ފޮރިން މިނިސްޓަރ އަބްދުﷲ ޝާހިދް ޔޫރަޕިއަން ޔޫނިއަންގެ އިސްބޭފުޅުންނާއި މިއަދުގެ ވަގުތެއްގައި ބައްދަލު ކުރައްވައިފިއެވެ.
އެގޮތުން މި ބައްދަލުވުމުގައި މިނިސްޓަރ ޝާހިދު ވަނީ ޔޫރަޕިއަން ޔޫނިއަންގެ ކޮމިޝަނަރ ފޮރ ޓްރޭޑް، ސިސީލިއާ މެލްމްސްޓްރޮމް އާއި އެކު ބައްދަލު ކުރައްވާފައެވެ. ޔޫރަޕިއަން ޔޫނިއަން އާއި ރާއްޖޭގެ ވިޔަފާރީގެ ގުޅުން ހަރުދަނާކޮށް،, ދިވެހި ކަނޑުމަހުގެ އުފެއްދުންތައް ޔޫރަޕްގެ ބާޒާރަށް ނެރުމަށް މި ބައްދަލުވުމުގައި މަޝްވަރާ ކުރައްވާފައިވެއެވެ.
މީގެ އިތުރުން ޚާރިޖީ ވަޒީރު ޝާހިދު ވަނީ ޔޫރަޕިއަން އެކްސްޓާރނަލް އެކްޝަން ސާރވިސްގެ ޑެޕިއުޓީ މެނޭޖިންގ ޑިރެކްޓަރ، އޭޝިއާ އެންޑް ޕެސިފިކް ޑިޕާޓްމަންޓް، ޕައޯލާ ޕަމްޕޮލީނީއާއިވެސް ބައްދަލުކުރައްވާފައެވެ. އިންސާނީ ހައްގުތަކާއި، އިގްތިސާދީ ތަރައްގީގެ އިތުރުން މޫސުމީ ބަދަލުތަކާއި ބެހެގޮތުން ވެސް މި ބައްދަލުވުމުގައިވަނީ މަޝްވަރާ ކުރައްވާފައެވެ.
ބްރަސަލްސްގައި ބޭއްވުނު މި ބައްދަލުވުމުގައި ޔޫރަޕިއަން ޕާލަމެންޓްގެ ބައެއް ބޭފުޅުންނާއި ވެސް މިނިސްޓަރ ޝާހިދު ވަނީ ބައްދަލު ކުރައްވާފައެވެ. މިގޮތުން ޕާލިމެންޓްގެ ބޭފުޅުންވަނީ ރާއްޖެއަށް ޑިމޮކްރެޓިކް ވެރިކަމެއް ގެނައުމާއި ސަރުކާރުން ކުރަމުން ގެންދަވާ އިސްލާހީ މަސައްކަތަށް މަރުހަބާ ދަންނަވާފައެވެ. އަދި މި މަސައްކަތުގައި ރާއްޖެއަށް އެހީތެރިވެދެއްވާނެ ކަމަށް ވެސް އެބޭފުޅުން ވަނީ ވިދާޅުވެފައެވެ.
