ކޮރަޕްޝަނުން ދުރުވެ ރައްޔިތުން ބަލައިގަންނަ ޚިދުމަތްތައް ކުންފުނިތަކުން ފޯރުކޮށްދިނުމަށް ރައީސުލްޖުމްހޫރިއްޔާގެ ނައިބް ފައިސަލް ނަސީމް އެދިވަޑައިގެންފިއެވެ.

މާލޭ ވޯޓަރ އެންޑް ސުވަރޭޖް ކޮންޕެނީ (އެމްޑަބްލިއުއެސްސީ)ގެ 24 ވަނަ އަހަރީ ދުވަސް ފާހަގަކުރުމަށް ބުރާސްފަތި ދުވަހު ބޭއްވި ރަސްމިއްޔާތު ޝަރަފުވެރިކޮށްދެއްވާ ނައިބް ރައީސް ފައިސަލް ވިދާޅުވީ މަސައްކަތު ގަޑީގެ ބޭނުން ފުރިހަމަ ގޮތުގައި ހިފަންޖެހޭ ކަމަށާއި، ވަޒީފާގެ މާހައުލުގައި އެއް މުވައްޒަފަކު، އަނެއް މުވައްޒަފަކާ ގުޅިގެން އެކުގައި މަސައްކަތް ކުރަންޖެހޭ ކަމަށެވެ. ޓީމެއްގެ ގޮތުގައި މަސައްކަތް ކޮށްފިނަމަ އެމަސައްކަތެއް ފުރިހަމަވެ ބޮޑު ކާމިޔާބީތަކެއް ހާސިލްކުރެވޭނެ ކަމާމެދު ޝައްކު ނުކުރާ ކަމަށް އެމަނިކުފާނު ވިދާޅުވިއެވެ.

ކުންފުނި ހިންގުމުގައި ވެސް ޚިދުމަތް ހޯދަން އަންނަ ފަރާތްތަކުން ބަލައިގަންނަފަދަ ރަނގަޅު ފެންވަރެއްގައި ޚިދުމަތް ފޯރުކޮށްދިނުމަށް އިލްތިމާސްކުރައްވާ ނައިބް ރައީސް ފައިސަލް ވިދާޅުވީ ކޮރަޕްޝަނާ ދުރުވެ، ޚިދުމަތް ލިބިގަންނަ މީހުންނަށް ހިތްހަމަޖެހޭ ގޮތަށް ހިދުމަތްތައް ފޯރުކޮށްދިނުމަކީ މި ޒަމާނުގައި ކޮންމެހެން ކުރަން ޖެހޭ ކަމެކެވެ.

މީގެ އިތުރުން ނައިބް ރައީސް ފައިސަލް ވިދާޅުވީ މާލޭގެ އެކި ސަރަހައްދުތަކަށް ބަލާ އިރު، ނުއަގުގައި ކޮށްފައި ހުރި ކަންކަން ފެނިވަޑައިގެންފައިވާ ކަމަށެވެ. އަދި ސަރުކާރުން ނުވަތަ ކުންފުންޏަކުން އެއްވެސް މަސައްކަތެއްކޮށް، ރައްޔިތުންނާ ހަވާލު ކުރާއިރު، އެންމެ ބޭނުންތެރި ގޮތުގައި ހިފޭ އެއްޗަކަށް ވާން ޖެހޭ ކަމަށެވެ.

ނައިބް ރައީސް ފައިސަލް ވިދާޅުވީ ކުންފުނިތައް ހިންގުމުގައި ކޮރަޕްޝަނާ އެއްކޮށް ދުރަށް ދާންޖެހޭ ކަމަށާއި، ރައްޔިތުންނާއި ގައުމަށްޓަކައި ޚިދުމަތް ކުރަންޖެހޭ ކަމަށެވެ. އަދި ވިދާޅުވީ މިހާރު ގައުމު އޮތް ހާލަތުން އަރައިގަތުމަށް އެންމެންގެ އެއްބާރުލުން ބޭނުންވާ ކަމަށް ނައިބް ރައީސް ވިދާޅުވިއެވެ.