އެމް 7 ވެސް ޕްލާސްޓިކާއި ދުރަށް!
30 ޖޫން 2019 | އާދީއްތަ 13:59މި އިސްނެގުމަކީ ރާއްޖޭގެ އެހެން ކުންފުނި ތަކަށް ނަމޫނާ އިސްނެގުމެއް ކަމަށް ސަލީމް ވިދާޅުވި
ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކްލައިމެޓް ކޮމިޓީގެ މުޤައްރިރު އަހުމަދު ސަލީމަށް އެމްސެވަންގެ މެނޭޖިން ޑިރެކްޓަރ މުހައްމަދު އަބްދުއް ސައްތާރު ފުޅި ހަވާލުކޮށްދެއްވަނީ
އެއްފަހަރު ބޭނުން ކޮށްފައި އެއްލައިލާ ޕްލާސްޓިކް ބޭނުން ކުރުން އެމް ސެވަން އިން ހުއްޓާލައިފިއެވެ.
އާދިއްތަ ދުވަހު އެމްސެވަން ޕްރިންޓް އޮފީހުގައި ބޭއްވި ރަސްމިއްޔާތު ޝަރަފްވެރި ކޮށްދެއްވާފައިވަނީ ރައްޔިތުންގެ މަޖިލީހުގެ އެންވަޔަރަންމަންޓް އެންޑް ކްލައިމެޓް ކޮމިޓީގެ މުޤައްރިރު އަހުމަދު ސަލީމް އެވެ.
މި ރަސްމިއްޔާތުގައި ވާހަކަދައްކަވަމުން ސަލީމް ވިދާޅުވީ އެމް 7 އިން މިއަދު ނެގި މި އިސްނެގުމަކީ ރާއްޖޭގެ އެހެން ކުންފުނި ތަކަށް ނަމޫނާ އިސްނެގުމެއް ކަމަށެވެ.
ސަލީމް ވިދާޅުވީ މިއީ ވަރަށް ސީރިއަސް މައްސަލައެއް ކަމަށާއި މިކަމުގެ ނަތީޖާ ގައުމީ ފެންވަރުގައި ފެންނާނީ ފަރުދީ ޒިންމާ އަދާކޮށްގެން ކަމަށެވެ. މިކަމުގައި ހައްލު ހޯދޭނީ ފަރުދީ ލެވެލްގަ އާއި، އޮފީސް ލެވެލް އަދި ކުންފުނިތަކުގެ ލެވެލްގައި މަސައްކަތް ކޮށްގެންކަމަށް ސަލީމް ފާހަގަކުރެއްވި އެވެ.
ޕްލާސްޓިކަކީ ކުނީގެ ގޮތުގައި އުފައްދާ ބާވަތްތަކުގެ ތެރެއިން މެނޭޖްކުރަން ވަރަށް އުނދަގޫ ކުނީގެ ބާވަތެއް ކަމަށާއި އެބާވަތުގެ ކުނި މަދުކުރުން އެއީ އެންމެ މުހިއްމު އެއް ފިޔަވަޅު ކަމަށް ސަލީމް ވިދާޅުވިއެވެ. ދިވެހިރާއްޖެ އަކީ ކުޑަކުޑަ ގައުމަކަށް ވިޔަސް މިއީ ނިސްބަތުން މިސަރަހއްދުގައި އެންމެ ގިނައިން ކުނި އުފައްދާ ގައުމު ކަމަށާއި އެކަމުގައި ފަރުދީ ޒިންމާ ވަރަށް ބޮޑު ކަމަށް ސަލީމް ވިދާޅުވި އެވެ.
ސަލީމް ވިދާޅުވީ އެއްފަހަރު ބޭނުންކޮށްފައި އެއްލައިލެވޭ ޕްލާސްޓިކް ކުނިން ރާއްޖެ އަށް ވަރަށް ބޮޑު ނުރައްކަލެއް ކޮށްފާނެ ކަމަށާއި އޭގެ ސަބަބުން ފަތުރުވެރިކަމާއި މަސްވެރިކަން ހަލާކުވެ އާންމު ސިއްޚަތަށް ގެއްލުން ވެދާނެ ކަމަށެވެ. އަދި ޕްލާސްޓިކް ފުޅިން ފެންބުއިމަކީ ކޫލް ކަމެއް ނޫން ކަމަށާއި އެއީ ފައިދާ ހުރި ކަމެއްވެސް ނޫން ކަމަށް ސަލީމްް ވިދާޅުވި އެވެ.
މި ރަސްމިއްޔާތުގައި އެމްސެވަންގެ މެނޭޖިން ޑިރެކްޓަރ މުހައްމަދު އަބްދުއް ސައްތާރު ވިދާޅުވީ އެމްސެވަން އިން ސިންގަލް ޔޫސް ޕްލާސްޓިކް ހުއްޓާލަން ނިންމާފައިވަނީ ދިވެހި ސަރުކާރުން ހިންގަމުން ގެންދާ ސިންގަލް ޔޫސް ޕްލާސްޓިކް ބޭނުން ކުރުން ހުއްޓާލުމުގެ ކެމްޕޭންގައި ބައިވެރިވުމުގެ ދަށުންނެވެ. އަދި 100 އަށް ވުރެ ގިނަ މުވައްޒަފުން މަސައްކަތްކުރަމުންދާއިރު ކޮންމެ ދުވަހަކުވެސް އެއްތަށް ފުޅިތަކެއް ގެނެވި އުކާލެވެމުންދާ ކަމަށް ސައްތާރު ވިދާޅުވި އެވެ.
ޕްލާސްޓިކް ފުޅީގެ އިތުރުން އެމް 7 ގައި އިންކް މެޓީރިއަލްވެސް އެންވަރަންމްނޓް ފެރެންޑްލީ ތަކެޓީގެ ގޮތުގައި މީގެ ފަސްއަހަރު ކުރިން ބޭނުން ކުރަން ފަށާފައިވާކަންވެސް ސއްތާރު ވަނީ ފާހަކަ ކުރައްވާފައެވެ.
