1988 ވަނަ އަހަރުގެ ނޮވެމްބަރު މަހުގެ ތިން ވަނަ ދުވަހު ރާއްޖެއަށް ދިން އުދުވާނީ ހަމަލާގެ މޭސްތިރިޔާ ހ. ހާޖަރާގެ އަބްދުﷲ ލުތުފީ ރާއްޖެ ގެނައުމަށް އަޅަންޖެހޭ ފިޔަވަޅުތައް ކުރިން ނޭޅި ސަބަބު ތަހުޤީޤުކޮށްދިނުމަށް ކޮމިޝަނަރ އޮފް ޕޮލިސް މުހައްމަދު ހަމީދު އެދިއްޖެއެވެ.

ފުލުހުން ނެރުނު ބަޔާނެއްގައި ބުނެފައިވަނީ ބުނީ 2012-2016 އާ ދެމެދު ތަފާތު އެކި ފަހަރުމަތިން ލުތުފީ ފިލައިގެން އުޅުނު ތަންތަނާ ބެހޭ މައުލޫމާތު އޭރުގެ ސަރުކާރުތަކަށް ލިބިފައިވާ ކަމަށެވެ. ނަމަވެސް އޭރުގެ ސަރުކާރުން ލުތުފީ ގެނައުމަށް އެއްވެސް މަސައްކަތެއް ކޮށްފައިނުވާކަމަށް ފުލުހުން ބުންޏެވެ.

އެ ސަރުކާރުން ލުތުފީ ގެނައުމަށް އެއްވެސް މަސައްކަތެއްކޮށްފައިނުވާތީ ކޮމިޝަނަރ އޮފް ޕޮލިސް އެ މައްސަލަ ޖޫން 27 ވަނަ ދުވަހު ފުލުހުންގެ ޕްރޮފެޝަނަލް ސްޑޭންޑަރޑްސް ކޮމާންޑަށް ރަސްމީކޮށް ތަހުޤީޤުކޮށްދިނުމަށް ލިޔުމުން އަންގާފައިވާ ކަމަށް ފުލުހުން ބުންޏެވެ. އަދި ފުލުހުންގެ ޕްރޮފެޝަނަލް ސްޑޭންޑަރޑްސް ކޮމާންޑްގެ ފަރާތުން އެ މައްސަލަ ތަހުޤީޤު ކުރަމުންދާ ކަމަށްވެސް ފުލުހުންގެ ބަޔާނުގައި ބުނެފައިވެއެވެ.

ލުތުފީ ރާއްޖެ ގެނައުމަށްޓަކައި ލަންކާގެ ކަމާބެހޭ ފަރާތްތަކުގައި ދަންނަވާފައިވާ ކަންކަމަށް އަވަސް ފިޔަވަޅެއް އަޅުއްވައި ދެއްވުމަށް ފުލުހުންނާއި އޮންނަ ގުޅުމުގެ ތެރެއިން ސްރީލަންކާގެ ޕޮލިސް ފޯރސްގެ އެކްޓިންގ އިންސްޕެކްޓަރ ޖެނެރަލް އޮފް ޕޮލިސް ސީ.ޑީ ވިކްރަމަރަތުނަ އާއި ކްރައިމް އިންވެސްޓިގޭޝަން ޑިޕާޓްމަންޓްގެ ޑެޕިއުޓީ އިންސްޕެކްޓަރ ޖެނެރަލް ރަވީ ސެނަވިރަތުނައަށް ފޯނުން އަދި ސިޓީން އެކި ފަހަރުމަތިން މުއާމަލާތް ކުރެވިފައިވާ ކަމަށް ފުލުހުން ބުންޏެވެ. އަދި ލުތުފީ ކައިރީގައި މިހާރު ވެސް ފުލުހުންގެ ޓީމެއް ސްރީލަންކާގައި ހަރަކާތްތެރިވަމުން އަންނަ ކަމަށް ފުލުހުން ބުނެއެވެ.

1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ބޭރުގެ ކުލީ ސިފައިން ރާއްޖެ ގެނެސްގެން ދިން ރަހުމްކުޑަ އުދުވާނީ ހަމަލާގައި 19 ދިވެއްސަކު ޝަހީދު ކޮށްލިއެވެ. ލުތުފީ އިސްކޮށް ހުރެ މިހަމަލާއާ ގުޅިގެން ލުތުފީ މަރަން ހުކުމްކުރި އެވެ. ނަމަވެސް އޭރުގެ ސަރުކާރުން އޭނާގެ އަދަބު ލުއިކޮށްދެއްވައި އުމުރު ދުވަހުގެ ޖަލުހުކުމަކަށް ބަދަލުކުރިއެވެ. ނަމަވެސް ރައީސް ނަޝީދުގެ ވެރިކަމުގެ ބޭސްފަރުވާއަށް ފޮނުވުމުން އޭނާ ފިލިއެވެ. އެގޮތުން ނިމިދިޔަ ސަރުކާރުން ވެސް އޭނާ ހޯދުމުގެ މާބޮޑު މަސައްކަތެއް ކޮށްފައެއް ނުވެއެވެ.

އުމުރު ދުވަހުގެ ޖަލު ހުކުމް ކަމަށް ބަލަނީ 25 އަހަރު ކަމަށް ވާތީ ލުތުފީއާ އެކު މިރަހުމްކުޑަ ހަމަލާގައި ދެން އެންމެ އިސްކޮށް އުޅުނު ސަގަރު އަހުމަދު ނާސިރު ވަނީ ޖަލު ހުކުމުގެ މުއްދަތު ހަމަވެގެން މިނިވަން ކޮށްފައެވެ.