ލުތުފީ ރާއްޖެ ގެނެވޭނެ: ރައީސް ނަޝީދު
30 ޖޫން 2019 | އާދީއްތަ 10:15ލުތުފީގެ މައްސަލައަކީ ރައްޔިތުން ކަންބޮޑުވާ މައްސަލައެއް ކަމަށް ވިދާޅުވި
މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި މަޖިލީހުގެ ރައީސް މުހައްމަދު ނަޝީދު
ކުރީގެ ރައީސް މައުމޫން އަބްދުﷲ ޤައްޔޫމްގެ ވެރިކަން ވައްޓާލައި، ރާއްޖެ ހިފުމަށް 1988 ވަނަ އަހަރުގެ ނޮވެމްބަރު މަހުގެ ތިން ވަނަ ދުވަހު ރާއްޖެއަށް ދިން ހަމަލާގެ މޭސްތިރިޔާ ހ. ހާޖަރާގެ ލުތުފީ ރާއްޖެ ގެނެވޭނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ މަސައްކަތާއި ބެހޭގޮތުން ނޫސްވެރިންނަށް މައުލޫމާތު ދިނުމަށް އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ނަޝީދު ވިދާޅުވީ، ލުތުފީގެ މައްސަލަ އެމަނިކުފާނުގެ ސަމާލު ކަމަށް އައިސްފައިވާ ކަމަށެވެ. އަދި އެމައްސަލަ ވަރަށް ގާތުން ބަލަމުންދާކަމަށް އެމަނިކުފާނު ވިދާޅުވި އެވެ.
ރައީސް ނަޝީދު ވިދާޅުވީ، ލުތުފީގެ މައްސަލައަކީ ރާއްޖޭގެ ރައްޔިތުން ކަންބޮޑުވާނެ ކަމެއް ކަމަށެވެ. އެމަނިކުފާނު ވިދާޅުވީ މި ސަރުކާރުގައި ލުތުފީ މާލެ ގެނައުމަށް ކުރެވެން ހުރި ހުރިހާ ކަމެއް ކުރާނެ ކަމަށެވެ.
ލުތުފީގެ މައްސަލާގައި މަޖިލީހަށް ވަނީ ސުވާލެއް ހުށައަޅާފައެވެ. ހޯމް މިނިސްޓަރާ އެ ސުވާލުކުރުމަށް 14 ދުވަހުގެ ނޯޓިސް ދީފައިވާ ކަމަށް ރައީސް ނަޝީދު ވިދާޅުވިއެވެ.
އެ މައްސަލާގައި ފުލުހުން މީގެކުރިން ބުނެފައިވަނީ ލުތުފީ އަނބުރާ ރާއްޖެ ނުގެނެވިގެން އުޅެނީ އޭނާ ގެނައުމަށް ސްރީލަންކާގެ ކަމާބެހޭ އިދާރާތަކުން ފުރިހަމަ ކުރަން ޖެހޭ ލިޔެކިޔުންތައް ފުރިހަމަ ކުރެވިފައިނުވާތީ ކަމަށެވެ. އަދި ލުތުފީ މާލެ ގެނައުމަށް ފުލުހުންގެ ޓީމެއް މިހާރު އަންނަނީ އެ ޤައުމުގައި ހަރަކާތްތެރިވަމުންނެވެ.
ރެޑް ނޯޓިސް ނެރެ ހޯދަމުންދިޔަ ލުތުފީ ލަންކާގައި ހުންނަ ރާއްޖެ އެމްބަސީއާ އަމިއްލައިން ހަވާލުވެފައިވަނީ މޭމަހު އެއްވަނަ ދުވަހުއެވެ.
