ދިވެހި ގައުމަށް ހަރުދަނާ ޒުވާނުން ބޭނުންވޭ: ނައިބު ރައީސް
ވަރަށްގިނަ އަދަދަކަށް ހޮސްޕިޓާލިޓީ އިންޑަސްޓްރީގައި މަސައްކަތް ކުރާނެ ރަނގަޅު މީހުން ބޭނުން
ޔުނިވަރސަލް ފައުންޑޭޝަންގެ ފަރާތުން ހިންގި \"ޑިސްކަވަރ ހޮސްޕިޓާލިޓީ\" ޕްރޮގްރާމުގެ ބައިވެރިންނަށް ސެޓްފިކެޓް ދިނުމަށް ބޭއްވި ހަފްލާގެ ތެރެއިން
ދިިވެހި ޤައުމަށް ހަރުދަނާ ޒުވާނުން ބޭނުންވާ ކަމަށާއި، މާދަމާ ޤައުމު މިއަށްވުރެ ރަނގަޅަށް ހިންގުމަށްޓަކައި، އެކި ފަންނުތަކުގެ މަސައްކަތްތެރި ހުނަރުވެރި ޒުވާނުން، ބޭނުންވާކަމަށް ރައީސުލް ޖުމުހޫރިއްޔާގެ ނައިބް ފައިސަލް ނަސީމް ވިދާޅުވެއްޖެއެވެ.
ނައިބް ރައީސް މިހެން ވިދާޅުވީ ބުރާސްފަތި ދުވަހުގެ ރޭ ޔުނިވަރސަލް ފައުންޑޭޝަންގެ ފަރާތުން ހިންގި "ޑިސްކަވަރ ހޮސްޕިޓާލިޓީ" ޕްރޮގްރާމުގެ ބައިވެރިންނަށް ސެޓްފިކެޓް ދިނުމަށް ބޭއްވި ހަފްލާގައި ވާހަކަފުޅު ދައްކަވަމުންނެވެ.
އިތުރަށް ވާހަކަ ދައްކަވަމުން އެމަނިކުފާނު ވިދާޅުވީ މުޅި ދިވެހިރާއްޖެއަށް ވިސްނިކަމުގައި ވީނަމަވެސް ފެންނަނީ ޓޫރިޒަމް ދާއިރާކަމަށާއި، އަދި ވަރަށްގިނަ އަދަދަކަށް ހޮސްޕިޓާލިޓީ އިންޑަސްޓްރީގައި މަސައްކަތް ކުރާނެ ރަނގަޅު މީހުން ބޭނުންވާކަމަށެވެ.
މީގެއިތުރުން ނައިބް ރައީސް ފައިސަލް ވިދާޅުވީ، ދިވެހިން ބޭނުންވާ ކަހަލަ މޯލްޑިވިއަން ހޮސްޕިޓާލިޓީގެ ޚިދުމަތް ހިނިތުންވުމާއެކު ދޭވޭނީ ގިނަ އަދަދަކަށް ދިވެހިން މި ދާއިރާއިން ތައްޔާރުކޮށްގެންކަމަށާއި، ޓޫރިޒަމް ދާއިރާއަށް ޔުނިވަރސަލް ގުރޫޕުން، ޔުނިވަރސަލް ފައުންޑޭޝަނުން ކުރަމުންގެންދާ މަސައްކަތް ފާހަގަކޮށް، މުޅި ދިވެހި ސަރުކާރުގެ ނަމުގައި އަދި ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާގެ ނަންފުޅުގައި ޗެއަރމަން މުޙައްމަދު ޢުމަރު މަނިކަށް ވަރަށް އިޚްލާޞްތެރިކާމާއެކު ޝުކުރު ދަންނަވާކަމަށެވެ.
ކަންތައްތަކެއް ދަސްކުރަން ކުރިމަތިލާއިރު ވަރުގަދަ އަޒުމެއް ހިތުގައި ބަހައްޓަންޖެހޭނެކަމަށާއި އެއްވެސް ކަމަކީ އެކަމަށް ދޭންވާ ސަމާލުކަން ނުދެވިއްޖެނަމަ ކާމިޔާބުވާނެ ކަމެއްނޫންކަމަށް ނައިބް ރައީސް ވިދާޅުވިއެވެ. އަދި ކާމިޔާބު މީހަކަށް ވުމަށްޓަކައި މީހާ ހަރުދަނާވާން ޖެހޭނެކަމާއި، އެހެން މީހުންނަށް ނަމޫނާ ދައްކަންޖެހޭނެކަމަށްވެސް އެމަނިކުފާނު ވިދާޅުވިއެވެ.
ވަކިން ޚާއްޞަކޮށް، ދިވެހި ސަރުކާރުން އަބަދުވެސް ބަލަމުންދާނީ ތަޢުލީމީ ދާއިރާ އަދި މަސައްކަތްތެރިން އުފެއްދުމުގެ ދާއިރާއަށް ހުޅުވެން ހުރި ހުރިހާ ދޮރުތަކެއް ހުޅުވުމަށްކަމަށާއި ތަޢުލީމީ ދާއިރާއަށް ދުވަހަކުވެސް ހޭދަނުކުރާ މިންވަރަށް ރައީސުލްޖުމުހޫރިއްޔާ އިބްރާހިމް މުޙައްމަދު ޞާލިޙުގެ ސަރުކާރުން ހޭދަތައް ކުރައްވާ ކަމަށް ވިދާޅުވިއެވެ.
ސަރުކާރުން ތަޢުލީމީ ދާއިރާގައި ޒުވާނުންނާއި ދިވެހި ރައްޔިތުންނަށް ހުޅުވާފައި ހުރި އެއްވެސް ދޮރެއް ބަންދެއް ނުކުރައްވާނެކަށާއި އަދި ތަޢުލީމު ދިނުމުގައި، އަމިއްލަ ފަރާތްތަކަށް ދިމާވެފައި ހުރި ގޮންޖެހުންތަކާއި ތަޢުލީމާއި ތަމްރީން ދިނުމުގައި، ދިމާވެފައި ހުރި ގޮންޖެހުންތައް ހައްލުކުރުމަށްޓަކައި ދިވެހި ސަރުކާރުން އެ ފަރާތްތަކާ ވަރަށް ގާތުން މަސައްކަތް ކުރަމުންގެންދާނެ ކަމަށްވެސް ނައިބް ރައީސް ވިދާޅުވިއެވެ.
