ޤަވާއިދާ ޚިލާފަށް ޕާކު ކޮށްގެން މިދިޔަ ހަފްތާގައި 1300 އަށް ވުރެ ގިނަ އުޅަނދުގައި ސްޓިކަރ ޖަހާފައިވާ ކަމަށް ފުލުހުން ބުނެފިއެވެ.

އާދިއްތަ ދުވަހު ފުލުހުން އާންމު ކުރި ތަފާސްހިސާބުތައް ދައްކާގޮތުން ޤަވާއިދާ ޚިލާފަށް ޕާކު ކޮށްގެން ޖޫން މަހުގެ 22 ވަނަ ދުވަހުން ފެށިގެން 28 ވަނަ ދުވަހާއި ހަމައަށް 1350 އުޅަނދެއްގައި ސްޓިކަރ ޖަހާފައިވާއިރު، ޖުމުލަ 5 ކާރާއި 39 ސައިކަލު ޓޯ ކޮށްފައިވެއެވެ.

އޭގެ އިތުރުން، 591 އުޅަނދެއް ޗެކް ކޮށްފައިވާއިރު، އޯވަރ ސްޕީޑް ވުމުގެ 82 މައްސަލައަކާއި ލައިސަންސް ނެތި ދުއްވުމުގެ 117 މައްސަލައެއް ފުލުހުން ބަލާފައިވެއެވެ. އަދި ފާއިތުވި ހަފްތާގައި 34 އެކްސިޑެންޓު ހިނގާފައިވާއިރު، އޭގެ ތެރެއިން 20 އެކްސިޑެންޓެއްގައި އެކިވަރުގެ އިންޖަރީތައް ވެފައިވާ ކަމަށް ފުލުހުންގެ ތަފާސް ހިސާބުތަކުން ދައްކައެވެ.

އޭގެ އިތުރުން، އެކްސިޑެންޓުތަކާއި ގުޅިގެން ނިމިދިޔަ ހަފްތާގައި ވަނީ 7 ފަރާތެއްގެ ލައިސަންސް ވެސް ހިފަހައްޓާފައެވެ.

ޤަވާއިދާ ޚިލާފަށް ޕާކު ކޮށްގެން ގިނަ އަދަދެއްގެ ވެހިކަލް ތަކެއްގައި ސްޓިކަރ ޖަހާފައިވާއިރު، ޕާކު ކުރާނެ ޖާގަ ނުލިބޭ ކަމުގެ ޝަކުވާ ގިނަ ބަޔަކު ދަނީ ކުރަމުންނެވެ. އެގޮތުން މިހާރު ވެސް އިތުރު ޕާކިންގް ޒޯންތައް ހެދުމަށް ބިން ހޯދުމަށް މަސަތްކަތް ކުރަމުން އަންނަ ކަމަށާއި މިނިސްޓްރީތަކާ ވާހަކަ ދައްކައިގެން އެމަސައްކަތް ކުރަމުން އަންނަ ކަމަށް މާލޭ ސިޓީ ކައުންސިލުން ވަނީ ބުނެފައެވެ.