައުންސިލްގެ ރައީސް ކަމަށް ވާދަކުރައްވާނެ ކަން އިއުލާން ކުރައްވާފައި ވަނީ ކުރީގެ ބަންޑާރަ ނައިބު ހުސްނުއް ސުއޫދު އެކަންޏެވެ.
