ބޭރު ގައުމެއްގެ އަސްކަރީ ބޭސްއެއް އެޅުމަށް ފުރުސަތު ނުދޭނަން: އެމްއެންޑީއެފް
29 ޖޫން 2019 | ހޮނިހިރު 12:32ސަރުކާރުން ވެސް އެފަދަ ވިސްނުމެއް ނުގެންގުޅޭ
ޗީފް އޮފް ޑިފެންސް ފޯސް، މޭޖަރ ޖެނެރަލް އަބްދުﷲ ޝަމާލް ނޫސްވެރިންގެ ބައްދަލުވުމުގައި
ދިވެހިރާއްޖޭގައި ބޭރުގެ އެއްވެސް ގައުމެއްގެ އަސްކަރީ ބޭސްއެއް އެޅުމަށް ފުރުސަތު ނުދޭނެ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފި އެވެ.
އެމްއެންޑީއެފްގެ މަސައްކަތްތަކާ ބެހޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ޗީފް އޮފް ޑިފެންސް ފޯސް، މޭޖަރ ޖެނެރަލް އަބްދުﷲ ޝަމާލް ވިދާޅުވީ އެއްވެސް ގައުމެއްގެ ބޭސް ރާއްޖޭގައި އެޅުމަށް ނުވަތަ ގާއިމްކުރުމަށް ދިވެހި ސަރުކާރުގެ ވިސްނުމެއް ނެތްކަމަށެވެ. އަދި އެފަދަ ފުރުސަތު ވެސް ނުދޭނެ ކަމަށް އޭނާ ވިދާޅުވި އެވެ.
މޭޖަރ ޖެނަރަލް ޝަމާލު ވިދާޅުވީ ދިވެހިންގެ އަސްކަރީ ގާބިލްކަން އިތުރުކުރުމަށް ކުރެވޭ މަސައްކަތުގެ ދަށުން އަބަދުވެސް ބޭރުގެ ގައުމުތަކުގެ އެހީތެރިކަން ހޯދާ ކަމަށެވެ. އެގޮތުން ތަމްރީނާއި ވަސީލަތުގެ އެހީއާއި ގާބިލްކަން އިތުރުކުރުމުގެ އެހީތެރިކަމާ އަދި ގުޅިގެން ސަވައިލަންސް އޮޕަރޭޝަންސްތައް ހިންގުމަށް އެހީތެރިކަން ހޯދަމުން ގެންދާ ކަމަށް ޝަމާލް ވިދާޅުވިއެވެ.
އުތުރު ތިލަފަޅު އިންޑިއާގެ ސިފައިންގެ އަސްކަރީ މަރުކަޒެއް ހަދަން ދޭން އުޅޭކަމަށް ދެކެވޭ ވާހަކަތައް ދޮގުކުރައްވައި ޖެނަރަލް ޝަމާލް ވިދާޅުވީ އެތަނުގައި ކޯސްޓްގާޑުގެ އުޅަނދުތައް އަޅާފައި ބެހެއްޓުމަށާއި، މެއިންޓަނަންސް މަސައްކަތް ކުރެވޭ ގޮތަށް ޕްލޭން ކުރަމުން ގެންދާ ކަމަށެވެ. އަދި ވިދާޅުވީ އުތުރު ތިލަފަޅުގައި އެފަދަ ތަނެއް ގާއިމު ކޮށްފިނަމަ، ކޯސްޓް ގާޑުގެ ކެޕޭސިޓީ އެތައް ގުނައެއް އިތުރުވާނެ ކަމަށާއި، މަސައްކަތްތަކަށް އިތުރު ފަސޭހަކަމެއް ލިބޭނެ ކަމަށެވެ.
ޝަމާލު ވިދާޅުވީ މިހާރު ސިފައިންގެ އުޅަނދުތައް ބަލަހައްޓައި މަރާމާތުކުރަމުން ގެންދަނީ މާލޭގެ ބޭރުފަޅުގައި ބާއްވައިގެން ކަމަށެވެ.
އެއްވެސް ގައުމެއްގެ އަސްކަރީ ބޭސްއެއް އެޅުމަށް ފުރުސަތު ނުދެނޭކަމަށް ވިދާޅުވެފައިވާއިރު އިންޑިއާ ސިފައިންގެ އަސްކަރީ ބޭސްއެއް ހަދަން މަސައްކަތްކުރާ ކަމަށް އިދިކޮޅު ފަރާތްތަކުން ވަނީ ތުހުމަތުކޮށްފައެވެ. އޭގެ ތެރޭގައި ކުރީގެ ހޯމް މިނިސްޓަރު އުމަރު ނަސީރު ހިމެނިވަޑައިގަންނަވައެވެ.
