ދެ ކޮރެއާ ގުޅޭ ސަރަހައްދުގައި އޮންނަ ހަތިޔާރު ބޭނުންކުރުން މަނާ ކުރެވިފައި އޮންނަ ސަރަހައްދުގައި އުތުރު ކޮރެއާގެ ލީޑަރު ކިމް ޖޮން އުން އާއި ބައްދަލުކުރެއްވުމަށް އެމެރިކާގެ ރައީސް ޑޮނަލްޑް ޓްރަމްޕް ޓްވިޓަރ މެދުވެރިކޮށް ދައުވަތު އަރުވައިފިއެވެ.
ޖަޕާންގައި ކުރިޔަށްދިޔަ ޖީ 20 ސަމިޓަށް ފަހު އެމެރިކާގެ ރައީސް ވަޑައިގަތީ ދެކުނު ކޮރެއާއަށެވެ.
ނިއުކްލިއަރ ހަތިޔާރު ނައްތާލުމުގެ ވާހަކަތައް އުތުރު ކޮރެއާއާއެކު ފަށައިގަތުމަށް އެ ގައުމާއެކު ވާހަކަދެއްކުން ފަށައިގަތުމަށް ޓްރަމްޕް ދެ ދުވަހުގެ ދަތުރުފުޅެއްގައި ދެކުނު ކޮރެއާއަށް ވަޑައިގަތީ ހޮނިހިރު ދުވަހުއެވެ.
އޮސާކާގައި ޖީ 20 ސަމިޓްގައި ވާހަކަ ދައްކަވަމުން ޓްރަމްޕް ވިދާޅުވީ ކިމްގެ ޝައުގުވެރިކަން ހުރި މިންވަރެއް ހޮނިހިރު ދުވަހު ހެނދު ބައްލަވާނެ ކަމަށެވެ.
" އެމަނިކުފާނު ހުންނެވިއްޔާ އަޅުގަނޑުމެން އެކަކު އަނެކަކަށް ދެމިނެޓަށް ފެނިލެވުނީމި ރަނގަޅުވާނެ" ރިޕޯޓަރުންނާ ވާހަކަ ދައްކަވަމުން ވިދާޅުވިއެވެ.
ޓްރަމްޕް މިވާހަކަ ވިދާޅުވެފައިވަނީ ސައުދީ ވަލީއަހުދު މުހައްމަދު ބިން ސަލްމާންއާއެކު ހެނދުނުގެ ނާސްތާ ފެއްޓެވުމުގެ ކުރިންނެވެ.
ރައީސް ޓްރަމްޕްއާއި ކިމް ވިއެޓްނާމްގެ ހެނޯއީގައި ފެބްރުއަރީ މަހު ބައްދަލު ކުރައްވާފައިވެއެވެ.
މީގެ އިތުރުން ދެ ބޭފުޅުންގެ ފުރަތަމަ ސަމިޓް ބާއްވާފައިވަނީ 2018 ވަނަ އަހަރު ޖޫން މަހު ސިންގަޕޫރުގައެވެ.
